Bâh bôk nău kan lĕ kơl an rhiăng rnăk geh nău geh gay ma hun hao wăng sa rêh jêng mô lah dơi geh ngih jay mhe têh ueh, nâp nâl.

Ntrơn lăp gŭ ta jay mhe, yuh Nguyễn Thị Diệu Linh, pah kan ta rnâng kan leo kan tahen nkuăl Krông Bông, rhơn nkoch, nău ŭch rŏng dơi geh du ngih jay ueh nâp bâh âk năm aơ lĕ jêng nău ngăn, nău rêh jêr jŏt rnôk sai hăn kan ngai, du hê yuh nkre hăn kan nkre mât chăm 2 hê kon jê̆, geh 1 hê kon geh nău ji tự kỷ đŏng. Lah mô geh nău kơl bâh băl mpôl, oh yuh kan ndrel n’hanh 50 rkeh prăk bâh rnoh mpêt nkrem ƀư tĭng nău wa Hồ yor nkuăl Ủy Krông Bông pă an, ê hŏ gĭt mơh rnôk rnăk vâl dĭng dơi geh ƀư jay mhe.

Saơ lah dŭt rhơn, yor geh nău kơl an bâh ntŭk kan ăp gâl, ăp oh nô lam ntŭk pah kan, rdâk njêng ƀư ngih jay kơt aơ nar aơ gay ma đăp mpăn pah kan jan sa. Gâp saơ bôk nău kan aơ dŭt ueh ngăn, nta kơl an gâp nău knơm, bah ir nău jêr jŏt bâh ntơm nơh, kơl an gâp rlet rlău nău jêr gay ma đăp mpăn nău ntĭm rong oh kon”.

Dŭt rhơn ngăn đŏng rnôk geh dơn 20 rkeh prăk bâh rnoh prăk ntêm nkrem tâm rgop ƀư tĭng nău Wa Hồ, yuh Trần Thị Vân, ta thôn 2, xã Hòa Thành, nkuăl Krông Bông lĕ ƀư ntưm an jay, ƀư ntŭk pâl ueh an kon bu klô jê̆ ndơn lah gŭ tâm ntŭk kŏ mô đăp mpăn. Kon bu klô geh nău ji bại não, lĕ 7 năm yơn lah nău mĭn kơt oh bê bar pe khay dơm.

Âk năm aơ lĕ hăn săm oh mon ta âk ntŭk hôm jêng lah nău wăng sa mô tŏng đŏng, lah mhe nơh geh nău kơl an bâh bôk nău kan lah dŭt rhơn ngăn, gay ma ƀư ntŭk bah dih aơ n’hanh ƀư tay mpêr n’gar an prêh bah mon hăn luh nchoăt bah dih uănh nuĭh, uănh ăp ntil ndơ ueh đŏng. Yor mon gŭ tâm jay mbro, ăp tơ̆ mê̆ hăn sĭt kan saơ geh nuĭh lah oh rhơn ngăn, rnăk vâl hên dŭt lah ueh ngăn”.

Yuh Linh n’hanh yuh Vân kanŭng lah 2 tâm rnoh rhiăng đảng viên, nuĭh ƀon lan geh dơn nău kơl an bâh rnoh prăk mpêt nkrem ƀư tĭng nău wa Hồ ta nkuăl Krông Bông. Aơ lah rnoh prăk yor nkuăl Ủy Krông Bông mbơh tơih bâh năm 2016. Tĭng nĕ, ăp ntŭk kan, mpôl kan, chi bộ rgŏ jă cán bộ, đảng viên, nuĭh ƀon lan ƀư dŏng mpêt nkrem dŭt đê̆ lah 2 rbăn prăk tât 20 rbăn prăk tâm du khay gay ma tâm rgop prăk tâm kơl, kơl an ăp nuĭh geh nău rêh jêr jŏt ta nkuăl. Đah trong kan aơ, bôk nău kan lĕ rgum rgop geh bơi tât 4 rmen prăk.

Tât aƀaơ, nkuăl ủy Krông Bông lĕ pă an 100 mblâm ndrôk me deh kon, kơl ƀư 14 ngih jay, ƀư 1 ngih công vụ ta ntŭk ngih nti Ea Rớt xã Cư Pui, kơl an ăp rnăk geh nău khuch khat hô yor nău tât bâh mih sial, ăp nău rêh jêr jŏt, geh nău kop ji ach o...wa Hồ Thị Thảo, groi kruanh rnâng kan Tuyên giáo nkuăl Ủy Krông Bông an gĭt, bôk nău kah lah nău kan khlăy ngăn kơt nti n’hanh pah kan ƀư tĭng nău kan ueh Hồ Chí Minh, tâm rgop trĕ lam têh hvi nău ntrŭn mbrô 05 bâh n’gâng kan chính trị tât ăp nuĭh ƀon lan. Tâm rnôk mbơh tơih, tĭng rơh kan, rnâng kan nkuăl Ủy uănh năl ăp rmôt kan dơn nău kan ngăch gay ma pă prăk kơl an. Rnoh prăk geh dŏng an tâm di, kloh rjăp, na nê̆, tâm di đah nuĭh dơi kơl geh pơk hvi n’hanh rgâl kan an tâm di. Kơt nĕ, bôk nău kan lĕ geh âk nuĭh ƀon lan, cán bộ, đảng viên dŭt vơt tĭng râng tâm rgop.

 Tâm let năp tay, mĭn uănh bôk nău kan aơ dŭt geh nău khlăy gay ma mbra dơi lah du gâl tâm nău kơl an ăp nuĭh geh nău rêh jêr jŏt ta nkuăl. Nchrăp lôch rnôk ma pă lĕ rnoh prăk aơ rĭ tât bôk khay 7/2023 rĭ rnâng kan Tuyên giáo mbra tât mbơh tơih tay an Đảng bộ mbơh tơih du bôk nău kan dŏng mpêt nkrem mhe gay ma vơt rhơn Đại hội Đảng ăp gâl năm kan 2025-2030.

 Mô dơn ntop nău kan na nê̆ nău nău ntrŭnh mbrô 05 bâh n’gâng kan chính trị tât ăp nuĭh ƀon lan, bôk nău kan dŏng mpêt nkrem ƀư tĭng nău wa Hồ ta Krông Bông lĕ nsĭt tay âk săk rnglăy ngăn, kơl an âk nuĭh geh dơn nău kan. Aơ lah nău kan dŭt khlăy gay ma ăp nuĭh ƀon lan mbra dơi nsum ti, trĕ lam nău kan ueh tâm nău nti n’hanh pah kan tĭng nău mĭn ueh Hồ Chí Minh, an nău rêh ăp nar lơ ma ueh lơn.