VOV4.M’nông:   Ndrel đah kon hŏk tâm lam n’gor Dak Lak, nar 29/8 tât aơ taơ, rlău 15.200 kon hŏk bah nkuăl n’har bri Buôn Đôn mbra na nê̆ tât ngih sam ƀŭt ntơm lăp năm nti mhe 2022-2023. Rnôk aơ, ăp ngih sam ƀŭt dôl nsrôih nchrăp uĕh ăp nău mpeh ndoh ndơ, rmôt nai, an geh mông nar răm nchrăp wơt nar ntơm lăp năm nti.

Năm nti aơ, Ngih sam ƀŭt Mầm non Họa Mi, xă Krông Na, nkuăl Buôn Đôn geh 12 jrô đah 360 mon, nti ta 1 ntŭk ngih sam ƀŭt n’hanh 2 ntŭk ngih sam ƀŭt chrai. Ăp nar aơp, ăp nai bah ngih sam ƀŭt dôl nsrôih jut rao, nkra jâng gung tông rưng jrô nti, geh ntŭk ntô kloh, uĕh nchrăp wơt kon se tât ngih sam ƀŭt. Nai Lê Thị Phúc, Groi hiệu trưởng ngih sam ƀŭt an gĭt:

        “Ngih sam ƀŭt lĕ ƀư pah kan jut rao ta lĕ rngôch ăp ngih sam ƀŭt kloh uĕh. Mpeh ndoh ndơ, ngih sam ƀŭt lĕ ôp đah ăp gưl ƀon lan lĕ ntop kơl. Lĕ rngôch ăp nai lĕ dơi pă jrô ntĭm, ăp nai lĕ sĭt jrô nti nchrăp nkra uĕh gay nar 29/8 aơ wơt ăp mon tât ngih sam ƀŭt”.

Nai mầm non răk jŭt ndơ pâl an kon hŏk lor lăp năm nti mhe

Bah meng nchrăp mpeh ndoh ndơ, ntuh kơl năp ndơ ntĭm nti, ăp ngih sam ƀŭt hôm e dŭt uănh tât trong kan ntĭm nti nău way kan an nai. Yor nkuăl Buôn Đôn mô knŭng jêr jŏt yor nkual n’har bri, ma hôm geh tât 50% rnoh kon se bah nkuăl lah oh kon rnoi mpôl đêt. Yor geh nău êng đah rnoi mpôl đêt, nău ngơi jêng đă nai an geh nău nsrôih, ngăch tâm di tâm ntĭm nti, ngăn lah rnôk bôk nău kan ntĭm nti phổ thông mhe ta ăp jrô 1,2,3. Wa Hồ Sĩ Lâm, Hiệu trưởng ngih sam ƀŭt Tiểu học Y Jut, xă Krông Na, nkuăl Buôn Đôn ntŭk geh tât 80% kon hŏk lah oh kon rnoi mpôl đêt, lah:

“Tâm năm nti mhe ngih sam ƀŭt mĭn njêng nu nău, lơn lah đah jrô 1,2 ngih sam ƀŭt pă an ăp nai dơi wât âk nău ngơi gay lăp ntĭm ăp jrô, ngăn lah jrô 1. Tâm rnôk kon hŏk tât ngih sam ƀŭt mô hŏ wât nău ngơi yuăn ri tĭng nkô̆ nău kon hŏk nĕ lah moh rnoi mpôl ri nai mbra ngơi đah nău ngơi ta ntŭk n’hanh rblang an kon hŏk gĭt nău dơh lơn”.

Nai ngih sam ƀŭt tiểu học Y Jŭt, nkuăl Buôn Đôn răk rao jrô nti gay wơt kon hŏk tâm năm nti mhe

Tĭng wa Đỗ Ngọc Anh, Kruanh jrô kan ntĭm nti nkuăl Buôn Đôn, tât rnôk aơ, ăp ngih sam ƀŭt ntơm tâm di uĕh ndoh ndơ, rmôt nai. Lam nkuăl aƀaơ geh 34 ngih sam ƀŭt, bah gưl mầm non tât Trung học phổ thông n’hanh ntĭm nti thường xuyên. Năm nti 2022-2023, ăp ngih sam ƀŭt geh rlău 15.200 kon hŏk, 50% rnoh kon hŏk lah oh kon rnoi mpôl đêt. Tâm nĕ dŭt âk lah Bunong, Êđê, Jrai,... Nău rêh bah nuĭh ƀon lan hôm e mâp âk jêr jŏt. Yor nĕ gay ăp oh tât ngih sam ƀŭt tŏng ăp, Jrô kan ntĭm nti lĕ ntĭm rđău ăp ngih sam ƀŭt uănh tât mĭn joi, rgŏ jă, ntop kơl ăp oh, mô an geh oh yor nău rêh jêr jŏt ma ntlơi nti. Wa Đỗ Ngọc Anh an gĭt:

“Jrô kan ntĭm nti rđău ăp ngih sam ƀŭt ndâk ƀư trong nchrăp tâm rgop đah n’gâng kan ƀon lan đah thôn, ƀon gay hăn tât me bơ̆ kon hŏk, hăn ăp jay gay nkoch trêng rgŏ jă an ăp oh plơ̆ tay jrô nti”.

Bôl hôm e âk jêr jŏt, yơn đah nău nchrăp uĕh, âk rbăn kon hŏk n’hanh nai ta nkuăl n’har bri Buôn Đôn, n’gor Dak Lak lĕ nchrăp an năm nti mhe đah săk rnglăy uĕh ngăn./.

                    Nuĭh rblang: Y Sưng Phê Ja