VOV4.M'nông: Ntrôl dăng ăp nău kan Năm mhe 2022 gay ntop kơl nuĭh ƀon lan jêr jŏt geh tay ndơ ma rhơn năm mhe, wơt tết. Aơ lah ngoăy tâm ăp nău kan dơi ndơ̆ luh ta rơh tâm nchră n'glôch jêh pah kan đoàn n'hanh trong leo kan druh ndăm rchong năm 2021, an ƀư nău kan năm 2022 bah Tỉnh Đoàn Dak Lak ƀư 17/1. Tĭng nău uănh năl bah Tỉnh Đoàn Dak Lak, tâm năm rlău aơ, pah kan ntop kơl njrăng n'gang nuh srê Covid-19 dơi mom ndăm Dak Lak kan nsum an ƀư geh nău tam.

Lôch nê rgum n'hanh phăt an hang rbăn bok put mbung, dak si puh nkhĭt kaman, bil nkrum njrăng mprănh dak diu n'hanh ndrôm săk dak si đah lĕ rngôch rnoh khlay rlău 1 rmen prăk. Lam n'gor hŏ ntop kơl bơi 24 rbăn dŭng đăp mpăn nău rêh n'hanh dŭng dak si đăp mpăn an nuĭh ƀon lan n'hanh druh ndăm rchong geh nău rêh jêr jŏt, đah lĕ rngôch rnoh khlay bơi 6 rmen prăk. Ndrel đah nê, ăp gưl n'gâng kan đoàn tâm n'gor hŏ tĭng ƀư bơi 2.700 gâl kan druh ndăm; ƀư mhe rlău 119 km trong hăn "chrang- nđĭr- kloh- uĕh - rsang blău- đăp mpăn"; leo ƀư mbơh nti, rƀŏng joi trong kan n'hanh nkoch mbơh nău kan an rmưn tơ̆ đoàn viên druh ndăm; ntop kơl hang rhiăng trong ntĭt leo druh ndăm wăng sa, ntơm njêng nău kan./.

Nuĭh rblang: Điểu Thân