VOV4.M’nông-Nar 7/6, n’gor ủy Dak Lak tâm rgop đah học viện chính trị ngih dak Hồ Chí Minh ƀư rơh tâm nchră khoa học đah bôk nău “n’gor Dak Lăk rgum hun hao tuch tăm tĭng trong ueh mhe, nâp nâl”. Ta rơh tâm nchră, ăp đại biểu lĕ ndrel tâm mbơh mpeh nău ngăn, nău dơi, nău nkhêp, ntul tlong, mpŏng kan n’hanh trong kan gay ma hun hao tuch tăm ta Dak Lak tĭng trong ueh mhe, nâp nâl, ndâk nsơm nău mô tâm ban tâm lĕ rnoh  khlăy tuch tăm ta n’gor aƀaơ.

Tĭng nău mbơh bâh n’gor ủy Dak Lak, hun hao tuch tăm tĭng trong ueh mhe, nâp nâl lah ngoăy tâm 6 nău kan tơm khlăy gay ma hun hao wăng sa bâh n’gor, geh mbơh ta Nghị quyết Đại hội Đảng bộ n’gor tal 17, năm kan 2020-2025. Ta rơh tâm nchră, ăp đại biểu lĕ dăn đă ăp trong kan hun hao tuch tăm công nghệ mhe kơt lah dŏng nău mhe khoa học kĩ thuật, nău geh ntuh kơl, dŏng ăp nău dơi bâh rơh rgâl mhe công nghiệp 4.0 ta trong kan tuch tăm. Bâh nĕ, njêng nău tâm ban, ueh mhe, nău dơi an Dak Lak gay ma hun hao tuch tăm ueh mhe, nâp nâl, ƀư tĭng nkô̆ ŭch hun hao “Tuch tăm nău rêh mhe, nkual ƀon lan mhe, ƀon lan kan lŏ mir gĭt blău”.

Nŭh rblang: Thị Đoắt