VOV4.M’nông:   Ƀư tĭng Nghị quyết 11/NQ-CP bah Chính phủ mpeh bôk nău kan rdâk hao tay n’hanh hun hao wăng sa-rêh jêng, Ntŭk kan Ngân hàng chính sách xã hội n’gor Dak Lak dôl rgum ntrôl ngăch nău pă prăk an manh, ndơ̆ tơm prăk nău kơl an manh tât đah nuĭh ach o n’hanh ăp nuĭh dơi kơl. Tă bah nĕ, rgop kơl nuĭh ƀon lan rlet rlău jêr jŏt, ngăch đăp mpăn nău rêh, rgop đăp mpăn nău rêh jêng, ntrôl rdâk hao tay n’hanh hunhao wăng sa-rêh jêh jêng năm khuch yor chôt srê Covid-19.

Khay 3/2022, dơi manh 10 rkeh prăk bah bôk nău kan ntop kơl Kon hŏk sinh viên manh rwăt măy tính tă bah rnăk wâl, nô Nguyễn Thuấn ta tổ dân phố 2, nkuăl têh Buôn Trấp, nkuăl Krông Ana lĕ rwăt dâl du mlâm laptop an kon bu klô jrô 7. Nô Thuấn răm rhơn yor nău nĕ lĕ bah an kon manh điện thoại bah bơ̆ gay nti online. Aƀaơ srê lĕ hŭch, yơn laptop lĕ rwăt hôm e khlay yor mon lĕ gĭt dŏng âk app nti trực tuyến êng. Nô an lah, bôk nău ntop kơl Kon hŏk sinh viên manh rwăt măy tính, dŭt tâm di đah ăp rnăk wăng sa hôm e jêr jŏt:

“Aƀaơ hin mpôl hên manh 10 rkeh prăk du khay mpôl hên knŭng trok 10 rbăn prăk, năm manh ri dơi Chính phủ ntrŭnh lah 36 khay, tâm nĕ 6 khay trok du tơ̆. Gâp mĭn âk rnăk geh nău rêh jêr jŏt gĭt tât tơm prăk aơ dŭt uĕh, dơh an rnăk wâl”.

Ngân hàng Chính sách xã hội n’gor Dak Lak ký ton an manh pă an prăk manh tĭng Nghị quyết 11

Dơi gĭt đŏng đah tơm prăk manh tĭng Nghị quyết 11, nô Nguyễn Nam Giang ta nkuăl Krông Ana an gĭt: Đah rnoh geh wăng sa bah ur sai nô aƀaơ hin, gay rgop ƀư geh du mlâm jay gŭ roh âk năm khay jŏ jong. Yor rĭ rnôk gĭt nău mbơh mpeh nău kơl an manh prăk kơl an tĭng Nghị quyết 11 bah Chính phủ nô lĕ ƀư sam ƀŭt manh 450 rkeh prăk, tâm ban 50% dĭng lĕ nchrăp ƀư jay, prăk kon knŭng 4,8%/năm. Knơm dơi manh đah prăk kon đêt, rnăk nô ƀư du mlâm jay mhe, đăp mpăn nău rêh.

“Knơm geh manh nău kơl an aơ geh prăk gay ƀư jay, đah rnoh prăk kon kơt aơ ri đêt hôm gay dơi ƀư jay”.

Măy tính dơii manh tĭng ndơ an manh an bah NQ 11 lĕ kơl an âk kon hŏk ach o rlet rlău lvang nti online rnôk tâm nkhah kon nuĭh yor Covid-19

Tâm rơh aơ, jrô kan ntŭk kan Ngân hàng chính sách xã hội nkuăl Krông Ana dơi pă tơm prăk bơi 7 rmen gay ƀư an manh tĭng Nghị quyết mrô 11 bah Chính phủ. Kơp tât aƀaơ ntŭk kan lĕ pă an manh bôk nău kan ntop kơl nău kan n’hanh mât pơk hvi nău kan an 53 nuĭh đah rnoh prăk rlău 2,4 rmen; pă an manh bôk nău kan ntop kơl kon hŏk sinh viên manh rwăt măy tính an 2 hê, rnoh prăk 20 rkeh prăk; pă an manh bôk nău kan ntop kơl ƀư jay gŭ kon nuĭh 2 hê đah dĭng lĕ rnoh prăk 770 rkeh prăk. Wa Bùi Quang Tuyên, Kruanh Jrô kan ntŭk kan Ngân hàng chính sách xã hội nkuăl Krông Ana, n’gor Dak Lak lah:

