Tĭng nău mbơh tơih bâh rơh rƀŭn nchră, năm 2022, nău wăng sa- rêh jêng bâh n’gor Dak Lak lĕ geh ăp nău rgâl mhe ueh. Lĕ rngôch ăp nău mpŏng kan kanơm âk tĭng Nghị quyết ngluh mbơh lĕ geh dơi ƀư. Tâm nĕ 6 nău mpŏng kan mpeh wăng sa ntoh lư rlău nău nchrăp mbơh. Rnoh khlăy lĕ rnoh dnơ geh rlău 58,300 rmen prăk, hao rlău 8,9% đah năm 2021.

Âk n’gâng kan, trong kan dôl hun hao n’hanh sŏk tay nău hun hao, kơt nău pah kan tuch tăm, mât rong tui ka, tăch ndơ an dak bah dih, geh âk năch pâl nđaih n’hanh nău kan pâl nđaih, njêng mhe an doanh nghiệp...lĕ geh rnoh hao đah khay aơ năm e. Nău kan ntĭm nti, văn hóa, rêh jêng, dak si, rnă njrăng rêh jêng lĕ geh mât uănh ntĭm leo ƀư geh săk rnglăy âk, n’gor Dak Lak hôm nha geh 1 đê̆ nău mô dơi kơt lah, nău mpŏng mpeh rnoh nkŭm n’hâm bri kanŭng geh rlău 38%. Nău ngăch pă prăk ntuh kơl đê̆ kanŭng geh 29,5% nău nchrăp, nău mô tŏng dak di, ndơ dŏng tâm ngih dak si ta ăp ngih dak si ngih dak mbrơi năp rvăt ƀư âk nău mô tâm di ŭch ta ƀon lan.