VOV4.M'nông: Đah nău ăp nar năl geh ntơm bah 800 tât 1 rbăn nuĭh ji Covid-19 ƀư lam trong kan dak si tâm dâng bah nkual ƀon têh Buôn Ma Thuột, n'gor Dak Lak lhăt bêng ir. Nkual ƀon têh Buôn Ma Thuột dôl nsrôih ndơ̆ luh ăp trong nkra tâm di gay pah kan ntop kơl săm F0 ta jay geh nău tam.  

          Yuh Võ Thị Thủy, nuĭh kan dak si ta phường Ea Tam, nkual ƀon têh Buôn Ma Thuột, n'gor Dak Lak an gĭt, ăp nar rlău aơ, mpôl kan dak si tâm dâng mbrôn suan đah nău kan dơn âk nău kan. Mô kơp măng nar, rnôk ăp tơ̆ nteh điện thoại ân hăn tât jay ntop kơl ăp nuĭh kan dak si Trạm Y tế phường Ea Tam hôm ngăch tât đŏng.

       “Rnôk bu geh mpơl ji, SPO2 ta nâm 96 ri he nsoh ndơ ndrôm săk hăn tât kơl ntrŭp ô xi an n'hôr oxi du ƀlât ntĭm nuĭh tâm rnăk rƀet ô xi. Aƀaơ ma gŭ ta nê jŏ bar pe mông ri mô geh nuĭh ma gŭ kan, moh ntil mông hăn lĕ, 2-3h ôi hăn đŏng. Rnôk F0 geh nău ŭch ntop kơl ri tât dĭl. Rnoh F0 bah phường hao âk ri gâp saơ lah rlău nău dơi kan đah nuĭh kan dak si xã phường tâm rnôk aƀaơ."

        Tĭng wa  Ngô Mạnh Cường, kruanh Trạm y tế phường Ea Tam, nkual ƀon têh Buôn Ma Thuột, Ea Tam lah ntŭk geh rnoh nuĭh rgum âk đah rlău 36 rbăn nuĭh n'hanh lah ntŭk năl geh rnoh nuĭh ntưp Covid -19 âk. Ntơm bah rnôk an ƀư săm F0 ta jay tât aƀaơ phường hŏ kơl săm an rlău 1.300 nuĭh F0, tâm nê geh bơi 400 nuĭh hŏ săm bah, dơn geh 6 nuĭh ân tât rdeng nhih dak si bah lơ dơm. Trạm Y tế phường Ea Tam hŏ njêng rmôt Zalo ntop kơl, mbơh nti ăp nuĭh geh ntưp ta phường. lôch nê, ăp nar, nuĭh ƀon lan mbra dơi cán bộ dak si ntĭm nti trong mât chăm, tĭng groi nđôi, gŭ săm ta jay. Rnôk moh geh nău mpơl ji, djăt ma nuĭh ƀon lan mbơh lah mpôl kan dak si bah phường tât kơl ngăch dĭl. Wa Ngô Mạnh Cường lah:

       “Lĕ rngôch ăp nuĭh ntưp ân dŏng râng tâm rmôt nê, djăt ma saơ rgâl jêng ji jru lah hăn tât dĭl tâm rmôt geh nău dơh mha êng kơt nê̆ he ân mât uănh dơi dŭt uĕh. Ntĭt kơt âk nău mbơh njrăng lor, video nti n'hôr aơ to geh rmôt F0 he djăt ma đă nuĭh ƀon lan nti ƀư tĭng video nê nti n'hôr ri kônh wa djăt ma tĭng ƀư dơm, nê lah trong nkoch trêng dŭt uĕh mô dơi hăn tĭng jay nti n'hôr ôh. Gŭ tâm rmôt gay kônh wa uănh saơ nô nău nsum, kop duh, ji siăk, lhăt n'hâm nê lah nău mpơl ji ngăn, lĕ dĭng nuĭh ji kop, ji siăk, lhăt n'hâm da dê jêng bu mô rvê mpeh nău mĭn. Aƀaơ ân dŏng công nghệ, lah mô geh công nghệ ri lêt ngăn”