“Jrô kan ƀư sam ƀŭt lĕ dơi ntŭk kan jao tơm prăk bơi 7 rmen prăk, tâm khay 5 ri pă an manh bơi 100% tơm prăk dơi jao. Ăp tơm prăk tĭng nghị quyết 11 aơ ri ntơm lĕ ngăch ntop kơl rnăk jêr jŏt yor nu nău srê tâm di ăp nău ŭch manh gay nkra njêng tăch rgâl tay gay rdâk hao tay wăng sa bah rnăk wâl”.

Tĭng rnoh kơp bah Ngân hàng Chính sách xã hội n’gor Dak Lak, n’gor lĕ dơi Trung ương pă an rlău 71 rmen prăk gay mbơh ƀư bôk nău kan an manh tĭng Nghị quyết 11 geh: an manh ntop kơl nău kan pah, mât n’hanh pơk hvi nău kan; an manh ƀư jay gŭ n’hanh an kon hŏk, sinh viên geh nău rêh rnăk wâl jêr jŏt gay rwăt măy tính, ndơ rhŏ nti nsơm trực tuyến. Tât aƀaơ, lam n’gor lĕ pă an manh rlău 52 rmen prăk an manh tơm prăk aơ. Mhe aơ, Dak Lak dơi Trung ương jao tay bơi 260 rmen prăk an manh kơl an tĭng Nghị quyết aơ gay ƀư an manh bôk nău kan rƀŏng tĭng lam dak mpeh hun hao wăng sa-rêh jêng nkual ƀon lan rnoi mpôl đêt n’hanh nkual yôk lvang 2021-2030 n’hanh an manh đah ăp ntŭk ntĭm nti mầm non, tiểu học bah dih ngih dak geh khuch yor srê Covid-19.

Jay dôl dơi jêh bah nô Giang.

Wa Nguyễn Minh Hướng, Groi Kruanh Ngân hàng Chính sách xã hội n’gor Dak Lak an gĭt, gay tơm prăk ngăch tât dah nuĭh dơi dŏng, jêh rnôk Thủ tướng an nghị quyết mrô 11 mpeh bôk nău kan rdâk hao hun hao wăng sa rêh jêng jêh srê Covid, Ntŭk kan lĕ ôp an UBND n’gor geh sam ƀŭt an dŏng gay mbơh ƀư Nghị quyết aơ. Ngân hàng Chính sách xã hội n’gor tâm rgop đah ăp ban nău kan nsum mpôl ta ntŭk gay ƀư kơp uănh ăp nuĭh, rgum pă an manh ngăch, ơm, đăp mpăn, kloh rah wah. Ndrel đah nĕ ntŭk kan mbra uănh nđôi n’hanh mbơh ntĭm, kơl an ăp nuĭh manh dŏng prăk di nău ŭch, mât uĕh săk rnglăy.

 “Jêh rnôk geh nău mbơh mpeh tơm prăk an manh ri Ntŭk kan lĕ ôp an UBND n’gor geh sam ƀŭt ntĭm rđău ăp ngih pah kan ban, nsum mpôl ndrel đah Ngân hàng kơp uănh ăp nuĭh ŭch manh prăk, jêh rnôk geh săk na nê̆ Ngân hàng Chính sách xã hội ntĭm rđău jrô an manh ăp nkual tâm rgop đah an nău kan, nsum mpôl bah nkuăl gay mbơh ƀư an manh ngăch ngăn, di nuĭh n’hanh di nău ŭch”.

Tâm rnôk jêr jŏt tă bah khuch chôt srê Covid-19, tơm prăk nău kơl an manh an tĭng Nghị quyết 11 lah ‘trong pơk” sŏk tay jâng hao jêng, hun hao wăng sa, mkra nău pah kan nău kan n’hanh ăp nău rêh jêng êng, rgŏ ndơ̆ wăng sa-rêh jêng ta Dak Lak rdâk hao tay, hun hao./.

Nuĭh rlang: Y Sưng Phê Ja