VOV4.M'nông: Ntop kơl druh ndăm tât đah tơm prăk, njêng ăp câu lạc bộ gay ndrel tâm ôp đah ăp nău tă ơm gĭt kan, nkoch mpeh nău blău ntơm njêng nău kan mô lah ƀư ăp rơh tâm rlong mpeh ntơm njêng nău kan lah trong ma n'gor Dak Lak dôl an ƀư gay ntop kơl, ndrel hăn đah druh ndăm, lơn lah druh ndăm tâm ƀon lan tâm trong ntơm njêng nău kan.  

Lôch 3 năm mât klo, nô Huỳnh Ngọc Hội ta thôn 10, xã Ea Bar, nkuâl Buôn Đôn, n'gor Dak Lak hŏ geh ntŭk tăch rgâl đăp mpăn. Nklăp du năm rlơ̆ aơ, nô Hội pơk hvi n'glău mât 350 m2 hao 2.000 m2. Rĭng ăp khay, nô tăch luh ntơm bah 20 tât 30 rbăn klo ntil đah rnoh khlay 300 rêl prăk ăp blâm, n'hanh 4 khay du tơ̆ tăch 1 tấn klo đah rnoh khlay 65 rbăn prăk/kg.  

Nô Hội njêng n'hanh ƀư kruanh rmôt tâm boh druh ndăm mât klo ta nkuâl Buôn Đôn đah 25 nuĭh. Ndrel đah ntĭm nti kỹ thuật, pă an kon ntil an ăp nuĭh râng nsum, nô Hội nơm rvăt klo n'hanh joi trong gâm bah ăp puăch klo gay n'hao rnoh săk kah n'hanh rnoh khlay ndơ geh ƀư. Nô Huỳnh Ngọc Hội an gĭt, tâm rnôk ntơm njêng nău kan, nô hŏ geh huyện đoàn ntop kơl n'hanh ntĭm nti ăp si ƀŭt kan, tâm ban kơt nkoch mbơh ntŭk tăch đŏng. Nơm geh kơt nê kơl nô tĭng kơn rlău dơi jêr jŏt gay hun hao trong ntĭt leo ƀư.

        Huyện đoàn ntop kơl ntrŭt ntrôl n'hanh an oh nô rgum hun hao n'hanh nkoch mbơh an he đah du đêt ntŭk hăn rgum joi rvăt, ntop kơl prăk mô lah mpeh si ƀŭt kan, gay ndơ tăch hăn dơi uĕh lơn. Dơi geh nău ntop kơl bah Huyện đoàn tâm ban kơt ăp n'gâng kan ta nkuâl ri nău kan bah he dơi pơk hvi tay, ntop lah ƀư an nđik kât gay ton rvăt klo an kônh wa geh trong luh đăp mpăn lơn, ndơ geh ƀư mbra dơi geh rnoh khlay âk lơn.

        Tĭng nô Nguyễn Quang Trung, Bí thư huyện đoàn Buôn Đôn, Rmôt tâm boh druh ndăm mât klo ta nkuâl Buôn Đôn lah rmôt tâm boh lor bôk năp bah druh ndăm dơi njêng ta nkuâl mpeh Huyện đoàn. Ndrel đah nê, Huyện đoàn njêng Câu lạc bộ ntơm njêng nău kan druh ndăm wăch rgum âk đoàn viên druh ndăm râng đŏng.

        Gay nta trong dơh an druh ndăm tâm ƀon lan ta nkuâl ntơm njêng nău kan, mpôl kan đoàn hŏ ntop kơl gay druh ndăm tât dơi đah tơm prăk manh thuk, njêng ăp câu lạc bộ ƀư wăng sa, rmôt wăng sa, rmôt rgop tơm prăk. Tât rnôk dja, ăp gưl bộ đoàn nkuâl Buôn Đôn dôl mât dŏng 67 rmen prăk tơm prăk nsing an manh. Geh 33 nuĭh n'hanh ntŭk ntĭt leo dơi dơn geh tơm prăk ntơm njêng nău kan bah tơm prăk nkrem  gưl neh dak nta joi nău kan n'hanh ăp tơm prăk ngân sách ta ntŭk. Nkuâl hŏ uănh khlay rdâk njêng n'hanh hun hao ăp ntŭk leo ƀư mhe geh nsĭt wăng sa gay kơt ƀư âk tâm druh ndăm. Nơm geh kơt nê, tâm 3 năm rlơ̆ aơ, trong leo ntơm njêng nău kan ta nkuâl Buôn Đôn geh âk săk ntơr n'hanh hăn lăp jru, tŏng đah nău ŭch geh bah druh ndăm.

