Dôl rwăt ƀanh ta ntŭk tăch ƀanh trung thu ta trong Lê Thánh Tông, nkual ƀon têh Buôn Ma Thuột, yuh Phùng Thị Thúy Hạnh, phường Tân An, nkual ƀon têh Buôn Ma Thuột nkoch, ăp kon yuh dŭt ŭch ƀanh trung thu. Năm aơ, ƀanh âk ntil đah nău moh n’hanh ntô lĭr, yơn rnăk wâl yuh hôm e ŭch ăp ntil ƀanh way ơm, geh moh êng ta ntŭk tăch.

   Rnôk gâp rwăt ƀanh trung thu ri gâp mbra săch ăp ntô lir nsing nơm, jŏ ta ntŭk tăch gay đăp mpăn ntop ntô lĭr uĕh n’hanh kah đŏng.

Lĕ geh jŏ năm tăch ƀanh trung thu rlău 30 năm, yuh Nguyễn Thị Tuyết Mai, ta phường Tân Lợi, nkual ƀon têh Buôn Ma Thuột an gĭt, ƀanh trung thu way geh nar dŏng đêt, jêng yuh mbra mô nglăp rwăt ndơ sĭt du rơh ma pă jêng âk rơh. Nău aơ nkre dêr nău rmeh, nkre đăp mpăn uĕh kah ƀanh:

Gâp nglăp ndơ lah gâp mô nglăp du tơ̆, ma gâp nglăp tĭng rơh jêng ƀanh gâp hôm e mhe na nao gay năch sa đăp mpăn. Nău nĕ lah kơl lor bôk năp.

Ta siêu thị Go Buôn Ma Thuột, ntŭk tăch ƀanh trung thu dơi siêu thị dăp nsum đah nkual tăch play gay ƀanh dơi mât prăp tâm nđik uĕh ngăn. Wa Bùi Văn Quân, Giám đốc Siêu thị Go Buôn Ma Thuột an gĭt:

Mpôl hên, uănh nđôi uĕh kah bah nău nglăp ndơ n’hanh mpla nsơ tăch đăp mpăn nđik mât prăp. Aƀaơ ƀanh tâm nău dơi mât uănh bah 25 tât 27 độ n’hanh mpôl hên pă tăch ăp ntil ndơ ƀanh trung thu n’hŭch chất mât prăp.

Đăp mpăn săk soan an nuĭh dŏng, trong kan mât uănh đăp mpăn răk ndơ ngêt sa bah năp, tâm n’hanh jêh Tết trung thu dơi n’gor Dak Lak uănh khlay. Tĭng nĕ UBND n’gor lĕ ndâk njêng 2 rmôt uănh nđôi ăp nău kan mpeh đăp mpăn ndơ ngêt sa rơh Tết Trung thu năm 2024 ta nkual ƀon têh Buôn Ma Thuột, nkual têh Buôn Hồ n’hanh ăp nkuăl Krông Pắc, Ea Kar, Cư kuin n’hanh Lắk. Ndrel đah nĕ Ntŭk mât uănh ntŭk tăch n’gor Dak Lak n’hanh ăp nkuăl, nkual têh, nkual ƀon têh ndâk njêng đŏng ăp mpôl hăn uănh nđôi gay ngăch nking n’gang, rmal ăp nău tih tâm nău nkra njêng, tăch ăp ntil ndơ rhŏ an rơh Trung thu năm aơ.

Tâm rnôk hăn uănh nđôi ăp rmôt lĕ rgum uănh nđôi mpeh ndơ ƀư, nău dŏng mât prăp ndơ ngêt sa, chất ntop kơl nkret gâm ndơ ngêt sa, nău dơi đăp mpăn răk kloh ndơ ngêt sa tâm nkra njêng, nkret gâm, mât prăp ndơ ngêt sa; uănh nđôi mpeh tu tơm, ntŭk nkra njêng, uĕh kah ndơ ngêt sa, n’hŭch dŏng bah ndoh ndơ; sam ƀŭt sam tra ndơ, rnoh khlay... Wa Vương Minh Sơn, Groi Cục trưởng Cục mât uănh ntŭk tăch n’gor Dak Lak an gĭt, ăp rmôt hăn uănh nđôi he lĕ tâm rgop nkoch trêng tât ntŭk nkra njêng, tăch ăp nău ntrŭnh bah pháp luật mpeh tăch ndoh ndơ n’hanh tŏng ăp đăp mpăn ndơ ngêt sa, nău tĭng nău ntrŭnh mpeh mbơh tâm di, mbơh rgum ndơ ngêt sa n’hanh nău ntrŭnh mpeh uĕh kah ndoh ndơ.

Mpôl hên ntĭm rđău ăp ntŭk kan nghiệp vụ rgum tâm sam ƀŭt sam tra bah an saơ tu tơm nkra njêng. Tal 2 lah ntô lĭr ndoh ndơ, tâm nĕ an nchih tŏng ăp âk nkô̆ nău nchih ntô lĭr, bôk năp ngăn lah dăn uĕh kah, nar dŏng, nar nkra njêng, nar mât prăp. Lah saơ rmal tĭng di nău ntrŭnh bah pháp luật.

Jêh hăn uănh n’hêl na nê̆, tât aƀaơ rmôt mât uănh ntŭk tăch ndơ mrô 1 lĕ saơ 2 ntŭk tăch ta nkual ƀon têh Buôn Ma Thuôt geh nău ƀư tăch ndoh ndơ mô gĭt tu tơm, ntŭk nkra njêng, geh: 42 ndơ ƀanh trung thu (ntil 500g/1 mlâm), 50 kg táo chăng pâr kro, rlău 2.300 ndơ pâl kon se ăp ntil geh nău tâm lơh (phao, đao, pêh, na), đah dĭng lĕ khlay rlău 33 rkeh prăk. Lĕ rngôch rnoh ndơ nkoch bah lơ lah ndoh ndơ nglăp ntŭng, mô geh sam ƀŭt sam tra tâm di pháp luật. Rmôt lĕ ƀư rmal tih hành chính đah 2 ntŭk tăch aơ n’hanh đă tâp bôr lĕ rngôch rnoh ndơ tih.