Mpôl so jay nô Y Bruat Niê, ta ƀon Ea Phê, nkuăl Krông Pách lĕ mât rlău 3 năm yơn mô geh du tơ̆ chuh brŭt ndrăng. Nô an gĭt nkô̆ nău yor so m’ơk lêng lĕ jŏ, nô klach geh kăp rnôk nhŭp so.

“Jŏ ngăn hôm mô geh chuh, 2 mlâm me pơng rgum mô janh nhŭp. Gâp nhŭp lah pơng kăp, klach pơng kăp jêng mô dơi chuh. Yor klach kon so kăp lah geh khih, lah mô hăn ngih dak si ri khĭt dâl”.

Tăng mbơh tâm loa ngơi bah xă đah nar chuh njrăng n’gang brŭt ndrăng an so, eo, rnăk wâl nô Ngô Quốc Đạt, ta xă Ea Kuăng, nkuăl Krông Pách, n’gor Dak Lak lĕ uănh nchrăp nău kan gay gŭ ta jay kâp cán bộ thú y tât chuh njrăng brŭt ndrăng an 3 mlâm so bah rnăk wâl. Nô an gĭt, ta aơ lĕ rngôch ăp jay mât đêt ngăn du mlâm so, eo, yơn mô geh nuĭh ŭch ndơ̆ êng mpa rong hăn chuh dak si brŭt ndrăng, ma way kâp geh rơh chuh tĭng bôk nău kan ngih dak:

“Brŭt ndrăng aơ gĭt đŏng lah dŭt klăch, mpeh chuh dak si brŭt ndrăng aơ uĕh đŏng, lah ma geh ntŭk hăn chuh tât jay ri gâp nchrăp chuh an so. Lah geh dak si chuh ri uĕh đŏng, gâp njrăng n’gang an pơng, âk rnôk geh mâp nău mô lap dơi oi đŏng”.

Nkuăl Krông Pách geh rlău 10.000 rnăk mât rong so đah dĭng lĕ rlău 15.000 mlâm. Bôl ndrĭ năm 2022 nău kan thú y knŭng ƀư chuh njrăng n’gang geh an 3.800 mlâm. Tĭng wa Võ Văn Vàng-Ntŭk kan mât ông n’hanh dak si mpa rong nkuăl Krông Pách, jêr jŏt têh ngăn lah nău mô tŏng tâm rgop bah nuĭh mât so.

“Khlay ngăn aƀaơ lah nău wât bah nuĭh mât rong. Ngăn lah nău wât bah nuĭh mât rong uĕh ri trong kan chuh brŭt ndrăng dŭt uĕh. Bôl aƀaơ hin nuĭh ƀon lan hôm e thơ tha đah trong kan chuh njrăng n’gang brŭt ndrăng aơ. Âk rnôk nuĭh ƀon lan geh âk nău ƀư mô uĕh ngăn đah nuĭh hăn chuh, ntĭt nsa kơt rmôk thú y bah dâng tât chuh ri nuĭh ƀon lan pơng lah so nĕ, dơi nhŭp ri chuh”.

Tĭng rnoh kơp bah N’gâng kan tuch tăm mât rong n’hanh hun hao ƀon lan, bah năm 2018 tât năm 2022, Dak Lak lĕ kơp dơn 25 nuĭh khĭt yor brŭt ndrăng. Tâm nĕ, geh ăp nuĭh trăm ji dŭt jŏ, geh so kăp bah 4 khay tât 1 năm bah kơi mư ntoh ji. Lĕ rngôch ăp nuĭh khĭt mô hăn chuh njrăng n’gang da dê rnôk geh so, eo kăp, koach .

Bôl ăp năm kơp dơn ăp nuĭh khĭt tă bah ji brŭt ndrăng, yơn trong kan chuh vaccine njrăng n’gang brŭt ndrăng an mpa rong ta Dak Lak knŭng geh rlău 30% tâm dĭng lĕ 360 rbăn mlâm so, eo. Aƀaơ Dak Lak dôl ƀư chuh vaccine njrăng n’gang brŭt ndrăng an so, eo tâm lam n’gor bah nar 25/3-25/4. Tĭng nĕ, ăp rnăk nuĭh rnoi mpôl đêt, rnăk dơi kơl, rnăk ach o mbra dơi an dơm chuh an so, eo. Ăp nuĭh êng prăk chuh njrăng n’gang lah 22.100 prăk du dĭng.