VOV4.M'nông: Plơ̆ tay nău rêh kơt ơm mhe, ăp doanh nghiệp tâm n'hanh bah dih n'gor Dak Lak dôl sơch lăp âk nuĭh kan gay rdâk tay nău kan ƀư njêng, trong joi geh nău kan pơk hvi an nuĭh kan ta n'gor dja.  

Ndjôt si ƀŭt dơi hăn pah kan ta Nhật Bản, nô Nguyễn Anh Tú, thôn Hiệp Thắng xã Quảng Hiệp, nkuâl Cư Mgar, n'gor Dak Lak, an gĭt, lôch jêh nti n'gâng kan công nghệ ô tô bah nhih nti Cao đẳng nghề n'gor Dak Lak ntơm bah khay 7/2021, nô hŏ hăn pah kan ta du đêt ntŭk đŏng yơn nău kan mô đăp mpăn. Lôch tăng geh nău lư pơk trong hăn pah kan dak bah dih, nô ndơ̆ si ƀŭt tât Ntŭk rgum mbơh joi nău kan bah n'gor Dak Lak. Lôch rvăch 2 tơ̆ ôp nô hŏ dơi du công ty bah Nhật sơch hăn kan. Tâm khay 3 nô hŏ lăp tâm nkual ƀon têh Hồ Chí Minh nti nău Nhật n'hanh ăp nău gĭt blău khlay gay hăn pah kan.

      “Gâp tă hăn kan bah dih đŏng, gâp ŭch hăn Nhật gay joi nău kan geh rnoh prăk khay đăp mpăn bar pe năm sĭt gay mât rêh săk nơm. Tâm let năp tay gâp nsrôih nti nău ngơi Nhật gay ơm mpăr hăn tât Nhật.”

        Lôch joi gĭt nău lư sơch lăp nuĭh kan, yuh La Thị Thanh Lan, thôn 2 xã Hòa Thuận, nkual ƀon têh Buôn Ma Thuột ngăch joi geh nău kan tâm di ta Công ty Pâl nđaih Dak Lak, yuh an gĭt:

       Gâp nti mpeh nău kan Kế toán doanh nghiệp jêng gâp way lăp pơk joi nău lư ta mạng gay joi nău kan tâm di đah nău way kan bah gâp. Gâp pơk joi saơ geh Công ty Cổ phần Pâl nđaih Dak Lak geh n'gâng kan thu ngân dăch đah nău kan Kế toán bah gâp đŏng jêng gâp ŭch rlong".

          Geh măt ta rơh mbơh joi nău kan ta Dak Lak, wa Lê Nguyên Phúc, Kruanh jrô kan mât bôk nuĭh kan bah Công ty TNHH Hoa Xuân Vina way ƀư njêng ntô jot thể thao ta nkual công nghiệp Nhơn Trạch, Đồng Nai an gĭt, Công ty hŏ krêp dêh đah Dak Lak rlău 7 năm aơ n'hanh hŏ dŏng rlău 5 rbăn nuĭh kan bah n'gor. Aƀaơ Công ty dôl kan nsum đah ăp n'gâng kan ta ntŭk gay sơch lăp âk nuĭh kan ƀư công nhân.

       “Công ty dôl geh nău ŭch sơch lăp ntơm bah 1 tât 2 rbăn nuĭh kan, ntơm bah 18 năm deh let lơ. Rnoh prăk khay ntơm bah 6 pơh tât 14 rkeh prăk lĕ ma ăp ndơ kơl êng ƀa ƀă bah Công ty, bah meng nê Công ty geh ăp ndơ kơl nkhôm 3 rkeh prăk an nuĭh kan mhe lor bôk năp pah kan, tâl bar lah ntop kơl jay trọ tâm 2 khay an nuĭh hăn tât pah kan ta Công ty, ndeh njŭn wơt...Si ƀŭt đăng ký dŭt dơh glêh djăt ma geh Chứng minh nhân dân, sơ yếu lý lịch công chứng lah mbra dơi tât công ty pah kan hôm.”

        Tĭng wa Nguyễn Văn Cường, Groi Giám đốc Ntŭk rgum mbơh joi nău kan n'gor Dak Lak, tâm 3 khay bôk năm, Ntŭk kan hŏ ƀư 26 rơh mbơh joi nău kan ta ăp nkuâl, thị xã; mbơh joi nău kan an 2.223 tơ̆ nuĭh kan. Aƀaơ nău ŭch sơch lăp kan bah ăp doanh nghiệp tâm n'hanh bah dih n'gor dŭt têh.

      “Rnoh ăp doanh nghiệp đăng ký sơch lăp nuĭh kan ma ntŭk rgum mbơh joi nău kan lah dŭt âk, tât aƀaơ hŏ geh rlău 2 rbăn doanh nghiệp đăng ký, tâm nê nău ŭch geh nuĭh hăn kan bah dih n'gor lah dŭt âk, lĕ rngôch sơch lăp kan tât aƀaơ lah rlău 22 rbăn nuĭh kan. Mpeh nău ŭch geh nuĭh kan tâm n'gor tât aƀaơ ri ăp doanh nghiệp hŏ dŏng kan n'hanh sơch lăp nuĭh kan dŭt âk đah rlău 2 rbăn nuĭh kan."

        Wa Nguyễn Quang Thuân, Groi Giám đốc Sở Lao động Thương binh n'hanh Xã hội n'gor Dak Lak an gĭt, lôch ôp uănh tay, tât aƀaơ geh nklăp 90% nuĭh kan lôch sĭt ƀon tơm der nuh srê hŏ plơ̆ pah kan tay ta ăp n'gor mpeh bah dâng. Rnoh nuĭh kan hôm ƀa ƀă dôl geh n'gâng kan ta ntŭk n'hanh ăp nhih pah kan dơi kan ntop kơl, buăt nthoi gay ơm joi geh nău kan. Wa Thuân an lah,  đah ntŭk mbơh joi nău kan dôl ntoh âk kơt aƀaơ, nău đăp mpăn trong nchrăp nta joi nău kan an nklăp 40.000 nuĭh, tâm nê hăn kan dak bah dih 1.000 nuĭh tâm năm 2022 lah geh nău dơi.

       “Mpôl hên dôl n'hao dăng nkoch trêng nău lư n'hanh aƀaơ âk doanh nghiệp hŏ ton mbra ƀư nkoch trêng nău lư ta ăp xã. Tâl bar lah đah nuĭh kan geh nău ŭch joi nău kan ta n'gor nơm ri aƀaơ mpôl hên hŏ ký ton n'hanh tâm ôp tâm rgâl nău kan đah công ty Taek wang, lah du đơn vị mbra rdâk njêng ta nkual công nghiệp Hòa Phú n'hanh nău ŭch sơch lăp nuĭh kan bah khân păng tâm năm 22-23 nklăp 5 rbăn nuĭh. Trong nkra tâl 3 lah mpôl hên mĭn lah ân ntrôl ngăch ntuh kơl gay âk đơn vị FDI mbra pơk hvi ntuh kơl tâm Dak Lak gay nta joi geh nău kan. Mpôl hên mĭn lah ân hăn tât joi êng nău kan bah nuĭh kan tâm nê ntop kơl tơm prăk gay khân păng ƀư njêng êng, joi geh êng nău kan tâm ban kơt pơk hvi nău kan an nuĭh êng đŏng"./.

Nuĭh rblang: Điểu Thân