VOV4.M’nông: Đah nău kơp dơn nklăp 500 nuĭh tâm 10 nar bôk năp bah khay 1, nkuăl Lắk lĕ jêng nkuăl ngoăy dơm bah n’gor Dak Lak ta rnôk aƀaơ lah nkual chăng-nkual geh dŭt âk. Bah năp nu nău jêr jŏt bah srê Covid-19, ăp rmôt kan dơi kan bah nkuăl Lắk lĕ ngăch nchoeng n’gang, joi n’hanh nchoeng n’gang ăp nkual geh tât, dah nău nsrôih n’hŭch rnoh nuĭh ntưp, jŭr rnoh srê, đăp mpăn kônh wa dơi wơt Tết Nguyên đán đăp mpăn.

Jêng F1 rnôk geh mâp dŭt êp đah nuĭh ji ta xă Đăk Nuê, yuh H’Phil Nêung, ta ƀon Bàng, xă Đăk Liêng, aƀaơ dôl pah kan ta xă Đăk Nuê an gĭt, bôk năp yuh rvê, jêh nĕ yuh kuăl điện an Ngih dak si xă n’hanh dơi nai dak si ta ngih dak si ntĭm trong nkhah êng ta jay kơt ăp trong njrăng n’gang srê, yuh lĕ ƀư tĭng an nơm n’hanh an lĕ ngih. Knơm nĕ, lĕ ngih yuh lĕ đăp mpăn rlău ăp nău rvê bôk năp. Yuh H’Phil an gĭt tay, jêh rơh dăch jêng nuĭh ji, yuh n’hanh rnăk wâl lĕ wât lơn mpeh nău klach bah chôt srê n’hanh kloh lơn mpeh ăp trong njrăng n’gang srê.

          “Rnôk gĭt he mâp đah F0 kơt nĕ ri rvê yơn ma rwăt ndơ tơm dak si sĭt ƀư dâl, n’hôl 1 nar 2 rơh ôi n’hanh kêng măng, jêh nĕ tỏi he gâm dak duh jêh nĕ rhêp. Oh ƀư kơt nĕ saơ tam, oh saơ rnăk wâl đăp mpăn”.

Nkuăl Lắk dôl n’hao lam hvi vaccine njrăng Covid-19 an nuĭh ƀon lan

 Xă Đăk Nuê aƀaơ dôl lah ngoăy tâm 2 nkual srê geh âk nuĭh ji bah nkuăl Lắk. Dược sĩ Đặng Thị Mỹ Hạnh, Groi ngih dak si xă Đăk Nuê an gĭt: bah nar 17/12 tât aƀaơ nu nău srê ta xă geh jêr jŏt đah âk ntŭk ntưp ta ntŭk gŭ rêh, dôl uănh lah ntŭk srê ta ƀon Pai bi đah 80 nuĭh F0. Đah ntŭk srê aơ, xă lĕ an nchoeng n’gang lam ƀon n’hanh ƀư tĭng trong kan joi lam hvi ta lam xă. Geh ăp nuĭh mô ŭch tâm rgop, Ngih dak si an đă nuĭh tât ta mir gay sŏk uănh năl mham n’hanh nkoch trêng an nuĭh ƀon lan. Yuh Hạnh an lah, nău mô tâm rgop bah nuĭh ƀon lan lah nău geh trong ntưp srê ta ƀon lan:

          “Ta ƀon lan gâp mâp jêr jŏt ngăn lah yor nău way ơm bah ƀon lan, kônh wa he way ngêt ndrănh yăng ri ngêt nsum 1 tong, tal 2 lah gŭ âm nsum dŭt âk, nkoch trêng dŭt hvi yơn rgâl nău way ơm lah du nău jêr. Tal 2 lah rnôk năl F0 ri bu mô hăn, kônh wa lah gâp saơ mô geh ji, gâp dŭt ngăch dăng, bu mô ŭch tât, Ban ntĭm rđău n’ăp đồng chí Bí thư, đồng chí Kruanh hăn tât jay rgŏ jă gay bu hăn”.

