VOV4.M'nông: Trong nchrăp pơk nkra têh hvi tay trong Tỉnh lộ 1 rơh 2 (ntơm bah km 49 tât km 62 nthoi nkuâl Ea Súp đah Buôn Đôn) geh lĕ rngôch rnoh ntuh kơl bơi 84 rmen prăk. Aơ lah trong nchrăp an ƀư lor gay hun hao wăng sa- rêh jêng kon nuĭh nkual n'har bri, yơn lah ăp nuĭh tơm ƀư ndranh ƀư mô tŏng nău dơi đăp mpăn hăn ntung trong rŭ hôch geh ma nău prah si mok.

       Yuh Hoàng Thị Tiến, jay meng trong Tỉnh lộ 1, xã Cư Mlan, nkuâl Ea Súp nkoch, ntơm bah rnôk nuĭh tơm ƀư ndranh tât ƀư trong bah năp jay ri nkual dja way geh roh đăp mpăn hăn ntung trong. Ăp công nhân ƀư trong, n'hong dak sor mô saơ geh pâng pla nchih gay ma drăng rse mô lah nchih mbơh klach rvê. Jêng, nkual dja hŏ geh âk tơ̆ preh rŭp ndeh hăn trong. Dŭt mhe aơ prah rŭp ndeh ƀư du hê nuĭh bu klô bơi ma khĭt. Yuh Hoàng Thị Tiến nkoch:

       “Ntơm bah jay gâp hăn tât thị trấn hŏ geh 4 – 5 tơ̆ prah rŭp ndeh hôm, êng bah năp jay gâp lah 3 tơ̆ hôm. Uănh nsum nơm geh n'gâng kan đă nuĭh tơm ƀư ndranh ndăn ƀư ngăch lơn, na nê̆ lơn, lah an trong me, trong dak sor kơt aơ ri klach rvê ngăn.”

         Hôm wa Trương Kim Hoàn, jay meng trong Tỉnh lộ 1 hăn rlău thị trấn Ea Súp an gĭt đŏng, mô dơn ƀư roh đăp mpăn hăn ntung trong, ma nâp uĕh ta du đêt gâl trong hăn mô uĕh đŏng. Ntĭt kơt ndrŭp kŭp n'hong dak sor hoch bar ding trong mhe an nuĭh n'hanh ndeh rklư jot hăn rlău hŏ chah hôm. Uănh năl ma măt ngăn saơ đŏng rnoh tâm krêp đah loih n'hanh bê tông dŭt sơh chrai. Wa Trương Kim Hoàn an gĭt:

        “Ăp bôk ndrŭp tanh ri mpeh tơm ƀư trong khân păng rdeng tât kŭp n'hong dak sor bah năp jay, he njŏ ma ndeh honda lah păng chah đang êng dĭl. Ăp bôk ndrŭp păng mô nâp jêng njŏ hăn ma ndeh lah păng chah êng dơm, uănh ma măt ngăn saơ loih mô tâm krêp đah bê tông ôh. Bôk ndrŭp dja gâp saơ mô nâp ngăn.”

          Tĭng wa Nguyễn Xuân Hà – Kruanh UBND xã Cư Mlan, nchrăp ƀư pơk hvi tay trong, nkra têh uĕh tay Tỉnh lộ 1 hăn rlău xã Cư Mlan jong 1km, dơi an ƀư ntơm bah bôk năm 2021. Gâl trong dja tă bah Công ty TNHH Hoài Ân, nhih pah kan ta nkual ƀon têh Buôn Ma Thuột ƀư. Tât rnôk dja, măt trong me hŏ prah dak chai lôch jêh, ăp ndơ hôm ƀa ƀă kơt, rmlông dak sor, n'gâng chŭt, păng nchih mbơh… hôm dôl tâm rnôk ƀư đŏng.

        Wa Nguyễn Xuân Hà năl, kruanh UBND xã dơn geh âk nău lah bah nuĭh ƀon lan mpeh nău tơm nuĭh ƀư ndranh ƀư mô đăp mpăn nâp uĕh mpeh trong hăn. UBND xã hŏ rgum ăp nău nkoch lah bah nuĭh ƀon lan njuăl tât gưl bah lơ đă ăp nuĭh tơm ƀư ndranh tĭng ƀư ăp tŏng ăp trong nkra mât đăp mpăn hăn ntung trong tâm ban kơt ƀư nâp uĕh gung trong đŏng:

        “Lôch tĭng groi nđôi ri saơ công ty Hoài Ân ƀư rmlông n'hong dak sor mô lah n'gâng chŭt meng trong, păng nchih mbơh mô đăp mpăn hăn ntung trong, geh ma nău prah si mok ndeh. UBND hŏ dăn đă tât Jrô kan wăng sa ntŭk ntô nkuâl, Ƀan mât uănh trong nchrăp kan n'gor đă nuĭh tơm ndranh ân ton đăp mpăn tŏng ăp nău dơi tâm rnôk ƀư ntung trong gay nuĭh ƀon lan rsong hăn đăp mpăn.”

        Trong nchrăp pơk hvi, nkra têh uĕh tay Tỉnh lộ 1 rơh 2 (ntơm bah km 49 tât km 62 nthoi nkuâl Ea Súp đah Buôn Đôn) geh lĕ rngôch rnoh ntuh kơl 84 rmen prăk. Trong ƀư tâm rgop nsum lah:  Công ty TNHH Hoài Ân, Công ty TNHH rdâk njêng ntung trong Việt Đức, Công ty TNHH rdâk njêng ntung trong Đức Nguyên n'hanh Công ty CP Phát triển Đại Việt ƀư, nuĭh ntơh măt tơm ntuh kơl lah Ƀan mât uănh trong nchrăp kan ntuh kơl rdâk njêng ntung trong hăn n'hanh tuch tăm mât rong hun hao ƀon lan Dak Lak.

Tât rnôk dja, ăp tơm nuĭh ƀư ndranh hŏ ƀư dơi 80% ăp ndơ ntrŭp trong nchrăp kan.  Aơ lah trong nchrăp kan an ntuh kơl lor gay hun hao wăng sa- rêh jêng kon nuĭh ta nkual n'har bri bah n'gor n'hanh geh rnoh ntuh kơl tât pơh pham jât rmen prăk. Tơm nuĭh ntuh kơl ân rmal lhăt ăp tơm nuĭh ƀư ndranh dơn ƀư "rtil" tâm ban kơt groi nđôi lhăt đŏng, ƀư lĕ n'hâm suan lơn ntrŭt ntrôl ăp tơm nuĭh dơn ƀư ndranh, gay đăp mpăn hăn ntung trong der bah prah rŭp si mok mbra geh tât tâm ban kơt nâp uĕh ăp ndơ ntrŭp dŏng an trong./.

Nuĭh rblang: Điểu Thân