Ta ăp nău pah kan, khân păng lĕ n’hao nău gơih, nău kơt nti n’hanh nău mĭn kan tâm nău pah kan jan sa gay ma ƀư tĭng nău ŭch ƀư sâm geh an săk nơm ntop an hun hao wăng sa rêh jêng bâh ta ntŭk.

          Plơ̆ sĭt tay ta ƀon Sut Mđưng, xã Cư Suê, nkuăl Cư M’gar lôch rơh nuh srê tal 4 geh ta ăp n’gor mpeh ba dâng, nô Y uel Niê lĕ mô rlu joi nău pah kan gay ma ƀư mât đăp mpăn nău rêh. Bôk năp nô hăn jik pih an bu tâm mir, hăn nchoăn ndơ an bu, hăn ƀư ngih jay...bar pe khay aơ, nô lĕ geh nău kan đăp mpăn lah tăch ndơ an ntŭk tăch kao, tăch tơm ji pâl, đah rnoh prăk khay 300 rbăn prăk/nar. Nô Y Uel an gĭt, bol ma tâm ăp nău kan nô way geh nsrôih ƀư lĕ săk nơm gay ma nău kan geh săk rnglăy ueh, bâh nĕ n’hao nău geh an săk nơm.

“Gâp saơ nău kan aơ tâm di đah gâp, gâp mbra nsrôih pah kan gay ma joi n’hao nău geh an rnăk vâl gâp nơm”.

Dơn saơ nău geh ueh bâh nău mât rong rpu ta nâm n’hâm bri, rnăk vâl nô Y Bông Lào ta nkaưl Ea Sup ndrel đah 25 rnăk êng lĕ pah kan ƀư nău kan ta xã Cư Mlan đah mpôl rpu rong rlău 500 mblâm. Nô Y Bông Lào an gĭt, ntơm nơh rnăk vâl nô rong rpu tĭng trong rong mbơk lêng  ndrel đah ndrôk jêng lah nkre hoach nar kan ma nău geh mô âk đŏng, lôch geh joi gĭt nău mbơh mpeh nău rong rpu mbơk lêng ta n’hâm bri n’hanh  geh n’gâng kan ta ntŭk mbơh nău kanaơ rnăk vâl nô lĕ mbơh tât râng kan. Lôch tă geh ƀư, nô Y Bông Lào saơ geh săk rnglăy ngăn.

"Rnăk vâl lĕ geh rong bâh 20 tât 30 mblâm rpu, rĭ geh ndơ̆ tay săk rnglăy nău wăng sa âk, năm geh klâp ma 20 tât 30 rkeh prăk, uănh nsum geh âk đŏng, naư geh mbơm oi”.

Bol ma lĕ bơi tât 70 năm deh yơn wa Tạ Hữu Ổn ta Buôn Ky, phường Thành Nhất hôm nha dŭt nsrôih pah kan jan sa, joi trong hăn mhe tâm nău hun hao wăng sa. Ntơm nơh ta rlău 7 sào neh bâh rnăk vâl, wa Ổn kanŭng tăm cà phê ndrel đah tiu yơn rnoh jur thuk mbro, nkre lah tiu khĭt lĕ rngôch jêng roh dơm dŭt âk. Mô ŭch geh nău tât kơt nĕ, wa Ổn lĕ nsrôih uănh kơt nti ăp nău kan rgâl jêng tăm play bŭng ntô nđir, ndrel đah du đê̆ tơm sa play êng kơt lah chôm chôm, quất..Tât aƀaơ, nău kan aơ ăp nar lơ ma pơk hvi đah nău geh rlău 100 rkeh prăk/năm.

“Gâp hôm nha mĭn nsrôih êng, gâp saơ pơk hvi nău mir tăm, tăm tay play bŭng n’hanh tăm tay du đê̆ tơm tăm êng đŏng, mô geh tăm êng du ntil tơm ta du rnoh neh”.

Lôch 3 năm pah kan ta rmôt kan Cơ điện bâh công ty cổ phần Thép ESEAN, tâm nkual công nghiệp Hòa phú nô Y Huynh K’Buôr Buôn Drai H’Ning, xã Hòa Xuân, nkuăl ƀon têh Buôn Ma Thuột aƀaơ lĕ jêng nuĭh kan dŭt blău đah rnoh geh rlău 10 rkeh prăk/khay. Nô Y Huynh K’Buôr an gĭt, ê lor lăp pah kan tâm công ty, nô tă hăn ƀư nkra ndeh máy. Bâh nău blău kan nĕ, jêng lăp pah kan ta công ty nô geh gĭt kan ngăch lơn. Nău kan tâm di, rnoh prăk khay âk kơl an nô Y huynh K’buôr geh nău nsrôih lơn.

“Tâm nău kan rĭ dŭt ueh, mông nar pah kan tâm công ty ueh đŏng geh nău kơl âk bâh công ty, rnoh prăk khay đăp mpăn, tŏng dŏng tâm nău rêh gâp n’hanh rnăk vâl. Gâp ŭch pah kan jŏ tâm công ty n’hanh ntop kơl an công ty âk gay ma công ty hun hao âk tay lơn”.

Bol ma nău kan êng êng, yơn khân păng geh nău nsum nĕ lah nsrôih, gơih nđơr n’hanh geh âk nău mhe tâm nău pah kan.  Đah khân păng, nău rhơn mô di lah ăp nău jêr nău têh kiăng, nău rhơn lah dơi geh ƀư nău nơm ŭch rŏng n’hanh bâh ăp nău kan nĕ mbra nsĭt tay an khân păng nău geh đăp mpăn.