          Tĭng wa Nguyễn Thanh Hưng, Bí thư đảng ủy xă Đăk Nuê, nkuăl Lắk, tât rnôk aơ xă lĕ kơp dơn rlău 250 nuĭh F0. Nchroh mbơh geh ntưp srê hôm e geh lah n’gâng kan ƀon lan mô nsrôih ƀư dăng ăp trong njrăng n’gang srê, jêng jêh rnôk na nao kơp dơn ăp ntŭk srê tâm rnôk dăch aơ, Ban ntĭm rđău njrăng n’gang srê bah xă lĕ rƀŭn n’hanh uănh lah rjăp nkô̆ nău n’hanh ndơ̆ an ăp trong njrăng srê tâm di gay ơm nking n’gang nău ntoh tay bah chôt srê.

          “Mpôl hên ƀa ƀơ ƀư rƀŭt mât uănh an mpôl mât uănh êng ăp thôn, ƀon nkoch trêng tay an kônh wa lơn lah tâm rơh Tết nguyên đán êp tất ƀư uĕh 5K. Tâm rnôk njrăng n’gang srê ta lam xă mpôl hên saơ nău 5k nău khlay ngăn, lơn lah bok put mbung jêng mpôl hên n’hao trong kan nkoch trêng an kônh wa ƀa ƀơ wăn bok put mbung n’hanh tâm ƀah, mô rgum âk nuĭh gay dêr nău ntưp. Tâm rơh Tết ri nsrôih uănh nđôi gay gĭt nu nău ta xă gay m’hâm ƀư nuĭh ƀon lan wât mbrơi mbrơi hăn tâm nău rêh đah nău djôt bok put mbung gay njrăng n’gang srê”.

Nuĭh kan dak si nkuăl Lắk sŏk uănh năl an ăp nuĭh geh nkô̆ nău srê.

          Wa Phạm Phú Anh, Groi Kruanh Ngih dak si nkuăl Lắk an gĭt, ta năp nu nău jêr jŏt bah srê, nkuăl lĕ ndơ̆ an ăp trong kơt ntrôl dăng trong kan nkoch trêng gay nuĭh ƀon lan ƀư tĭng uĕh 5k, ntrôl dăng chuh vaccine tŏng ăp lĕ khay 1 lam nkuăl geh rlău 90% rnoh nuĭh rlău 18 năm deh chuh tŏng 2 nglai vaccine n’hanh yơn lah mbra chuh nglai 3 an ăp nuĭh geh ntưp âk, n’hanh chuh vaccine an kon hŏk bah 12 tât 17 năm deh. Nkuăl lĕ ndâk ƀư nkual an săm F0 ta Ngih dak si ơm đah geh 50 nsâng ji săm nuĭh ji mô geh nău mbăn n’hanh geh nău ji đêt. Yơn aƀaơ nkual aơ mô hŏk pơk, n’hanh dôl lah nkual kâp bah ăp nuĭh F0 gay ndơ̆ ăp ngih dak si săm Covid-19. Trong kan nchoeng nkual, groi nđôi ta nkual geh âk dơi ƀon lan rgum lĕ n’hâm soan.

“Bôk năp nâp nâl tay trong njrăng n’gang srê bah lam nkuăl ta lĕ trong hăn lăp pah kan, bah ban ntĭm rđău bah nkuăl tât xă n’hanh tât ăp thôn, ƀon, n’hanh ta xă lĕ ndâk njêng geh ăp ngih dak si hăn ăp ntŭk. Đah ndoh ndơ nchrăp tŏng ăp, ngih dak si geh oxi đŏng, geh măy Sensor gay uănh tâm ban oxi tâm mham, dĭng uănh duh săk, jêh nĕ đah dak si lĕ ntêm nkrem lĕ tiăr nti an ăp rmôt mât uănh ntŭk gŭ rêh tiăr nti an ăp nuĭh ta ƀon lan n’ăp tiăr nti sŏk test êng tâm ntŭk gŭ rêh gay saơ ăp nuĭh F0”.

Nău lăp dŭt n’hâm ăp ngih pah kan dơi kan n’hanh n’gâng kan ƀon lan bah nkuăl Lắk lĕ nsĭt tay ăp nău uĕh rnôk ăp nar dăch aơ, rnoh nuĭh ntưp mhe lĕ hŭch âk. Aơ lah nău mbơh dơi rhơn gay Lắk ơm rgâl rnoh ngăch ntưp srê jŭr nkual geh đêt n’hanh rƀŏng tât jêng nkual mô geh ntưp.

          Nuĭh rblang: Y Sưng Phê Ja