        Ăp trong ntĭt leo ƀư bah druh ndăm, ăp nuĭh hŏ geh âk nsĭt nău dơi ngăn, lơn lah ăp băl nănh ndơ̆ ăp ndơ geh ƀư bah he hăn râng ăp rơh tâm rlong tă bah nkuâl mô lah n'gor ƀư. Mpôl hên rƀŏng tay trong n'hanh nău lư ngăch tât an đoàn viên druh ndăm ta nkuâl rƀah gĭt ăp nău lư geh tât ăp trong nchrăp, trong kan bah n'gor. Sơch ăp nuĭh mhe n'hanh ndơ geh ƀư tâm di đah trong rƀŏng nsum tâm hun hao wăng  sa bah nkuâl gay ntĭm nti tay, kơl tay ăp băl mom gay lôch jêh ăp tŏng.

Nô Y Lê Pas Tơr, Groi Bí thư rnâng kan Tỉnh Đoàn, Kruanh Hội Liên hiệp druh ndăm Việt Nam n'gor Dak Lak uănh năl, tâm 4 năm rlơ̆ aơ, trong leo ƀư ntơm njêng nău kan tâm druh ndăm ta Dak Lak nar lơn ma hun hao n'hanh geh âk săk ntơr. Ăp druh ndăm ntơm njêng nău kan geh nău dơi hŏ njêng luh nău ring tam, ntroh n'gôr ăp druh ndăm êng ƀa ƀă geh nău rŏng nsan hao.

        Rƀah gĭt nău ŭch geh njêng nău kan bah druh ndăm, mpôl kan đoàn ăp gưl hŏ n'hanh dôl kan nsum đah ăp n'gâng kan ta ntŭk gay nta trong dơh, nău way trong kan soih aih gay ntop kơl druh ndăm ntơm njêng nău kan. Lơn lah, bol ma rlău ăp ntil jêr jŏt tă khuch bah nuh srê mhe aơ yơn ta ăp nkuâl, nkual ƀon têh tâm n'gor, ăp trong ntĭt leo mhe hôm dơi ăp druh ndăm joi gĭt êng, tâm ôp joi êng gay ntrŭt ntrôl tâm rnôk ntơm njêng nău kan bah ăp nuĭh.

      Bôk năp, mpeh ntĭm nti, kơi năp nti ri ân gŭ mĭn ăp trong ƀư tâm di, lơn lah tâm rnôk nuh srê đŏng. Tâl bar ri ăp tơm prăk ri mpôl hên ŭch buăt nthoi, ntĭm nti an ăp druh ndăm gay tât dơi đah ăp tơm prăk têh âk lơn. Tâl pe đŏng ri nê lah nău nsrôih buăt nthoi, kan nsum tay đah ăp Hội gay mhâm ƀư ma geh nău âk trong đah rơh kơn doanh nghiệp bah năp đah ăp rơh kơn doanh nghiệp bah kơi lôch nê tâm ban kơt lah buăt nthoi, tăch ăp ndơ geh ƀư n'hanh buăt nthoi tay đah ăp nuĭh rnâng kan, ăp doanh nhân ntoh lư gay khân păng tâm ôp nău tă ơm gĭt kan đŏng, rêng nău nuih n'hâm nđơr an druh ndăm.

        Đah ăp nău ntop kơl bah n'gâng kan n'hanh ăp nsum mpôl, âk druh ndăm ta Dak Lak hŏ nănh rlău ăp jêr jŏt gay ntơm njêng nău kan. Ăp jêr jŏt mpeh tơm prăk, si ƀŭt mât kan, ntŭk tăch ndơ tĭng kơn dơi nkra mbra kơl tâm rnôk ntơm njêng nău kan bah druh ndăm tâm ƀon lan jêng dơh uĕh lơn. Ntơm bah nê njêng nuih n'hâm nđơr gay ring lam trong leo ƀư, mât geh nău dơi ngăn ngăn bah ăp trong ntĭt leo ntơm njêng nău kan druh ndăm./.

Nuĭh rblang: Điểu Thân