Wa H’Hương H’Wing, rnoi Êđê, ta ƀon M’Blốc B, xă Krông Jing, nkuăl M’Đrắk, n’gor Dak Lak âk năm mro dơi nsing nơm săch ƀư bí thư Chi bộ. Ndrel đah nău nkoch trêng, rgŏ jă ƀon lan ƀư tĭng uĕh ăp nău ntrŭnh, nău kơl bah Đảng n’hanh Ngih dak, wa H’Hương hôm lah ntoh lư tâm rgâl ntil tơm tăm, mpa rong, hun hao wăng sa rnăk wâl. Wa nkoch, knơm râng ăp bôk nău kan ntĭm nti n’hao nău blău an cán bộ rnoi mpôl đêt ta ntŭk, wa lĕ dơi nti âk bôk nău kan uĕh, ngăn ngên rhŏ an nău bah bah nơm.

“Trong kan jŭt n’hŭch ach o ta ƀon lah trong kan dŭt khlay. Ƀon rgum tâm nghị quyết kruanh ntĭm rđău cán bộ êp đah ƀon lan, tĭng ƀon lan, ntĭm an ƀon lan hun hao wăng sa, gĭt dŏng khoa học kỹ thuật an mât rong ndrôk, mât sŭr. Gĭt nar khay gay srih tăm an ban yan ri ƀon lan mư dơi jŭt jăng ach o”.

Knơm gĭt wât jru nău rêh, nău way ơm bah ƀon lan nơm, ntop đah nău janh mĭn, janh ƀư, janh trok dơn nău kan, ăp các bộ đảng viên nuĭh rnoi mpôl đêt lĕ ƀư tĭng uĕh nău kan dơi pă. Tă bah nĕ, rgop mât rnă njrăng đăp mpăn ta ntŭk, ntrôl dăng trong kan n’hŭch ach o, hun hao wăng sa-rêh jêng bah ta ntŭk. Wa Trần Hồng Tiến, Bí thư nkuăl ủy Krông Pắk uănh dơn.

 “Đah cán bộ mpôl hên săch ăp đồng chí cán bộ mom nuĭh rnoi mpôl đêt ta ntŭk blău ri ndơ̆ sĭt ư ăp naư kan khlay bah ƀon lan ri dơi saơ jêh uănh nđôi, uănh lah ri mpôl hên saơ ăp đồng chí ntơm jêh nău kan dơi jao n’hanh dơi ƀon lan nsing nơm".

Tâm lam n’gor Dak Lak aƀaơ, rnoh cán bộ, công chức, viên chức lah nuĭh rnoi mpôl đêt geh rlău 13%. Tiến sĩ Nguyễn Thành Dũng, Hiệu trưởng Ngih sam ƀŭt Chính trị n’gor Dak Lak an gĭt, cán bộ nuĭh rnoi mpôl đêt dơi nta an nti n’hao prêh nău way kan n’hanh lý luận chính trị.

 “Tâm 10 năm bah năp, rnoh nuĭh nti rlău 25.000 nuĭh nti, tâm nĕ êng nuĭh nti nuĭh rnoi mpôl đêt rlău 4.500. Aơ lah săk rnglăy ntĭm nti bah ngih sam ƀŭt lĕ rgop an ntĭm nti nuĭh kan uĕh kơl an gưl ủy ăp ngih pah kan ntŭk kan ndâk njêng rmôt cán bộ bah nơm uĕh blău săk rnglăy lơn”.

Tĭng wa Lê Nam Cao, Groi Trưởng Ban Tổ chức N’gor ủy Dak Lak, mĭn lah ndâk njêng, hun hao rmôt cán bộ, đảng viên, công chức, viên chức rnoi mpôl đêt lah nău kan khlay bah trong kan cán bộ, n’gor lĕ tĭng nghị quyết Đại hội 13 bah Đảng n’hanh ăp Nghị quyết bah n’gor, mbơh ƀư ăp trong tâm ban hăn ndrel đah nău an ăp nău kơl tâm di. Nău aơ lĕ jêng n’hâm soan dăng, đăp mpăn ƀư tĭng ăp nău rƀŏng mpeh ndâk njêng rmôt cán bộ, công chức, viên chức nuĭh rnoi mpôl đêt. wa Lê Nam cao an gĭt:

 “Ndâk njêng ăp ntŭk kan nău kan tâm trong chính trị tâm nĕ kơl lor ăp ntŭk kan khlay an cán bộ rnoi mpôl đêt gay săch dŏng cán bộ rnoi mpôl đêt. N’gor lĕ ƀư tĭng nău kơl săch đah oh kon nuĭh rnoi mpô đêt”.

Tĭng nghị quyết Đảng bộ n’gor Dak Lak rơh tal 17, năm kan 2020-2025, trong kan hun hao cán bộ, đảng viên nkual rnoi mpôl đêt dơi uănh mĭn tay. N’gor nsrôih tât năm 2025, rnoh cán bộ, công chức, viên chức nuĭh rnoi mpôl đêt tâm dĭng lĕ cán bộ, công chức, viên chức lam n’gor geh 15% let lơ./.