VOV4.M’nông: Rơh rlau aơ, nkuăl ƀon têh Buôn Ma Thuột, n’gor Dak Lak rgum ntrŭt dăng nau dĭng nau kan mbơh nkoch mhe, rƀŏng tât ndâk njêng n’gâng kan điện tử. Ntrơn rgâl mrô tâm nkuăl ƀon têh hŏ rgop nau n’hao nau săk tam bah nau kan ntŭk kan ngih dak, n’hao nau ŭch tâm di nuih n’hâm ƀon lan, ntŭk pah kan.

            Rgâl ma tât âk mpông, âk ntŭk kan gay ma rklaih nau kan hành chính kơt ntơm nơh ri rnôk aơ, âk nŭih ƀon lan nkuăl ƀon têh Buôn Ma Thuột hŏ mơng đah nau kan du mpông tâm xã, phường mô lah ntŭk ndơn săm ƀŭt ndrel mplơ̆ săm ƀŭt hành chính nkuăl ƀon têh Buôn Ma Thuột tâm mrô 27 Trường Chinh, nkuăl ƀon têh Buôn Ma Thuột. Nŭih ƀon lan rnôk tât mra geh ntĭm mbơh ndrel mbơh kloh ăp nau kan, nau ƀư. Nau geh rklaih jêh nê geh nchrăp nar kloh, ntơm bah nê nau pah kan đah cán bộ ndrel ƀon lan geh nơih lơn. Nô Trần Văn Nguyên, nŭih pah kan nhân hàng tâm phường Thống Nhất, nkuăl ƀon têh Buôn Ma Thuột, n’gor Dak Lak vay lah nŭih hăn pah kan tâm ntŭk du mpông, nkoch nau:

            ‘Tâm rnôk srê ji ri ntŭk kan ngân hàng hăn ƀư nau kan ân đăp mpăn, rnơm nau kan mrô nkre tâm rgop ƀư săm ƀŭt nkre dăp rgum mông nar ƀư nau kan hŏ tât rnôk ƀư gay ma geh nau dăp rgum mông nar tât sŏk mrô ndrel ndơn săm ƀŭt kan”.

            Gĭt năl nau ƀư nau kan mrô, n’hao rnoh ŭch dŏng bah ƀon lan, ntŭk kan, rmôt kan mpeh nau kơl an hành chính công lah nau ueh ngăn tâm nau kan ndậk njêng đô thị blau, nkuăl ƀon têh Buôn Ma Thuột mô rlu rgâl mhe mpeh nau kan, ntrơn rgâl nau nau mât, nau rđau, ntrŭnh ƀư ăp nau kan bah ntŭk kan hành chính. Gĭt dơi nau kan bah cán bộ, công chức tâm nau ƀư nau rjăp, nau kan geh n’hao. Nau nâp nau pah kan ndơn ndrel rklaih săm ƀŭt ƀư kan, đăp mpăn nau kan geh n’hao prêh, nar rjklaih ƀư geh rhuăt geh ndrel đăp mpăn, ngăn lah geh âk săm ƀŭt geh mplơ̆ sĭt lor nar ndrel mô geh săm ƀŭt ƀư rlau nar nchrăp. Bah nê, rgop nau khlay tâm nau n'hao nau săk tam bah nau kan ntŭk kan hành chính. Yuh Ninh Thị Thanh Thảo, cán bộ Jrâu kan Tài chính Kế hoach, Nkuăl ƀon têh Buôn Ma Thuột, n'gor Dak Lak, ngơi:

            ‘Kơt dŏng tâm roh 3,4 nŭih ƀon lan knŭng gŭ tâm ngih nộp Online jêh ri njoăl tâm tảng Web du mpông, cán bộ dŏng nau nkoch mbơh nau mhe gay ma ndơn săm bŭt jêh nê rklaih nklăp 3 nar, jêh nê nơm plơ̆ ân ƀon lan bah nau kan ƀư bưu chính công ích, bưu điện gay ma trok ân ƀon lan”.

            Tĭng nau wa Vũ Văn Hưng, Kruanh UBND nkuăl ƀon têh Buôn Ma Thuột, ngor Dak Lak. Âk năm rlau aơ, nkuăl ƀon têh hŏ ntuh kơl tu tơm ueh mhe ntŭk kan ndơn ndrel plơ̆ nau geh jêh rnôk rklaih nau kan hành chính gay ma pơk trong nơih mpeh nau kan ƀon lan, pơk trong nơih ân n’gâng kan ƀư nau ntrơn rgâl mrô ăp ntil. Nau geh gay geh uănh rnoh mrô ntrơn rgâl bah n’gor Dak Lak năm 2020 yor UBND n’gor mbơh ân saơ, rnoh ntrơn rgâl mrô nkuăl ƀon têh Buôn Ma Thuột geh rnoh điểm 187,67 (tâm nê, rnoh điểm prêh ngăn rđil ăp nkuăl tâm n’gor. Aơ lah nau gay ma n’gâng kan nkuăl ƀon têh lŏ ntuh kơl gay ma ntrơn rgâl mrô ân geh kơt nau nchrăp luh. Wa Vũ Văn Hưng mbơh: Nkuăl ƀon têh dôl ma ƀư dŏng nau ntrơn rgâl mrô đah nau kan nsum gay ma ăp nhoat ƀư ueh lơn nau ŭch bah ƀon lan, ntŭk kan tâm rnôk ntrơn rgâl mrô rgop nau ntrŭt dăng hun hao đô thị tĭng trong ueh mhe:

            ‘Ntŭk ntu ƀư nau kan nkoch mbơh nau bah nkuăl ƀon têh rnôk aơ hŏ geh ntuh kơl, nchrăơ ueh tŏng ăp nau dơi geh nchrăp luh. Ăp ntrong ƀư nau kan ueh mhe ân ƀon lan kŏ geh ƀư. Ngăn lah, nau kan du mpông bah nkuăl ƀon têh ndrel 21 xã, phường hŏ geh nkra đah ăp ntrong kan máy móc mhe gay ma râng kơl nchră ƀư bah ƀon lan geh tât nau kan rklaih săm ƀŭt ƀư nau kan. Nau ƀư kan tât năm 2025 phung hên mra geh jêng nau kan n’gâng kan mrô”.

            Buôn Ma Thuột đah âk nau geh dơi geh năl lah mra jêng đô thị tơm khlay bah nkuăl Tây Nguyên, nkuăl ƀon tên Buôn Ma Thuột kuăl jă ăp gưl uỷ đang, n’gâng kan, ngăn lah nŭih dâk bôk nchrăp ntrŭt dăng nau kan kơt dŏng nau kan nkoch mbơh nau, pơk luh ăp nau ntrơn rgâl rjăp ngăn tă bah nau ndâk njêng n’gâng kan điện tử gay ma pơk trong ân đô thị ueh mhe, n’hao nau gĭt ân công chức, viên chức, ăp ntŭk kan, rmôt kan ndrle nŭih ƀon lan mpeh nau geh dơi bah nau dŏng nau nkoch mbơh mhe tâm nau kan mât, rđau nau kan ndrel hun hao văng sa, rêh jêng./.

Nŭih rblang: H’Thi