VOV4.M’nông: Ê tât du khay tay ôh lah kon se nti ăp gưl tâm Dak Lak mra lăp năm nti mhe 2022-2023. Gay ma đăp mpăn nau kan ntĭm ndrel nti, nau nchrăp ndoh ndơ dŏng ntĭm nti dôl geh ăp nkuăl ntrŭt dăng, nchrăp ăp nau kan nchrăp kan, đăp mpăn nau ntĭm nti ân geh n’ho ro tâm moh nau tât.

            Ăp nar bôk khay 8 aơ, tâm ngih săm ƀŭt Tiểu học Cư Pui II, ngih săm ƀŭt Ea Rớt, xã nkuăl jru Cư Pui, nkuăl Krông Bông ngih 2 dăp 6 jrâu ntĭm nti ndrel du đê̆ jrâu ƀư nau kan êng, dôl ma geh nkra chor. Ăp jrâu ntĭm nti ơm ndrel jrâu nti hiệu bộ geh sơn mhe, tâm ăp jrâu nti sưng nti, sưng gŭ, bảng nchih săm ƀŭt ndrel ăp ndơ dŏng ntĭm nti kŏ geh nchrăp ueh nâp.

            Nai nti kon se Nguyễn Hồng Thuần-Hiệu trưởng ngih săm ƀŭt mbơh, năm nti aơ, ngih săm ƀŭt Tiểu học Cư Pui II mra vơt nklăp 1.400 kon se. Rnôk aơ ngih săm ƀŭt êp UBND xã hŏ geh nkra ueh nâp, ntŭk ngih săm ƀŭt Ea Rớt hôm dôl ma rnôk nkra, nchrăp tât khay 12 mơ jêh. Gay đăp mpăn nau kan ntĭm nti rnôk ma ntŭk ntu ê lăng jêh, ngih săm ƀŭt hŏ nchrăp nau kan êng:

            ‘Rnôk aơ ndâk geh 6 ngih săm ƀŭt prêh dăp ê jêh nkra, ân geh tât nti kỳ bar mơ jêh, ndrel mra lăp nti ta nê. Bah năp măt, ngih săm ƀŭt geh du jrâu ntĭm nti đah kđar ndrel mra dŏng jrâu aơ ƀư jrâu nti rnôk aơ. Ngih săm ƀŭt hŏ pă nau leo sưng ntĭm nti tâm jrâu aơ, êng nê ri kŏ ƀư săm ƀŭt đă UBND nkuăl dăn tơm prăk gay ma rvăt tay 30 nsưng mpan mhe đŏng ndrel hŏ geh ân dơi geh pă ndrel rvăt mra leo lĕ tâm ntŭk jrâu nti nê”.

            Năm nti 2022-2023, nkuăl Krông Bông geh 51 jrâu ntơm mầm non tât THCS, 21 rbăn kon se nti. Wa Huỳnh Viết Trung-Kruanh jrâu kan ntĭm nti nkuăl mbơh, gay ma nchrăp năm nti mhe, UBND nkuăl Krông Bông pă dơi tât 24,5 rmen prăk gay ma ndâk nkra mhe 66 jrâu nti, pă âk tơm prăk êng êng gay ma nkra, pă âk ndơ tâm jrâu nti ơm, rvăt năp ndơ dŏng, nsưng mpan, máy móc kơl an nau kan ntĭm nti ndrel nti rnôk aơ, dĭng lĕ ăp ngih săm ƀŭt dôl ƀư tâm di nau nchrăp luh:

            “Mpeh ndơ nchrăp ân ntŭk ntu gay ma ntơm ân năm nti mhe 2022-2023 ri Jrâu kan ntĭm nti nkuăl hŏ nchrăp ueh nau kan kơp uănh ntơm bah năm bah năp, ndâk nau nchrăp ntơm jêh nê gay ma ndŏ ân UBND nkuăl ân ƀư, ngăn lah ăp xã nkuăl jru, ngai. Rnôk aơ hôm du đê̆ ngih săm ƀŭt hŏ ƀư jêh, hôm du đê̆ ngih săm ƀŭt dôl ma nkra ân ngăch gay ma mhâm ƀư tât khay 9 năm aơ mra jêh, mra ân ntơm năm nti mhe”.

            Hôm tâm nkuăl Lắk, năm nti 2022-2023, kŏ vơt bơi tât 13 rbăn kon se nti tâm ăp gưl ntơm mầm non tât THCS. Wa Nguyễn Văn Ngọc, Kruanh jrâu kan ntĭm nti nkuăl nkoch, nau kan n’hao ndoh ndơ dŏng, ntuh kơl rvăt năp ndơh dŏng ntĭm nti geh jrâu ntrŭnh ƀư nchrăp nau kan tât ngih săm ƀŭt ntơm bôk năm. Rnôk tâm khay rlu nti, Jrâu kan đă ăp ngih săm ƀŭt ƀư êng, nsing tâm nau dơi geh tơm prăk dŏng bah nơm geh pă gay ma ƀư ăp nau ê nkra, nsôih bonh đă, mêt uănh ăp ntŭk kan ndâk njêng mhe gay ma đăp mpăn tâm di nau ngăch, n’hao nau ƀư nau kan êng êng gay ma đăp mpăn lah geh ntŭk mô năn jêh ri ân geh nau ntĭm nti n’ho ro:

            ‘Jrâu kan ntĭm nti geh ƀư nau ntuh kơl ndâk nkra 3 ntŭk ngih săm ƀŭt, tâm nê geh du đê̆ ntŭk hŏ jêh, hôm 2 ngih săm ƀŭt dôl ma jêh ndrel tât lơ 15/8 aơ kŏ mra lôch nau ê nkra nê. Rnôk aơ knŭng hôm ăp nau kan têh nau kan jêh mra lôch tâm mbrơi jêh ba kơi khay 9, ndrel nau kan aơ jrâu kan nchrăp tâm rgop nsum đah ăp ngih săm ƀŭt ndâk nau kan bah năp măt lah ân kon se geh hăn nti tâm ntŭk tâm ăp jrâu nti ơm mô lah mra dơi pă jêng nti ôi ndrel kêng măng. Ngăn lah gay ma đăp mpăn nau kan ntĭm ndrel nti”.

            Tĭng n’gâng kan ntĭm nti Dak Lak, năm nti 2022-2023, lam n’gor geh 478 rbăn kon se nti tâm 1.017 ngih săm ƀŭt, ntơm mầm non tât THPT. Gay ma đăp mpăn ndơ dŏng ân năm nti mhe, UBND n’gor dŏng bơi tât 477 rmen prăk gay ma ntuh kơl ndâk nkra ndrel rvăt năp ndơ dŏng ntĭm nti ndrel nti. Tâm nê, bơi tât 389 rmen prăk dŏng ndâk jrâu nti mhe, nkra nâp 170 jrâu nti ơm, ndâk mpir, n’gar, nglan pâl, mpông ngih săm ƀŭt ân âk ngih săm ƀŭt, nklăp 88 rmen prăk geh dŏng rvăt sưng nti, bảng nchih, âk ndơ dŏng ntĭm nti êng êng./.

Nŭih rblang: H’Thi