VOV4.M’nông: Rnôk aơ, ntŭk tăch bánh Trung thu tâm n’gor Dak Lak hŏ ntơm leo tăch. Ăp ntŭk ndrơng tăch bánh Trung thu ăp ntil màu đah ăp ntil bánh êng êng mra lah geh du yan Trung thu geh ueh đŏng jêh du năm nsrŭng rngot yor srê Covid-19.

Rlau du pơh ma aơ, tâm ăp trong tơm bah nkuăl ƀon têh Buôn Ma Thuột, kơt lah Lê Thánh Tông, Lê Hồng Phong, Phan Bộ Châu, Phan Châu Trinh...âk ndrơng ndơ tăch bánh Trung thu geh ndâk ueh ngăn. Dôl ma săch bánh Trung thu gay ma pă ân nŭih băl nơm, wa Bùi Minh Chánh, ta Phường Tân Lợi, nkuăl ƀon têh Buôn Ma Thuột, n’gor Dak Lak mbơh, ăp ntil bánh geh nau lư geh tăch lah nau săch bah rnăk wa:

‘Ăp năm gâp vay săch ăp ntil bánh trung thu geh nau ntoh lư tâm ntŭk bu tăch, sa kah, kloh, lŏ geh tu tơm n’hêl. Gâp saơ năm aơ ăp ntil ndơ ri khlay đê̆ rđil ăp năm, yơn lah uănh ueh lơn, âk ntil lơn”.

Năm aơ, ăp ndrơng ndơ tăch bah ăp ntŭk ntoh lư têh kơt Kinh Đô, Yến Sào Khánh Hoà, Bibica...ndrel bánh bah ăp nkuăl kơt lah Hà Nội, Thành Phát geh âk ngăn tâm ntŭk tăch bánh Trung thu rnôk aơ. Ăp ntil bánh ăp ntil moh, ăp ntil kah. Êp bar ntil bánh vay geh tăch lah bánh rbăn ndrel bánh guch ri hôm geh bánh ân nŭih sa sât ndrel nŭih mô sa njŭng, đah ăp ntil bánh kơt lah grăp kao chuk, tuh xanh, bum, rnga grăp rsĭ, ăp ntil, hạnh nhân, puăch sur, ka jambon, djar gŭch jambon ndrel puăch djăr...

Mô êng ŭch mpeh nau kah bah ăp ntil bánh, nŭih sa hôm sặc âkl lơn mpeh ntô lir bah ăp hộp bánh gay ma ƀư ndơ pă ân bu êng rnôk aơ. Yuh Nguyễn Thị Bích Phương, tăch ndơ ta ntŭk Ngọc Khánh 2, trong Phan Bội Châu, Phường Tân Tiến, nkuăl ƀon têh Buôn Ma Thuột, mbơh:

‘Bar năm bah năp nơh ri srê nuih ri ma hên mô geh tăch âk, yơn năm aơ srê kŏ bah hôm ri ma hên hŏ rvăt ăp ntil bánh geh nau ntoh lư gay ma tăch ân ƀon lan, kơt lah ndơ Kinh đô, Bibica ndrel Đồng Khánh đŏng”.

Âk nŭih tơm tăch ndơ mbơh, bánh Trung thu năm aơ rnoh hao nklăp 3000 tât 5000/mlâm rđil đah ăp năm. Tĭng nau mbơh geh ndơn bah ntŭk nkra ri yor ndơ leo nkra hao khlay ri bánh kŏ hao khlay. Yuh Phạm Thị Chúc Giang, tơm ntŭk tăch bán kẹo Phương Hoa tâm trong Y Jut, nkuăl ƀon têh Buôn Ma Thuột mbơh, tâm du mlâm bánh Trung thu geh rnoh ntơm 60 rbăn tât 75 rbăn/mlâm. Đah ăp ntil bánh kah lơn ri rnoh rlau 3 rkeh prăk/ hộp (4 mlâm). Kŏ tĭng yuh Giang, rnôk aơ, nau bu rvăt hôm mbrơi:

“Ntŭk tăch bah phung hên hŏ tăch rlau 10 năm ma aơ, rđil năm e ri năm aơ geh du đê̆ ntil ndơ hao khlay đê̆ đŏng, tât rnôk aơ rnoh tăch kŏ ê geh âk ôh, ŭch lah đê̆ nar tay ri mra geh tăch âk lơn”.

Gay ma mât nŭih dŏng ndơ tâm nau rvăt ndrel ăp ntŭk kan, êng nŭih ê nkra, tăch rgâl ueh nâp, N’gâng kan mât ntŭk tăch rgâl Dak Lak dôl pơk nau mêt uănh nkô̆ nau bah năp, tâm ndrel ba kơi tết Trung thu 2022. Ndrel ma nê, tât bôk khay 9 n’gor Dak Lak mra ƀư 2 rmôt hăn mêt uănh tâm 6 nkuăl, nkuăl têh, nkuăl ƀon têh gay ma uănh nau ƀư tĭng ăp nau ntrŭnh bah pháp luật mpeh nau đăp mpăn bah ăp ntŭk ƀư nau kan ê nkra, tăch rgâl tâm lam n’gor. Wa Trần Văn Tiết, Groi Kruanh n’gâng kan mât ntŭk ntu răk kloh ndơ ngêt sa tâm n’gor Dak Lak, mbơh:

‘Phung hên mra rgum mêt uănh đah ăp ntil ndơ geh dŏng âk tâm rnôk tết Trung thu kơt lah bánh, mứt, kẹo, ndrănh ƀier, dak ngêt. Nding tâm ăp nkô̆ ma geh ăp nau mhal êng êng tĭng nau ntrŭnh lah tih. Đah ntŭk kan ê nkra mô geh săm ƀŭt pă tŏng nau dơi ri mhal tĭng nau kan mô geh săm ƀŭt dŏng, jêh ri ăp ntŭk ê nkra geh săm ƀŭt ma mô tŏng kloh ndơ sa, yơn mô geh mbơh ndơ ma nơm tăch ri kŏ geh tih ndrel geh mhal. Tâm rnôk ê nkra lah nơm geh dŏng ăp ntil ndơ dŏng, ndơ sa ma mô geh đăp mpăn ri mra tâm rgop nsum tâm nê gay ma mhal rgum ăp ntil nau geh ƀư tih đŏng”./.

                        Nŭih rblang: H’Thi