VOV4.M’nông – Đại hội nuĭh ntoh măt rơh tal 8, năm kan 2022-2027 bah Hội chữ thập đỏ n’gor Dak Lak ƀư tâm 2 nar, nar 20-21/6. Nău geh ntoh lư bah Hội tâm năm kan bah năp lĕ rgŏ jă geh rlău 408 rmen prăk an ăp nău ƀư kơl nuĭh ta ntŭk, n’hao bơi rlău 2 tơ̆ nkôp đah năm bah năp nĕ. Tâm 5 năm bah năp, Hội chữ thập đỏ n’gor Dak Lak lĕ ntop kơl ngăch n’hanh kơl nuĭh ƀon lan an rlău 868 rbăn nuĭh, đah dĭng lĕ rnoh prăk bơi 342 rmen prăk, tă bah ăp nău ƀư ntrong leo “Tết yor nuĭh ach o n’hanh nuĭh khih dak si deoxin”, bôk nău kan “Ntŭk mât ndrôk” bôk nău kan “Ndơ̆ nău ŭch rŏng”.

Trung ương Hội chữ Chữ thập đỏ Việt Nam an Kỷ niêm chương "Yor nău kan kơl nuĭh" an 5 hê ta Dak Lak lĕ geh dŭt uĕh nău kan tâm ăp nău ƀư kơl nuĭh.

Tâm năm tât, ăp gưl hội chữ thập đỏ ta Dak Lak mbơh ƀư geh săk rnglăy tay nău rgŏ jă “Du rmôt kan, du hê nuĭh hăn ndrel đah du ntŭk kơl nuĭh”; mât uănh n’hanh hun hao bôk nău kan ntŭk rong ndrôk, kơl ăp rnăk ach o rghâl joi nău rêh nâp nâl; ăp ntrong leo, ntrong kan “Tết yor nuĭh ach o n’hanh nuĭh khih dak si deoxin”, “Khay kơl nuĭh”, “Jay sa tâm rŏng” “Ngan piăng ta mpir”, mât uănh săk soan kon nuĭh.

Nuĭh rlang: Y Sưng Phê Ja