Ôi 12-7, Hội đồng nhân dân n’gor Dak Lak ntơm pơk rơh hop tâl 6. Aơ lah rơh hop way ăp khay n’gul năm gay mĭn uănh nô nău tĭng ƀư Nghị quyết bah Hội đồng nhân dân n’gor mpeh nău dơn kan hun hao wăng sa- rêh jêng kon nuĭh 6 khay bôk năm n’hanh n’gluh trong kan, tĭng ƀư 6 khay kêng dŭt năm. Mbơh ta rơh hop, tâm 6 khay bôk năm aơ, wăng sa rêh jêng kon nuĭh n’gor Dak Lak đăp mpăn oi.

Rnoh khlay lĕ rngôch ndơ geh ƀư ta n’gor nchroh geh bơi 24.500 rmen prăk, hao 4% rđĭl đah ndrel khay dja năm 2022. Lĕ rngôch nsĭt geh tăch n’gluh nchroh geh 810 rkeh USD, hao 2% rđĭl đah ndrel khay dja năm e nơh. Yơn lah, lĕ rngôch tâm rlak tâm ban geh prăk ngân sách ngih dak hŭch 16,6% rđĭl đah ndrel khay dja năm e nơh, ăp nău kan wăch rgum ntuh kơl, dâk hao tay nău kan ƀư njêng tăch rgâl, nta joi nău kan, hŭch ach o jŏ jong mâp âk jêr jŏt, ăp bôk nău kan gưl neh dak an ƀư mbrơi…Rơh hop dja, bah meng tâm nchră, n’gluh ăp trong nkra hun hao wăng sa- rêh jêng kon nuĭh 6 khay kêng dŭt năm, HĐND n’gor Dak  Lak mbra tâm nchră, an nău rgop âk bôk nău kan, trong nchrăp kan khlay bah n’gor; rblang gĭt ăp jêr jŏt, kŏ kol, nkô̆ yơn kol khan ân droh rklaih, ƀư kloh ăp nkô̆ gay tĭng ƀư nău dơn kan 6 khay kêng dŭt năm.