Tĭng nău mbơh bâh ntŭk kan nchroh lor mih sial ngih dak, tâm ăp nar ba năp, ta n’gor Đăk Lăk geh mih têh, du đê̆ geh ntŭk dŭt têh, nău phŭt sial mbra geh dak rchoh ta ăp dak me jê̆ n’hanh rluh neh ta ăp nor yôk ta 11 nkuăl bâh n’gor. Tâm săm ƀŭt ntrŭnh mbơh, ntuk kan tuch tăm mât rong n’hanh hun hao ƀon lan n’gor Đăk Lăk đă UBND ăp nkuăl, nkuăl têh, nkuăl ƀon têh uănh nđôi na nê̆ nău mbơh nchroh lor, mbơh geh mih têh, dak buk, dak băm, rluh neh, mbơh ngăch năn, tŏng ăp tât ăp gâl kan n’gâng kan, nuĭh ƀon lan geh gĭt tât gay ma leo kan njrăng rdâng, tâm rdâng đah nău tât bah ir geh nău khuch khat. Ăp ntŭk ta nkual mbơh lor nău tât bâh mih sial, kơt nkuăl Lăk, Krông Ana, Krông Bông, Ea Sup, an geh ơm mbơh tơih mpôl kan uănh nđôi, uănh năl tay ta ăp nkual ƀon lan dăch dak me dak diăng, nkual rđung, mbra geh dak buk âk, dak rchoh, rluh neh gay ma leo kan an ueh aih trong hoch dak, leo ƀư ntrơn ƀon lan ta nkual mbra geh nău tât gŭ ntrơn ta ntŭk đăp mpăn.