VOV4.M’nông: Knŭng hôm đêt nar tay, bơi 480.000 kon hŏk ăp gưl ta Dak Lak mbra lăp năm nti mhe 2022-2023. Tâm rnôk n’gor Dak Lak dôl mô tŏng 1.200 nai, nău kan ntĭm nti ta n’gor lĕ n’hanh dôl nchrăp ndâk ƀư ăp trong gay đăp mpăn trong kan ntĭm nti tâm năm nti mhe aơ.

Năm nti 2022-2023 aơ, Ngih sam ƀŭt tiểu học Cư Pui 2, xă nkual jru ngai Cư Pui, nkuăl Krông Bông geh 1.400 kon hŏk tĭng nti ăp jrô bah 1 tât 5. Nai Nguyễn Hồng Thuần-Hiệu trưởng ngih sam ƀŭt nkoch, aƀaơ ngih sam ƀŭt mô tŏng lĕ rngôch 8 nai:

“Ngih sam ƀŭt geh 37 jrô, kơp lah tiêng anh nti 4 tiết ri mô tŏng đêt ngăn 2 nai, hôm tin học mô tŏng 2 nai. Mhe aơ, ngih sam ƀŭt lĕ dăn đă Jrô kan ntĭm nti nkuăl n’hanh lĕ rƀŭn n’hanh tâm ban ŭch trong dăn Jrô kan Nội vụ, UBND nkuăl du môn 1 biên chế lah tiếng anh n’hanh tin học, hôm 2 nuĭh tay ri ngih sam ƀŭt mbra ký ton tĭng năm n’hanh rnôk geh biên chế ri mbra tâm rgâl tay”.

N’gor Dak Lak aƀaơ mô tŏng rlău 670 nai Mầm non

Nkuăl Krông Bông aƀaơ geh 51 ngih sam ƀŭt bah mầm non tât THCS, đah 21 rbăn kon hŏk tĭng nti. Wa Huỳnh Viết Trung-Kruanh jrô kan ntĭm nti nkuăl an gĭt, nău kan ntĭm nti nkuăl mô tŏng 133 nai, tâm nĕ dŭt âk nai mầm non đah 80 nuĭh, hôm ƀa ƀă lah 53 nai Tiểu học. Bôl mô tŏng hjô nai, yơn jrô kan lĕ n’hanh dôl nchrăp ndâk njêng ăp trong gay đăp mpăn trong kan ntĭm nti an năm nti mhe. Wa Huỳnh Viết Trung nkoch trong mkra:

“Đah gưl mầm non, mpôl hên mbra n’hŭch rnoh ta jrô gay rgŏ jă geh rnoh kon hŏk tât jrô nti âk, đah rnoh rĭng 1,5 nai ta jrô, mô geh pă tĭng tâm di lah 2 nai ta jrô. Hôm đah gưl tiểu học, mpôl hên hôm e đăp mpăn 100% ăp ngih sam ƀŭt hôm e ntĭm tin học, ngoại ngữ tĭng bôk nău nti mhe. Gay ƀư tĭng nău aơ, jrô kan mbra ƀư tâm rgop; tal 2 mbra rgum tay biên chế gay dŏng ntŭk rmeh; n’hanh trong mkra n’glêh dŭt lah ăp ngih sam ƀŭt jêt ri nai tin học, ngoại ngữ an ƀư tĭng ntĭm nti 2 ngih sam ƀŭt gay đăp mpăn an năm nti mhe’.

Hôm ta nkuăl Krông Búk, năm nti 2022-2023 aơ wơt nklăp 14.000 kon hŏk, tĭng nti ăp gưl bah Mầm non tât THCS ta 46 ngih sam ƀŭt. Tâm ban ma nĕ kơt nkuăl Krông Bông, nău kan ntĭm nti Krông Búk dôl mô tŏng 110 nai. Yơn lah mô kơt Krông Bông, rnoh nai mô tŏng ta Krông Búk rĭng tâm ban ta 3 gưl nti bah Mầm non tât THCS. Tâm nĕ, Mầm non mô tŏng âk ngăn 58 nai, Tiểu học 38 nai, hôm ƀa ƀă nai THCS. Wa Nguyễn Đình Khả-Kruanh jrô kan ntĭm nti nkuăl nkoch mpeh nău nchrăp ntĭm nti bah nău kan ntĭm nti Krông Búk năm nti mhe 2022-2023, tâm rnôk ntŭk dôl mô tŏng nai hô ngăn:

“Jrô kan ntĭm nti tâm ôp an UBND nkuăl lah nău săch mô hŏ pă tĭng rnoh bah nai. Ntĭt nsa đah gưl mầm non ntrŭnh 2,2, n’hanh nău ŭch lah 2,0 nai dâk jrô nti, ri mpôl hên an jŭr hôm 1,5 tât 1,6 nai dâk ntĭm dơm gay tŏng ăp nău kon hŏk hăn nti. Gưl Tiểu học lah 1,5, he pă jŭr nklăp 1,2 mô lah 1,2 dơm. Gưl THCS ri mô tŏng 18 nuĭh, môn mô tŏng môn rmeh, nău aơ dăp tay n’hanh dơi pă ntĭm”.

Lam n’gor Dak Lak mô tŏng 1.260 nai bah Mầm non tât THPT.

Năm nti mhe aơ n’gor Dak Lak geh 478.180 kon hŏk tĭng nti ta 1.071 ngih sam ƀŭt bah Mầm non tât THPT n’hanh Giáo dục thường xuyên, Ntĭm nti nău kan. Aƀaơ Dak Lak dôl mô tŏng 1.260 nai. Wa Phạm Đăng Khoa-Kruanh N’gâng kan ntĭm nti Dak Lak an gĭt:

Đah Dak Lak ri dôl kâp jao rnoh an ntop tay bah Chính phủ sĭt. Nău kan ntĭm nti lĕ tâm ôp an UBND n’gor pă rnoh an dơi jao ntop tay an ăp ntŭk hôm e mô tŏng ntĭt nsa kơt: Lắk, Krông Bông, Krông Búk, aơ lah ăp nkuăl ach o. Nău ntop tay mbra kơl lor gưl mầm non. Ăp ntŭk geh wăng sa mbơm oi ri rgum kuăl jă ăp trong kon nuĭh tâm rgop”.

Đah nău nchrăp pă, dăp tay rmôt nai ta ăp ngih sam ƀŭt, ntŭk ntĭm nti kơt ăp trong mkra êng tâm rnôk mô tŏng rlău 1.200 rnoh biên chế nai, nău kan ntĭm nti Dak Lak lĕ nchrăp wơt kon hŏk tât ngih sam ƀŭt năm nti mhe./.

Nuĭh rblang: Y Sưng Phê Ja