VOV4.M'nông: Ăp ntŭk pâl dơi nkrơ̆ uĕh rup ntơr đah ăp ntil ndơ pâl n'gân an bah năp jâng gung nhih nti mô lah nklang ƀon ƀư ăp kon se jê̆ rhơn nđơr. Đah nkô̆ hôr kơl ăp kon se geh tay ntŭk pâl rlưn, du trong kloh uĕh, âk "ntŭk pâl an kon se" hŏ dơi n'hao tât ăp ƀon lan nkual jru ngai ta n'gor Dak Lak bah năp năm mhe.

        Ăp nar rlu tết nguyên đán Nhâm Dần, bol trôk duh n'heng, ăp kon se jê̆ ta buôn Krũe, xã Vụ Bổn, nkuâl Krông Pắk, n'gor Dak Lak hôm rgum bah năp jâng gung nhih nti tiểu học Phan Bội Châu gay pâl ta ntŭk pâl rlưn mhe dơi ntrŭp đŏng. Mhe bah năp nê nơh 2 pơh, ta aơ dơi ntrŭp dŭt âk ntŭk pâl rlưn kơt ntung rhung, nchah yŭng yai, hăn ntung zích zắc,… ƀư ăp kon se rhơn râng. Oh Lê Trần Linh Chi, rnoi Tày, jay gŭ dăch kêng nkual ntŭk pâl, rhơn an gĭt:

        Ntơm nơh mô hŏ geh ntŭk pâl, aƀaơ gâp dŭt lah uĕh kônh yơ̆ hŏ ƀư ntŭk pâl, tach chưng play, ntung rhung an hên, mpôl hên dŭt rhơn nđơr, dŭt lah uĕh. Gâp way tâm jă băl hăn tât ta aơ pâl.

        Rhơn đah ăp ndơ pâl mhe đŏng, oh Vi Y Quyền, rnoi Rđe, kon se nti jrô 5B, nhih nti Tiểu học Phan Bội Châu nkoch, jay ngai đah nhih nti bơi 1km, yơn ntơm bah rnôk geh ntŭk pâl rlưn mhe dơi n'gân ƀư ta nhih nti, bol dôl ma rlu Tết yơn ăp nar gâp hăn tât ntŭk pâl dja đah ăp băl đŏng.

       Nar aơ gâp dŭt rhơn, ntơm nơh mô hŏ geh ntŭk pâl kơt dja jêng aƀaơ gâp rhơn nđơr ngăn. Dơi kônh yơ n'hanh ăp nai ntĭm nsĭt tât ăp nklâm ndơ geh nkô̆ khlay kơt aơ, gâp dăn ton mbra nsrôih kơt nti an dŭt jăp gơih.

        Tĭng nai Trần Hải Đường, Hiệu trưởng nhih nti Tiểu học Phan Bội Châu, ƀư ta Krũe aƀaơ geh 5 jrô nti đah 100 kon se nti, lĕ rngôch lah nuĭh rnoi mpôl đê̆. Aơ lah ngoăy tâm ăp nhih nti dŭt jêr jŏt bah xã Vụ Bổn. Ntơm nơh, rlău ma mông nti ri kon se nti ta aơ lơn âk tĭng me bơ̆ hăn luh mir ba, tiăp ndrôk, pănh sĭm mô lah rgum chưng play ta dâng sre. Ntơm bah rnôk geh ntŭk pâl dơi ntrŭp ƀư ta nhih nti, ăp kon se nti n'hanh kon se jê̆ wăr nkual dja way hăn tât ta aơ pâl rlưn.

       Geh ntŭk pâl rlưn kơt dja ri bôk năp ăp kon se mbra way hăn tât nhih nti lơn, tâl bar lah n'hao dăng pah kan thể dục thể thao, n'hao dăng săk suan an ăp kon se. lôch rnôk dơn ndơ pâl dja ri ƀan giám hiệu nhih nti ndrel đah mpôl druh ndăm nhih nti n'hanh mpôl druh ndăm thôn mbra rgum hop tay gay mhâm ƀư mât dŏng uĕh ntŭk pâl rlưn an ăp kon se.

        Ntŭk pâl ta buôn Krũe lah ntŭk pâl tâl 3 mpeh trong nchrăp "ntŭk pâl an kon se" bah rmôt hăn kơl êng Buăt nthoi tâm rŏng BMT rgŏ jă bah tơm ndơ rgop nsum rdâk njêng, đah rnoh prăk ƀư khlay 30 rkeh prăk. Yuh Lê Như Huyền Trâm, kruanh rmôt hăn kơl êng Buăt nthoi tâm rŏng BMT nkoch, tâm rnôk hăn uănh ngăn ngăn geh ta ăp ntŭk jêr jŏt, ăp ƀon lan ta nkual jru ngai, yuh saơ ăp kon se ta aơ dŭt jêr jŏt da dê, gŭ rêh ngai đah nklang ƀon, mô geh ndơ ma tât đah ntŭk pâl rlưn. Rlău ma mông nti, ăp kon se way tâm jă hăn pănh sĭm, hăn jŭr dak me, dak diăng gay pâl rlưn jêng tât geh ma nău rmok dak. Ta năp nău ngăn geh dja, rmôt hŏ tâm rgop kan nsum đah n'gâng kan ta ntŭk, rgum ăp tơm ndơ gay kơl ƀư ntŭk pâl an ăp kon se. Ndrel đah nê, ta ăp ntŭk pâl dơi ntrŭp ƀư, ăp ntŭk kan ndrel hăn buăt nthoi tay ăp tơm ndơ gay ntop kơl ndơ dŏng sa khlay an nuĭh ƀon lan mô lah kho ao duh răm, ndơ dŏng kơt nti an kon se jê̆ jêr jŏt đŏng. Aơ lah trong nchrăp kan jŏ jong n'hanh dơi an ƀư ntơm bah rnôk lôch tết nguyên đán Nhâm Dần. Yuh Lê Như Huyền Trâm lah:

        Tâm năm 2022 mbra geh 10 ntŭk nchrăp ƀư tach pâl rlưn an ăp nkuâl xã ach o mô hŏ geh ntŭk pâl tâm n'gor Dak Lak. Câu lạc bộ mbra kuăl jă ăp nuĭh lŏng nuih n'hâm, lah mô tŏng prăk dŏng ƀư ri ăp nuĭh rgop kơl tay gay ƀư tay ntŭk pâl rlưn an ăp kon se.

        Đah nău nsum ti bah ăp đơn vị ndrel hăn, ntop kơl, tâm 5 năm aơ, ma ăp trong kan bah mpôl druh ndăm, n'gor Dak Lak hŏ ƀư geh bơi 200 ntŭk pâl rlưn an ăp kon se, đah lĕ rngôch rnoh khlay bơi 10 rmen prăk. Ăp ntŭk pâl dơi ƀư lôch jêh n'hanh jao an dơi ăp tơm ntŭk dŏng dơn n'hanh mât uĕh, nta trong dơh gay ăp kon se dơi dŏng, pâl rlưn. Lôch nê, kơl ăp kon se geh tay ntŭk pâl rlưn, njêng nău rhơn nđơr, rnôk ăp tơ̆ hăn  nti./.

Nuĭh rblang: Điểu Thân