VOV4.M'nông: Dơn hôm mô hŏ tât n'gul khay tay đŏng lah tât Tết Nguyên đán Nhâm Dần 2022, aơ lah rnôk nuĭh ƀon lan Dak Lak rgum hăn rvăt năp ndơ gay nchrăp wơt Tết. Nău rgum âk nuĭh tâm rnôk nuh srê Covid -19 ta ntŭk dŭt krit rvê rnôk ăp nar n'gor năl geh nklăp 200 nuĭh ji mbra rŭ hôch geh ma nău rmoh rman n'hanh geh ma nău ntưp djkarêng nuh srê. Gay bah ir geh ma nău dja, n'gâng kan ta ntŭk n'hanh ăp nhih pah kan dôl lor nchrăp ntrôl dăng ăp trong njrăng, n'gang nuh srê Covid-19.

        Ta du đêt chợ tăch ndơ an nuĭh ƀon lan ta nkual ƀon têh Buôn Ma Thuột, pah kan njrăng, n'gang nuh srê hôm dơi mât lhăt đŏng. Kơt ta Công ty Cổ phần tăch rgâl chợ Buôn Ma Thuột, rnoh nuĭh luh lăp tâm chợ nar lơn ma âk rđĭl đah nar ngăn, yơn  pah kan njrăng n'gang nuh srê hôm dơi uănh khlay đŏng. Aƀaơ ta chợ Buôn Ma Thuột geh nklăp rlău 8.000 nuĭh tăch ndơ. Lĕ rngôch nuĭh tăch ndơ ta chợ hŏ chuh 2 n'glai vaccine njrăng n'gang Covid-19 da dê. Ta ăp mpông luh lăp tâm chợ, Ban mât uănh chợ tâm pă ntŭk an chŏk dak si puh nkhĭt rao kaman n'hanh mbơh ngăch dăng n'hâm suan ma quét mã QR đah ăp nuĭh dŏng điện thoại n'hanh mbơh ngăch dăng n'hâm suan ma si ƀŭt đah ăp nuĭh mô dŏng điện thoại. mpeh pah kan nkoch trêng, chợ Buôn Ma Thuột lĭr, ntrŭp ăp pa no, áp phích mpeh njrăng n'gang nuh srê ta ăp ntŭk âk nuĭh rsong hăn; way nkoch mbơh ăp si ƀŭt mhe tât, ăp nău rgâl mpeh njrăng n'gang nuh srê....wa Nguyễn Duy Quảng, Kruanh Ƀan mât uănh chợ Buôn Ma Thuột an gĭt:

       “Nchrăp Tết Âm lịch bơi tât rnoh năch mbra lơn ma âk, mô dơn nê ndơ tăch bah ăp nuĭh n'hao âk lơn đŏng. Tâm rnôk Tết dja mpôl hên nkoch mbơh ma loa mbro mbơh an năch tâm ban kơt nuĭh gŭ tăch ndơ hŏ lăp tâm chợ ân wăn bok put mbung, gŭ srang ngai n'hanh đăp mpăn njrăng n'gang nuh srê du trong an dŭt uĕh."

        Hôm ta ăp siêu thị, ntŭk tăch ndơ dơh dăch ta nkual ƀon têh, ntơm bah mpông luh lăp, nuĭh kan an ăp ntŭk tăch ndơ, siêu thị đă lĕ rngôch năch puh rao ti nkhĭt kaman, mbơh ngăch dăng n'hâm suan ăp tŏng n'hanh njrăng đă nuĭh ƀon lan gŭ srang ngai rnôk lăp rvăt ndơ. Nkre, ăp siêu thị đă lĕ rngôch ăp nuĭh ƀon lan, nuĭh kơl tăch ndơ wăn bok put mbung n'hanh puh rao ti nkhĭt kaman tâm rnôk rvăt n'hanh rgâl ndơ.

        Tĭng wa Bùi Văn Quân - Giám đốc Trung tâm Siêu Thị Go Buôn Ma Thuột rlău ma rvăt năp ăp tŏng máy weh duh êng săk, dak si puh nkhĭt kaman n'hanh nkual mbơh ngăch dăng n'hâm suan an năch bah năp mpông siêu thị dĭl, siêu thị way lor nchrăp test ngăch Covid-19 ăp pơh an lĕ rngôch ăp nuĭh kan. Ndrel đah nê, ăp nar lôch mông ntĭl mpông, siêu thị ƀư puh nkhĭt kaman lĕ rngôch bah lơ măt siêu thị ma Cloramin B gay njrăng, n'gang nuh srê Covid-19…

       “Lĕ rngôch nuĭh kan rnôk lăp kan ân wăn bok put mbung, ăp ntŭk mâp ngơi na nê̆ đah năch ân geh bil nkrum muh măt bah mprănh dak diu, êng đah ntŭk sŏk prăk ri siêu thị đă ân wăn ndrôm ti gay bah ir geh pah đah lha prăk ƀư jêng ntưp rêng chong cheng. Đah năch rvăt ndơ ri lĕ rngôch năch lăp ân mbơh ngăch dăng n'hâm suan da dê. Rlău ma nê mpôl hên năp du mblâm maý weh duh săk n'hanh geh lĕ ma puh nkhĭt kaman an năch hăn rvăt ndơ đŏng.”

        Uănh năl mpeh nău ăp chợ, siêu thị tĭng ƀư ăp trong njrăng, n'gang nuh srê Covid -19 ta đơn vị, wa Phạm Thị Tuyết Nhung, Mât uănh jrô kan Nghiệp vụ Y dược, Sở y tế n'gor Dak Lak, nuĭh lăp kan nsum tâm mpôl hăn ôp uănh rgop âk n'gâng kan uănh năl:

       “Uănh nsum lĕ rngôch ăp đơn vị tâm rnôk an ƀư ri du đêt đơn vị mô hŏ tât geh ăp si ƀŭt njuăl gĭt, du đêt ntŭk geh dơn gĭt yơn hôm thơ tha đŏng tâm nkô̆ nău an tĭng ƀư, âk ntŭk tăch ndơ tơm rnoh nuĭh luh lăp âk mpưm n'hanh khân păng mô hŏ tĭng jăp lĕ tĭng ƀư 5k n'hanh âk ntŭk tâm rnôk an ƀư hôm njâm mo, mô hŏ lhăt jăp. Lôch rơh hăn ôp uănh dja hŏ nhŭp ti nchŏng kan, ntĭm nti na nê̆ n'hanh ôp uănh tay lĕ rngôch ăp ntŭk hôm rbăn lhơ ri ân nkra bah dĭl n'hanh lôch 10 nar ri mpôl hăn mbra ôp uănh tay n'hanh uănh năl tay lôch jêh geh ma mpôl hăn ôp uănh hŏ hăn rlău".

        Tâm rnôk nuh srê Covid-19 hôm tât krit nji, ăp ntŭk tăch ndơ kơt chợ, siêu thị lah ngoăy tâm ăp ntŭk rŭ hôch geh ma nău ntưp âk. Jêng, rlău ma nău ăp ntŭk tăch ndơ lor nchrăp tĭng ƀư lhăt nău way njrăng n'gang nuh srê, ân geh nău tâm boh bah nuĭh rvăt dŏng ndơ đŏng gay bah ir nău ntưp rêng bah nuh srê lơn lah rnôk Tết Nguyên Đán dôl tât dăch./.

Nuĭh rblang: Điểu Thân