Lĕ bơi lôch nti kỳ 1, yơn tâm yan pĕ cà phê, ta ăp ngih samƀŭt ta nkual jru ngai, nkual rnoi mpôl đêt, nkual n’har bri n’gor Dak Lak, nai hăn tât ăp jay, lăp tâm mir gay rgŏ jă kon hŏk plơ̆ tay ngih samƀŭt.

          Năm nti aơ ngih samƀŭt Võ Thị Sáu ta xă Krông Na, nkuăl Buôn Đôn geh 349 kon hŏk, tâm nĕ 80% oh lah nuĭh rnoi mpôl đêt. Yor wăng sa jêr jŏt, âk me bơ̆ an kon rlu nti gay gŭ ta jay ƀư mir kơl rnăk wâl. Oh Y Jun Su Byă, kon hŏk jrô 9B, Ngih sam ƀŭt THCS Võ Thị Sáu, nkuăl Buôn Đôn, n’gor Dak Lak an gĭt:

          “Wăng sa rnăk wâl jêr jŏt jêng oh an rlu nti âk gay hăn kan. Jêh rnôk dơi nai ntrŭt nsôr oh nsrôih hăn nti tŏng ăp”.

        Măng ngo nai tât ăp jay rgŏ jă ăp oh plơ̆ tay ngih samƀŭt

  Tâm ban ma nĕ, ta Ngih sam ƀŭt Tiểu học Y Jút, xă Krông Na, nkuăl Buôn Đôn, gay mât rnoh kon hŏk tât jrô nti lah nău mô dơh. Nai Nguyễn Tiến Chung, nai Ngih sam ƀŭt tiểu học Y Jút, an gĭt, trong kan rgŏ jă kon hŏk hăn nti lah ngoăy tâm âk nău kan khlay hăn ndrel đah nău ntĭm nti. Rnôk geh kon hŏk ntlơi nti, nai chủ nhiệm tâm rgop đah ban giám hiệu ngih samƀŭt tât jay mâp me bơ̆  n’hanh kon hŏk gĭt nu nău, nkoch nău ŭch, rŏng n’hanh rgŏ jă ăp oh plơ̆ tay ngih samƀŭt:

          Tă bah trong kan nkoch trêng ri khay bah năp ăp oh hăn nti tay dŭt rĭng. Yơn du đêt nar jêh rnôk jêh du đêt nar roh tay ri mpôl hên hăn rgŏ jă tay. Moh nar ăp oh rlu âk ri lŏ hăn rgŏ jă tay”.

          Tĭng nai Trần Thị Hằng, Groi Hiệu trưởng Ngih sam ƀŭt tiểu học Y Jút, xă Krông Na, nkuăl Buôn Đôn, nău kan jêr jŏt ngăn mô di lah ntĭm nti ma mât rnoh kon hŏk. Nar êng năng lĕ jêr, tât khay 11 khay 12 hôm jêr lơn rnôk tâm yan pĕ cà phê, ăp oh rlu nti tĭng me bơ̆ hăn pĕ cà phê bu. Ăp nai sroh joi, măng ngo lăp tât mir gay joi kon hŏk.

          “Rgŏ jă kon hŏk an hăn tâm măng, nklăp 7h30 tât 8 mông mư mâp rnăk wâl. Oh kon geh rnôk gŭ đah me bơ̆ tâm mir ri mpôl hên hăn joi. Nai hiệu trưởng, hiệu phó, kruanh Công đoàn, đội, nai chủ nhiệm an ndrel lăp tâm mir gay rgŏ jă kon hŏk plơ̆ tay nti”.

Nkuăl Buôn Đôn lĕ rgŏ jă âk prăk kon nuĭh rgop gay ntop kơl kon hŏk ach o tât tay ngih samƀŭt.

Ŏk r’ah lah ndrĭ, yơn rnôk ăp oh plơ̆ tay nti, ăp nai saơ răm, uĕh lăng. Yor ăp nai gĭt đah ăp nkual neh ach o kơt ta nkual n’har bri Buôn Đôn, ŭch hao rklaih luh ach o mô hôm geh trong êng lah hăn nti, geh nău wât rbăng mbra rgâl nău mĭn, rgâl nău rêh. Nai Phạm Thị Loan, Groi hiệu trưởng ngih samƀŭt THCS Võ Thị Sáu, xă Krông Na, nkuăl Buôn Đôn nkoch:

“Nu nău wăng sa ta ƀon lan gâp, xă gâp ƀư sa dŭt jêr jŏt, neh ntu sât blak dŭt âk kâp tâm yan mih mư dơi tăm yơn pĕ lêh lŏ knơm tâm trôk nar. Kơt nĕ ri aƀaơ ăp mon an geh rplay samƀŭt ri bah kơi aơ mư kơl an ăp mon geh nău rêh uĕh lơn”.

Ndrel đah nău rgŏ jă kon hŏk tât ngih sam ƀŭt, ăp ngih samƀŭt ta xă n’har bri Krông Na, nkuăl Buôn Đôn lĕ rgŏ jă âk tơm prăk kon nuĭh rgop gay ntop kơl kon hŏk ach o đah ndrôm samƀŭt, ndơ dŏng nti nsơm, ndeh hăn nti... Knơm ăp nău ntrut nsôr đah drăp ndơ nuih n’hâm, âk kon hŏk ta nkual n’har bri dơi tĭng nău ŭch rŏng tât ngih samƀŭt./.