Ôi (9/12), ta Đà Lạt, HĐND n’gor Lâm Đồng khóa 10, năm kan 2021-2026 ntơm ƀư rơh rƀŭn tal 7 way dŭt năm 2025 đah âk nkô̆ nău khlay. Ntoh ngơi ntơm rơh rƀŭn, wa Lưu Văn Trung, Kruanh HĐND n’gor Lâm Đồng, mĭn lah, mhe rlău âk jêr jŏt, ntŭl rlong năm 2025 wăng sa n’gor Lâm Đồng mât tay hao jêng âk đah 16/19 rnoh an ƀư dơi geh n’hanh rlău nău nchrăp n’gluh an; dĭng lĕ sŏk an tơm prăk Ngih dak ta n’gor geh rlău 31.200 rmen prăk hao 11% trong nchrăp n’gor jao n’hanh hao 17% nkôp đah trong nchrăp Trung ương jao; lŏ mir mĭn lah tay ƀư tơm wăng sa bah n’gor đah rlău 107.000ha tuch tăm lŏ mir công nghệ mhe n’hanh bơi 150.000ha neh tuch tăm đăp mpăn; ăp nău kan ŭnh nar nkra njêng, công nghiệp bô xít alumin rgop khlay tay hao jêng nsum bah n’gor.... Ta rơh rƀŭn tal 7, HĐND n’gor Lâm Đồng khóa 10 rgum tâm nchră, ntrŭnh đah 32 nău mbơh n’hanh 21 dự thảo nghị quyết, tâm nĕ âk nghị quyết geh nău kan têh, jŏ jong.

Ta phường Pleiku, rơh rƀŭn nchră tal 5, HĐND n’gor Gia Lai khoá 12, ôp nău mpeh pah kan njrăng rdâng dak buk, nău dơn kan mât uănh, nău ƀư tiư̆ng ndơ dŏng luh dak n’hanh ăp trong kan gay ma mât đăp mpăn jŏ jong tâm rnôk geh nău mih sial lơ ma mô ueh lĕ geh âk nău maqat kơl bâh ƀon lan. Ơh nău ôp, wa Cao Thanh Thương - GĐ ntŭk kan tuch tăm mât rong n’hanh ntŭk gŭ rêyh Gia Laoi- lah na nê mô geh nău m’ơk dak bât ta dak me Hà Thanh. Ta nkual aơ mô geh dak bât, bar dak bât têh ta mpeh luh nar bâh n’gor lah Núi Một n’hanh Định Bình ta rơh mih dak buk mhe nơh lĕ geh bêng âk dak n’hanh nău ma pă dak kanŭng khuch tât dak me Côn. Wa Cao Thanh Thương mbơh nău mô ueh tâm nău an luh dak tâm ban kơt nău rdâk njêng run in dak me, tăm tơm keo ta nkual luh dak ƀư bah ir geh hoch dak, du ntŭk ta dak bât Hà Thanh lĕ chah đang âk met yor nău dăng bâh dak n’hanh mô ueh ta ntŭk mper. Mpeh nău mpŏng kan jŏ jong, ăp ntŭk an geh uanh na nê̆ trong kan nchrăp ntrơn ntŭk gŭ ƀon lan tĭng nău tât bâh mih sial.