Tâm n’gor bôk năm aơ, lam dak hŏ kơp dơn geh 23 nau khuch rmanh bah trong khuch tâm ƀon lan, ƀư 11 nŭih khĭt ndrel 23 nŭih sôt rmanh. Nkô̆ nau ngăn lah yor ƀon lan dah rŏng ma nkra, rnglăp êng ntŭk nơm, biển nkoch mbơh, ndơ dŏng điện, tih nau tâm ƀah ngai đăp mpăn đah điện áp prêh, mô lah yor neu ƀư ntŭng sre, ndơ dŏng bah ntŭk kan điện. Tâm n’gor Dak Lak, gay njrăng rdâng nau khuch rmnah mpeh trong điện tâm ƀon lan, Ntŭk kan điện Dak Lak hŏ n’hao nau kan mêt uănh tĭng nar ăp ntrong rse điện, tâm rgop ma nau njoăl nau mbơh, pă săm ƀŭt nkoch trêng mpeh nau ƀư đăp mpăn trong điện cao áp, ntĭm mbơh nau dŏng điện ân đăp mpăn. Ngăn lah bah năp yan mih dak lip năm aơ, ăp rmôt kan hŏ tâm rgop đah n’gâng kan bah nkuăl ƀa ƀơ nkoch trêng nau kan n’hao nau gĭt bah nŭih dŏng điện. 

Tâm nê, ntŭk kan điện nkah mô dơi rnglăp ăng ten thu phát sóng, yông rse ih ndơ, dàn giáo, tăm tơm di tih nau tâm ƀah ngai, mô dơi nhŭp sĭm, đe tâm trong sre điện, trạm điên, mô dơi ntô̆ nklêng, ndơ mpar êp trong sre điện, mô dŏng n’gâng điện, trạm điện gay ma kâp ndrôk rpu....Nkre, ăp nar tâm rnôk muih trong sre, nkra trong điện ân năch, mât nkra ƀa ƀơ trong điện ndrel ăp trạm biến áp, nŭih kan điện lực hŏ tâm rgop gay ma mêt uănh đah ăp trong ba kơi công tơ, nkoch mbơh tât nŭih năch dŏng điện./.