Tĭng bác sĩ Võ Minh Hùng, Giám đốc Trung tâm y tế nkual ƀon têh Buôn Ma Thuột, kơp tât rnôk aƀaơ, ta nkual ƀon têh Buôn Ma Thuột dôl an gŭ rgum êng, gŭ săm ta jay an bơi 7.000 nuĭh ntưp Covid-19. Geh ăp phường bơi tât 1.000 F0 dôl săm ji ta jay. Bol ma ăp trạm y tế xã, phường hŏ dơi ntop tay nuĭh kơl kan lah ăp nuĭh râng êng yơn tơm nuĭh kan dôl rbăn lhơ ta nău năp ntưp âk nuĭh ji ƀư nău kan lơn ma jêng lhăt bêng ir, jâk r'ah âk.

      “Nkô̆ nău nuĭh kan bah Trạm y tế, oh nô kan dak si bah ăp xã phường bol hŏ geh nău tât râng êng bah nuĭh kan yơn mô dơi tŏng ơm mpŏng lah nuĭh ƀon lan rnôk năl ntưp F0 ri ân mbơh ta ntŭk, tĭng ƀư 5k n'hanh ƀư mât chăm êng n'hâm suan ta jay. Rnôk moh geh nkô̆ nău n'hâm suan mô lah geh rgâl ji jru ndal ri ôp tât đah ntŭk kan dak si tâm dâng dĭl gay mpôl hên mbơh nti gay tĭng ƀư jăp pah kan mât chăm n'hâm suan an ăp nuĭh ntưp F0 dôl săm ta jay. Mpôl hên hŏ rđău đă lĕ rngôch ăp nuĭh kan dak si tâm lam nkual ƀon têh uănh khlay tâm pă n'hanh mbơh nti ngăch an ăp nuĭh ntưp F0 n'hanh mô an nuĭh F0 mô dơi ôp tât đah Trạm y tế”.

        Kơp tât nar 2/3 nkual ƀon têh Buôn Ma Thuột năl geh 15 rbăn nuĭh Covid -19, tâm nê bơi 8.500 nuĭh săm bah, 36 nuĭh ji khĭt. Nkual ƀon têh Buôn Ma Thuột lah ntŭk geh rnoh nuĭh ji dŭt âk bah n'gor Dak Lak đŏng.

Ta năp nô nău dja, Trung tâm y tế hŏ lor nchrăp rđău đă ăp Trạm y tế xã, phường n'hao dăng pah kan groi nđôi, ôp uănh, ƀư test ngăch đah ăp nuĭh geh ma nău ntưp âk gay năl nuĭh F0 gay gay ngăch n'hanh der bah ntưp rêng lam ƀon lan; an kon se mầm non rlu nti n'hanh manh rlu hăn nti na nê̆ ta nhih nti đah kon se nti tiểu học, THCS, THPT (mô kơp kon se nti jrô 9 n'hanh jrô 12); nkre ntrôl dăng pah kan nkoch trêng an nuĭh ƀon lan mpeh pah kan njrăng n'gang nuh srê kơt tĭng ƀư nău mbơh 5K.

        Êng đah n'gâng kan dak si, gay tŏng nuĭh kơl kan an ăp trạm y tế xã, phường rnôk nuĭh ntưp ji hao âk ngăch, rnoh nuĭh F0 gŭ săm ta jay, Trung tâm y tế hŏ n'hao âk nuĭh kan an ăp nhih pah kan dak si, rđău đă ăp xã, phường dăp rgum lam lĕ rngôch ăp Trạm y tế manh ntăm ƀư. Na nê̆, ăp trạm y tế mbra kơi ntop bah 4-6 nuĭh kan lah ăp nuĭh ŭch râng êng, ăp cán bộ dak si rlu ranh mô lah ntŭk kan dak si êng bah dih ta ntŭk./.

Nuĭh rblang: Điểu Thân