Ăp nău jêr bah rmôt mât njrăng ƀon lan ta ntŭk gĭt saơ bah phŭt mrô 13 n’hanh rơh dak bŭk têh, ndrel nău đă nâp nâl lĕ rngôch nău kan mât njrăng bri dak-tahen, lah nkô̆ nău dơi lah rjăp ta Rƀŭn nchră n’glôch jêh nău kan mât njrăng bri dak, tahen ta ntŭk năm 2025 yor UBND n’gor Dak Lak ƀư. Tĭng nău mbơh ta Rƀŭn nchră, năm 2025, năm kan mât njrăng bri dak-tahen ta ntŭk dơi ăp gưl, nău kan n’hanh rmôt vũ trang tâm n’gor mbơh ƀư uĕh rĭng; nkual mât njrăng dơi nâp nâl; dơi tâm rgop, rdâng n’hanh mkra nu nău dơi hao. Tâm rơh phŭt mrô 13 n’hanh rơh mih dak bŭk têh mhe rlău, rmôt tahen n’gor Dak Lak lĕ ngăch geh măt ntop kơl ƀon lan trơn, wơt kơl, mkra khuch khat, gay n’glơi tay rup ndah tâm nuih n’hâm nuĭh ƀon lan.

Bôl ndrĭ, ngăn ngên trôk nar hô ngăn lĕ an saơ nuih n’hâm mât njrăng ƀon lan n’hanh rmôt kan ta ntŭk du đêt xă, phường mô jăp, mô nchrăp lor, wĭ wĕ tâm ƀư njrăng rdâng. Uĕh tam mât uănh ngih dak mpeh mât njrăng ta du đêt ntŭk hôm e đêt; trong kan tâm ôp tâm nchră dăp rgum n’hanh tâm rgop hun hao wăng sa-rêh jêng đah mât njrăng bri dak mô hŏ rĭng. Tĭng nkô̆ nău nĕ, n’gor Dak Lak đă ăp ntŭk n’hanh rmôt vũ trang mkra lôch ăp nău mô hŏ dơi ƀư tâm trôk nar lơh mhe rlău, ngăn ta rmôt mât njrăng ƀon lan ta bah dâng. Lah rjăp nău đă aơ, wa Đào Mỹ, Groi Kruanh UBND n’gor Dak Lak an gĭt:

Khay mhe rlău, nkre phŭt mrô 13 n’hanh rơh mih mhe rlău tŏng nău uănh lah dơi tâm di bah Mpôl ntĭm rđău njrăng n’gang ăp gưl. Gâp đă ngih pah kan tahen ntĭm rđău, kơp uănh tay, kơl Ủy ban gay geh trong ntĭm rđău jru lơn, tâm pă rmôt an tâm di n’hanh ndeh rklư năp rwăt ndoh ndơ, năp rwăt m’hâm ƀư. Mô geh du nău dăn đă  na nê̆ ri Ủy ban n’gor mô dơi ndâk njêng nkual njrăng rdâng ta bah dâng nâp dăng.

Năm 2026, Dak Lak geh nău rƀŏng ntrôl dăng ntĭm nti mât njrăng bri dak-rnă njrăng; jêh ăp dăp rgum tâm rgop wăng sa-rêh jêng đah mât njrăng bri dak; nchră uĕh tiăr nti nkual njrăng rdâng n’hanh mât njrăng ƀon lan, n’hao nău kơl bah kơi tahen; ndâk njêng rmôt vũ trang nâp dăng, nchrăp tâm di ăp nu nău jêr.