VOV4.M’nông:   Jêh âk khay geh khuch bah srê Covid-19, pâl nđaih Dak Lak dôl geh âk nău mbơh rdâk hao uĕh. Ndrel đah n’hao uĕh ăp ndơ ơm geh aƀaơ, n’gorr nsrôih ƀư mhe n’hanh rgâl âk ndơ gey wwăch rgum năch.

Rgum lăp ndrel ăp nău răm mơak tâm bôk nău tŭr chĭng gŏ gông Tây Nguyên ta Bảo tàng Dak Lak, wa Nguyễn Văn Sơn, năch pâl nđaih tât bah nkual ƀon têh Hà Nội saơ dŭt răm m’ak n’hanh ŭch. Wa Sơn an gĭt, â lĕ tăng n’hanh gĭt tât Dak Lak tă bah ăp trong mbơh nu nău yơn aơ lah rơh bôk năp dơi tât ta aơ pâl nđaih. Ăp nău ƀư nsong uănh tĭng tour dŭt uĕh, leo wa.

 “Dŭt lah uĕh ngăn. Nuĭh Bắc lăp ta aơ ma saơ nkual Tây Nguyên aơ uĕh ngăn, mhe tât lĕ dơi tăng ăp nău mprơ bah Tây Nguyên ri dŭt răm n’hanh uĕh ngăn, aƀaơ mư saơ ngăn. Bôk nău kan hăn nsong uănh ma dơi mâp kơt aơ dŭt lah uĕh mơak ngăn. Lĕ saơ rhơn êng n’hanh ŭch dơi mâp ăp nuĭh Tây Nguyên ngăn ngên dŭt răm n’hanh saơ ntô̆ n’hao tay du nău rnoi mpôl tay, gâp lŏ gĭt tay du nkual neh”.

Pâl nđaih sinh thái, văn hóa ta Dak Lak dơi âk năch pâl nđaih uănh tâ, ƀư ngăn.

Ăp nar bah năp, rĭng du nar Bảo tàng Dak Lak wơt rhiăng năch pâl nđaih, geh ăp nar, rnoh năch tour hao tât rbăn nuĭh. Wa Đinh Một, Kruanh bảo tàng Dak Lak an gĭt, aơ lah nău mbơh dŭt răm yor jêh âk năm roh yor khuch bah chôt srê Covid-19, rnôk năch pâl nđaih dơi pơk tay ri nău kan pâl nđaih Dak Lak lĕ geh âk trong rdâk hao. Rnoh năch tât uănh nsong ăp nar bah năp saơ âk nău nsrôih bah nău kan tâm mâp đah năch tă bah âk trong mbơh.

“Tâm rnôk chôt srê ri mpôl hên ƀa ƀơ mâp đah năch ta ntŭk mrô. Mpôl hên ƀư âk nău kan tâm nĕ, ntĭt nsa kơt nkoch ăp mpla nsơ trực tuyến, mpôl hên nkoch ăp nău nkoch, ndơ ta nĕ n’hanh ƀa ƀơ mâp đah năch tâm Fanpage n’hanh Youtube bah bảo tàng. Knơm nĕ ma đah Bảo tàng Dak Lak n’hanh năch pâl nđaih geh mât nău tâm boh uĕh n’hanh rnôk dơi ntrŭnh an pơk mpông pâl nđaih ri năch khân pơng tât. Mpôl hên dơn geh âk nuĭh dăn, rnoh năch tât dŭt âk”.

Ndrel đah ntrŭt n’hanh hun hao ăp ndơ pâl nđaih, bah bôk năm tât aƀaơ, n’gor Dak Lak nsrôih mpla nsơ, ntrŭt ngăch pâl nđaih đah ăp n’gor gay tâm rgop nkual pâl nđaih n’hanh hun hao ăp ndơ pâl nđaih tĭng trong. Tâm 3 khay năm aơ n’gor lĕ râng mpla nsơ ndơ pâl nđaih lam ntŭr neh, ký ton kan ndrel đah ăp n’gor Phú Yên, Bình Định, Quảng Ngãi, Gia Lai, Kon Tum, ntrôl dăng boăt nthoi ndâk njêng ndơ pâl nđaih đah n’gor Khánh Hòa. Wa Nguyễn Thị Lệ Thanh, Kruanh N’gâng kan pâl nđaih n’gor Khánh Hòa uănh lah prêh mpeh nău ŭch tâm rgop nkual đah 2 n’gor tâm hun hao pâl nđaih.

