Tâm nklang khlay 4 bri duh nar, bri York Đôn duh hô ngăn, 8 nŭih tâm Trạm mât njrăng bri mrô 1, Hạt Kiểm lâm Vườn Quốc gia York Đôn (Dak Lak) hôm nsôih muih pih, ƀư nau kan “su lơi pih jê̆ geh njrăng”. Wa Nguyễn Hữu Tạo-Groi Kruanh rmôt kan mât njrăng bri Vườn Quốc gia York Đôn nkoch, dôl lah yan prăng bri, nau ŭnh sa bri tât rnoh nkah mrô 5 dŭt n'hâm klach rvê ngăn. Gay ma njrăng, rdâng ŭnh sa, rmôt kan hŏ tâm rgop đah ăp ntŭk êng, pă bơi tât 200 cán bộ, nŭih kan gay ma mât njrăng nau ŭnh sa bri:

‘Dĭng lĕ ăp trạm, rmôt kan ân nkân njrăng ƀư kan tâm măng nar tâm ntŭk mra geh ŭnh sa, ƀư ueh nau kan su pih gay ma nkân njrăng lơi nau ŭnh sa tơm si tĭng ăp ntrong. Kơt lah nơm rklaih lơi ăp ntŭk aơ lạh saơ păng mra ŭnh sa ri nơm su gay ma n’huch oi ŭnh sa, ndrel tât nar ba kơi nơm su ntŭk êng, ndri ma đăp mpăn lah geh nau ŭnh sa bri rêng ntŭk êng ri khuch tât tơm si têh. Tal 2, njêng ndơ gay ma ân păng chtă pih nse tâm nâm bri, gay ma mpa bri sa ân păng rêh”.

Ndrel ma nau kan njrăng rdâng ŭnh sa geh ƀư lam n’gor, ăp mrôt mât njrăng bri ndrle tơm bri kŏ uănh tât nau dơi mpuh n’hât ŭnh. Wa Hồ Văn Lành, Groi Kruanh rmôt kan mât njrăng bri Krông Năng, Buôn Hồ mbơh, rnơm geh nchrăp ueh mpeh nŭih kŏ kơt lah ndơ dŏng ndrel nau njrăng rdâng ŭnh sa tâm ntŭk, rnôk ŭnh sa ta Tiểu khu 299 tâm xã Cư Klông, nkuăl Krông Năng, geh tâm bôk khay 4 geh mpuh n’hât:

‘Rnôk geh ndơn nau mbơh geh ŭnh sa bri, hên hŏ tâm rgop nsum đah Rmôt mât njrăng bri ndrel njrăng, rdâng ŭnh sa bri mrô 3 (tâm Chi cục Kiểm lâm Dak Lak), tơm bri ndrel n’gâng kan nkual, ƀư nau rgum nŭih geh rlau 40 nŭih ƀư hăn mpuh n’hât lơi ŭnh. Ăp nau kŏ kơt tĭng nau kan 4 tâm ntŭk gay ma mpuh n’hât ŭnh, đah nau nsôih bah nô, oh ri ăp ntŭk ŭnh sa geh n’hât, mô geh ƀư jêng nau khuch khat hô tât bri”.

Tĭng wa Nguyễn Quốc Hưng-Kruanh n’gâng kan mât njrăng bri Dak Lak, rnôk aơ, geh n’gul rnoh neh bri bah n’gor, tâm ban 237 rbăn ha dôl mra ŭnh sa hô. Tâm nê, 189 rbăn ha geh ŭnh sa têh ndrel rlau 480 ha ŭnh sa dŭt klach rvê ngăn. Ndri ma, rmôt kan mât njrăng bri, tơm bri mô lah UBND ăp xã rgum ƀư nau kan njrăng, rdâng ŭnh sa bri. Wa Nguyễn Quốc Hưng lah rjăp:

‘Ntơm bah kơi tết năm mhe tât rnôk aơ, hên hŏ nchrăp ndâk ăp nau nchrăp0 ƀư nau kan tâm ban ntơm ba lơ tât ăp ntŭk mât njrăng bri bah nkuăl, 3 rmôt mât njrăng bri hăn ndal gay ma tâm rgop nsum đah ăp nkuăl ƀư nau kan njrăng, rdâng ŭnh sa bri.

Ngăn lah, tâm rnôk yan vai bôk khay 4 aơ, N’gâng kan mât njrăng bri n’gor kŏ ndâk rmôt kan mêt uănh gay ma ndal uănh, bonh đă ăp tơm bri tâm ăp nkuăl kơt: Ea Súp, Ea Kar, M’Drak, Buôn Đôn, Krông Bông, Lắc...ân geh đăp mpăn nau njrăng, rdâng ŭnh sa bri. Hên kŏ mêt uănh nau nchrăp ndơ dŏng, nŭih kan, tơm mât bri gay ma rdâng nau tât mhâm ƀư lah geh khuch ri ân geh nau kan gay ma mpuh n’hât ŭnh sa ân năn ngăn”./.