Lơ 19/5/2024 lah du nar nkah ngăn ma Y Jer Kpor, kon se nti jrâu 12, ngih săm ƀŭt THPT Nguyễn Bỉnh Khiêm, nkuăl Krông Pắk, n’gor Dak Lak rnôk geh dâk răk nau tâm nâm cờ Đảng. Y Jer Kpor mbơh, rnôk joi gĭt tât nau ơm bah Đảng, mpeh ăp nŭih đảng viên cách mạng nâp dăng ndrel geh lăp Đảng, Y Jer lơn ma ŭch, nsôih lơn, jêng nŭih blau, đảng viên ueh gay kơl an ân ƀon lan nơm:

 ‘Bôk năp ri gâp hôm mom, lah du hê đảng viên mhe, ri ma bôk năp ân geh hun hao blau săk nơm gay jêng nŭih đảng viên mom ueh lơn, gay jêh aơ nơm têh jêng ri nơm plŏ kơl an ƀon lan nơm, kơl an hun hao văng sa, văn hoá ndrel jăng lơi ăp nau kan mô tâm di ƀư khuch tât ƀon lan nơm”.

 Kŏ rnơm geh lăp Đảng di nkah 134 năm nar deh Kruanh Hồ Chí Minh, rnôk mhe lăp nti tâm ngih săm ƀŭt Đại học Kinh tế Hồ Chí Minh, oh Trần Phan Tường Vy mô dơi mpôn nau rhơn. Oh Tường Vy nkoch, nau geh lăp Đảng kơl oh geh tay nau nsôih, nchiăr tâm ăp năm nti Đại học jêh aơ:

 ‘Geh lăp Đảng Cộng sản Việt Nam ri gâp saơ săk gâp nơm ân geh ƀư nau kan rjăp lơn, đah du hê nŭih đảng viên ri nơm mra geh nau nsôih gay ma nsôih tâm ăp nar, gay ma ƀư ueh lôch nau kan bah săk nơm ueh lơn, gay ma kơl an nau kan bah neh dak”.

Tĭng nai nti kon se Nguyễn Thị Mai Phương-Groi Bí thư Chi bộ, Groi Hiệu trưởng ngih săm ƀŭt THPT Nguyễn Bỉnh Khiêm, nkuăl Krông Pắk, n’gor Dak Lak, ăp năm êp aơ, nau kan lăp đảng đah kon se nti geh ngih săm ƀŭt uănh khlay ndrel geh dơi âk nau ueh. Ntơm năm 2020 tât rnôk aơ, ngih săm ƀŭt hŏ rnglăp Đảng ân 19 kon se geh nau blau ngăn:

 ‘Ntơm năm 2019 ri Rnâng kan bah nkuăl uỷ geh nau ntĭm nti gay ma ân lăp đảng tâm kon se nti ri Chi bộ phung hên uănh khlay ngăn tât nau kan aơ ndrel hên ndŏ luh nau kan du hê kon se geh mbơh nchiăr nti gay ma lăp đảng ri nê lah nau kan bôk năp lah kon se ân geh nsôih nti ân blau, hạnh kiểm ân geh loại Tốt. Phung hên geh ăp nŭih ueh dơi jêh ri jao ân đah Đoàn ngih săm ƀŭt lŏ nchiăr nti ndrel ân kon se râng âk nau kan gay ma saơ âk nau dơi blau bah kon se”.

Năm nti 2020-2025 nkuăl uỷ Krông Pắk nsôih lăp ân geh 100 kon se lăp đảng tâm ăp ngih săm ƀŭt THPT ndrel ntŭk kan ntĭm nti kan pah-ntĭm nti ƀa ƀơ. Kơp tât khay 6 năm 2024, nkuăl uỷ Krông Pắk hŏ kơl geh 83 đảng viên mhe lah nŭih gĭt blau dôl hăn nti tâm ăp ngih săm ƀŭt THPT tâm nkuăl. Tâm nê, năm 2023 rnglăp geh 25 kon se; 6 khay bôk năm 2024 geh 29 kon se geh rnglăp. Wa Trần Hồng Tiến-Bí thư nkuăl uỷ Krông Pắk n’gor Dak Lak mbơh, nau rnglăp đảng viên tâm ăp ngih săm ƀŭt jŏ kơl an geh âk nŭih đảng viên mom tâm nkuăl. Rnôk hăn rƀŭn rgum bah đảng tâm nkuăl ri kon se kŏ geh gưl uỷ tâm dâng mmbơh ntĭm kơl an gay jêng nŭih blau:

‘Hun hao đảng viên ta aơ mô knŭng lah nau hun hao ân chi bộ, ân đảng bộ bah nkuăl ma hun hao ân ntŭk kan đảng. Joi ân ăp ntŭk kan Đảng ăp nŭih đảng viên blau nau ngăn, ueh ngăn ngên. Rnôk aơ lah nơm dơi geh săch ăp oh đoàn viên blau, nti blau tâm ăp ngih săm ƀŭt gay hun hao đảng, jêh nê mbơh ăp oh tâm ăp ngih săm ƀŭt đại học gay lŏ kơl an, joi kơl đŏng ri ăp oh kon se sinh viên lah đảng viên. Ndrel jêh rnôk lôch nti lăp tâm ntŭk kan Ngih dak ri nơm geh ăp đảng viên blau nau kan kơt nê”.

 Nau ƀư ân lăp đảng viên tâm ngih săm ƀŭt THPT tâm nkuăl Krông Pắk, n’gor Dak Lak nkre geh nau khlay rnôk saơ, kơp dơn nau nsôih bah kon se blau, nkre pơk luh ăp ntŭk gay ma hun hao đảng tâm rmôt bu mom, rgop nau n’hao nau nâp lơn nŭih lăp đảng ndrel ntop tay nŭih kan mhe, nâp prêh lơn ân Đảng./.