“Nău dơh bah 2 n’gor ri ndơ pâl nđaih bah 2 nkual dŭt êng êng, mô geh nău tâm ban ri jêng tât nău mpôl hên ƀư tĭng tâm rgop dŭt nơih. Đah nău geh bah Khánh Hòa nĕ lah pâl nđaih dak lêng, gôl dak ndrel đah pâl nđaih sinh thái bri yôk bah n’gor Dak Lak kơl an uĕh ndơ pâl nđaih n’hanh bah nĕ nău mbơh ƀư tâm rgop nkual mpôl hên mpŏng đah ndơ aơ ri nău tâm rgop mbra geh săk rnglăy tâm năm tât”.

Tâm 3 khay năm aơ, rnoh năch pâl nđaih tât Dak Lak geh nău mbơh rdâk hao tay.

Tĭng kơp uănh bah n’gor, tâm 3 khay năm aơ, Dak Lak lĕ wơt bơi 240 rbăn năch tât uănh nsong, pâl nđaih ta n’gor. Êng tâm khay 4 aơ, rnoh năch tât n’gor lơ hao âk, ngăn lah tâm rơh rlu lễ, âk ntŭk rlu rlău, khách sạn lĕ jrô bĭch da dê. Ăp mpôl năch bah ăp n’gor kơt nkual ƀon têh Hồ Chí Minh, Hà Nội, Quảng Ninh,... săch Dak Lak ntŭk tât tâm trong hăn nsong uănh pâl nđaih miền Trung n’hanh Tây Nguyên. Tĭng wa Đặng Gia Duẩn, Groi kruanh N’gâng kan Văn hóa-Thể thao n’hanh pâl nđaih Dak Lak, đah ăp ndơ geh n’hanh nău dơh đah bri dak n’hanh nău uĕh văn hóa, Dak Lak dôl nsrôih dŭt âk gay ntơm dơi rdâk hao nău kan pâl nđaih.

“Ngoăy tâm âk ntrong kan lĕ rngôch ăp năch pâl nđaih ăp nkual lam dak dŭt ŭch rnôk tât Dak Lak nĕ lah nău ƀư ngăn pâl nđaih sinh thái. Dak Lak geh cà phê, geh văn hóa chĭng gông đah ntŭk ntô dŭt uĕh n’hanh âk, lơn lah geh rveh. Aƀaơ n’gor dôl ƀư pâl nđaih dăch dêh đah rveh ri êng nău moh kuăl bah pơng dơm lĕ ƀư an năch joi. Bah meng nĕ aƀaơ ăp rnăk mĭn ƀư ăp homestay, famstay ndrel đah pâl nđaih uĕh nđĭr n’hanh nâp nâl, lơn lah ndrel đah lŏ mir ri n’gor dŭt geh nău dơh đah lŏ mir nĕ lah du nău dơh jêng an hun hao pâl nđaih lŏ mir tâm năm tât”.

Jêh âk năm khuch bah srê, tâm nu nău mhe, Dak Lak dôl nsrôih mbơh ƀư âk nău kan gay ntrŭt nsôr pâl nđaih. Ndrel đah ăp trong mkra mpeh đăp mpăn njrăng n’gang srê Covid-19; mkra tâm di đah năch pâl nđai F0, n’gor dôl nsrôih ndâk njêng ăp ndơ pâl nđaih uĕh, âk ntil n’hanh joi geh nău têh bah n’gor.

                    Nuĭh rblang: Y Sưng Phê Ja