Âk nar aơ wa H Juih Mlô (Amí Oanh), ta ƀon Pơk Prong, xă Ea Ning, nkuăl Cư Kuin, n’gor Dak Lak, mô ru bah ơm, nchrăp ndơ n’gôn piăng gâm trau an rmôt kan dơi kan ta ntŭk kâp rnă njrăng mpeh dŭt ƀon. Ndơ sa khlay lah n’gâng kan ƀon lah ndơ̆, bôh mrăch kah, hăng lah wa ntop tay. Ndrel râng ntop kơl n’gôn sa geh âk oh yuh jêt êp jay, jêng ăp ndơ sa tŏng ăp duh na nao rnôk ndơ̆ tât ntŭk kâp. Aơ lah nuih n’hâm bah kônh wa tâm ƀon, ntrŭt nsôr ăp cán bộ, tahen dôl pah kan mât njrăng rnă njrăng ăp nar bah năp.

“Nkre lah bah lơ an lĕ rngôch ăp biăp aơ, nkre lah kônh wa ntop kơl du đêt ăp ndơ sa aơ gay gâm sa, an ntop kơl, ntrŭt nsôr nuih n’hâm lĕ rngôch oh nô rmôt dân quân kơt công an tâm ƀon, ntrŭt nsôr nuih n’hâm gay mât njrăng, mât đăp mpăn an ƀon lan kơt xă ntŭk nơm an đăp mpăn”.

Mô êng jay wa H Juih, âk rnăk êng tâm xă Ea Ning dăn đŏng đah n’gâng kan ƀon lan gay n’gôn ăp ndơ sa ntop kơl, ntop soan ăp rmôt dôl pah kan mât njrăng ta nkuăl Cư Kuin. Yuh Nguyễn Thị Nhị, Kruanh Hội Liên hiệp bu ur xă Ea Ning an gĭt, hội bu ur lĕ ƀư gay oh yuh râng ntop kơl đah nuih n’hâm n’hanh ndơ sa gay geh piăng trau sa tŏng ăp ndơ kah, tŏng ăp soan n’hanh soan rdâng lơh an ăp acns bộ, tahen dôl pah kan. Ăp nar bah năp, lĕ geh hang rhiăng nklâm piăng, ndơ sa jăch dơi nuĭh ƀon lan nchrăp n’hanh ndơ̆ UBND xă gay njuăl tât ăp ntŭk kâp njrăng.

“Oh yuh ta ăp chi hội thôn, ƀon dŭt gơih, rgop soan, rgop ndơ, ntop kơl đêt ndơ gay rhŏ piăng sa, dak ngêt. Rlău ma rhŏ n’gôn gâm geh du đêt yuh râng đŏng ndrel đah rmôt dân quân ta du đêt thôn, ƀon. Lĕ rngôch lah ta ăp chi hội lah khân pơng moh ndơ geh khân pơng djăt hăn Ủy ban, nuĭh ri phe, nuĭh ri piăng play, n’ăp prăk gay kơl. Tâm ăp nar bah năp ri gâm nklăp 500 nklâm piăng. Rlău ma ăp ntŭk kâp bah xă ri hôm n’hao an ăp tahen bah nkuăl kơt bah n’gor sĭt ta xă”.

Jêh nău geh ta ntŭk, nuĭh ƀon lan phong nău ƀư tih tâm lơh, tih pháp luật hô bah ăp nuĭh, khân pơng tâm lah an n’hao nău wât njrăng n’gang, du nuih n’ham tâm rnglăp ndrel n’gâng kan n’hanh ăp rmôt kan dơi kan nâp nâl đăp mpăn thôn, ƀon đah nău ŭch ơm plơ̆ tay nău rêh nâm ơm. Ta ăp ƀon lan, thôn ƀon, mô geh nuĭh đă nuĭh nchrăp lor da dê njrăng n’gang, tâm rgop đah rmôt kan dơi kan ƀư nău kan, ơm mbơh rnôk geh ăp nuĭh măt êng ntoh ta ntŭk. Wa Nguyễn Thừa Đức, ta thôn 22 xă Ea Ning, nkuăl Cư Kuin lah:

“Rlău ma nău nkoch trêng, rgŏ jă lĕ ƀon lan ri êng săk gâp lĕ rgop du gưl jêt gay ndrel đah rmôt công an, dân quân n’hanh tâm trong chính trị gay rgop ndrel soan joi nhŭp phung tih, lôch jêh nău kan mât njrăng đăp mpăn ta ntŭk dơi uĕh”.

Bôl knŭng lah ăp ndơ sa jăch mô lah ăp gri dak, hộp ƀanh, yơn ăp nuĭh ƀon lan njuăl tâm nĕ âk nău rŏng ngăn, ntrŭt nsôr cán bộ, tahen dôl pah kan. Yuh H Nalin Mlô ƀon Pưk Prong, xă Ea Ning, nkuăl Cư Kuin nkoch:

“Kônh wa ƀon lan tâm ƀon aƀaơ tâm rnglăp, nsing nơm đah nău kơl pháp luật bah ngih dak, mât uănh wăng sa rnăk wâl. Ntop đah nău saơ ăp nuĭh ntôn mbơh đah ngih pah kan ngih dak gay tâm rgop pah kan, mât rnă njrăng neh dak tâm ƀon lan”.

Dơi mĭn lah yor nău nsrôih grot joi, njrăng n’gang đah âk trong ngăch n’hanh săk rnglăy, knŭng tâm đêt nar, đăp mpăn plơ̆ tay ta ăp thôn, ƀon bah xă Ea Tiêu, xă Ea Ktur. Yor bah nău nsing nơm nĕ lĕ kơl ƀon lan ndrel ty đah rmôt kan dơi kan nchoeng n’gang nhŭp nuĭh tih, jêng nău kơl nâp nâl rnôk ndơ̆ ăp piăng sông tâm kơl tât rmôt mât njrăng mô lah ndrel ty tâm pă, tâm rgop, ntop kơl rnăk wâl cán bộ, tahen, nuĭh ƀon lan geh rmanh tâm nu nău./.