UBND n’gor Dak Lak mhe ƀư Tâm nchră ŭanh năl lôch jêh geh tĭng ƀư ăp bôk nău kan gưl neh dak 6 khay bôk năm n’hanh nău dơn kan rgum tơm 6 khay kêng dŭt năm 2023; uănh năl nô nău an tĭng ƀư ăp bôk nău kan gưl neh dak lvang năm 2021- 2023, trong nkra, nău dơn kan rgum tơm lvang năm 2023- 2025 n’hanh trong rƀŏng an ƀư lvang năm 2026- 2030.

Tĭng rnoh mbơh ta tâm nchră, tĭng ƀư 3 bôk nău tât kan gưl neh dak, Dak Lak hŏ dơi jao an 2.319 rmen prăk, âk rlău 50,91% lĕ rngôch tơm prăk lvang năm 2021- 2025. Ăp bôk nău kan gưl neh dak hŏ rgop ntrôl ngăch rnoh rdâk njêng ƀon lan mhe n’hanh n’hŭch ach o ta Dak Lak. Rnoh âk rnăk ach o lam n’gor hŭch ntơm bah 1,5 - 2%/năm; rnăk ach o tâm nkual ƀon lan rnoi mpôl đê̆ hŭch 3- 4%/năm. Tĭng nău ŭanh năl ta rnôk tâm nchră, nău tĭng ƀư 3 bôk nău kan gưl neh dak ta Dak Lak hôm âk jêr jŏt…Tâm let năp tay, n’gor mbra nsrôih droh rklaih ăp jêr jŏt, gay ăp bôk nău kan hun hao geh nău dŭt tam. Tâm nê, nkô̆ nău neh gŭ neh tuch tăm tâm nkual ƀon lan rnoi mpôl đê̆ mbra dơi n’gor rong an ƀư lor, đăp mpăn an kônh wa ƀon lan rnoi mpôl đê̆ đăp mpăn nău rêh./.