VOV4.M’nông: Dak Lak lah n’gor geh âk nău dơi hun hao lŏ mir. Tâm nghị quyết Đại hội Đảng bộ n’gor rơh tal 17, năm kan 2021-2025 lĕ mĭn hun hao lŏ mir tĭng trong uĕh kah, nâp nâl lah ngoăy tâm 6 nău kan khlay gay hun hao wăng sa bah n’gor. Tâm ăp năm bah năp, Dak Lak lĕ geh âk nău ntrŭnh, nău kơl wăch rgum ntuh kơl an lŏ mir. Lơn lah lŏ mir công nghệ mhe. Gay ndâk njêng lŏ mir tĭng trong mhe, nâp nâl dôl ntrôl dăng wăch rgum ntuh kơl an nău kan aơ.

Đah nău ŭch geh ndơ lŏ mir dăch dêh đah ntŭk ntô, mât njrăng săk soan nuĭh dŏng. Công ty Cổ phần Ban Mê Green Farm, phường Tân Thành, nkual ƀon têh Buôn Ma Thuột lĕ kơt dŏng công nghệ mhe an tăm blân srat, play Nova. Jêh rlău 5 năm mĭn njêng, rlong ƀư công ty lĕ jêh trong kỹ thuật, nău ƀư mât chăm n’hanh kah an tơm tăm, tât aƀaơ, blân srat, play Nova têh jêng n’hanh hun hao tâm di đah neh ntu n’hanh trôk nar nkual Tây Nguyên, an săk geh n’hanh uĕh kah âk. Gay dơi geh aơ, ndrel đah nău nsrôih bah công ty hôm geh nău kơl dŭt âk bah ăp nuĭh ntuh kơl tâm nău kan lŏ mir công nghệ mhe. Wa Nguyễn Thái Thanh, Kruanh Công ty Cổ phần Ban Mê Green Farm an gĭt:

“Tâm năm bah năp Công ty mpôl hên dơi ăp nuĭh ntuh kơl têh ntuh kơl gay hun hao tay mpeh khoa học công nghệ kơt dŏng rgâl mrô tâm lŏ mir kơt khân pơng an ndâk ƀư ăp trong điện tử gay lôch jêh n’hanh bah kơi aơ mbra rgop tâm trong blocchange gay dơi joi ta lam ntŭr neh gay nuĭh năch bah he gĭt ndơ he m’hâm ƀư n’hanh uĕh kah m’hâm geh”.

Ntoh măt công ty Cổ phần Ban Mê Green nkoch tâm rnôk tăm blân srat play Nova đah Bí thư N’gor ủy Dak Lak

Ngoăy tâm ăp doanh nghiệp way nkra njêng, tăch n’gluh ndơ lŏ mir hữu cơ, wa Phạm Hữu Thời, Tổng giám đốc công ty TNHH lŏ mir Nhất Thống an lah: Dak Lak n’gor dơi mpeh hun hao lŏ mir đah ăp ndơ lŏ mir ndoh ndơ tăch n’gluh khlay âk kơt: cà phê (200.000ha), cao su (40.000 ha), tiêu (21.000ha). Dak Lak geh âk ndơ dơh uĕh đah trôk nar, neh ntu n’hanh ăp ndơ geh ơm gay tŏng ăp nău ŭch nkra njêng lŏ mir tĭng trong hữu cơ tâm rgop kơt dŏng công nghệ mhe an nkra njêng. An saơ lah năm 2020 rmôt ndơ biăp, bum, tiêu, ca cao, cà phê bah ntŭk lŏ mir hữu cơ Cư Bao, nkuăl têh Buôn Hồ, n’gor Dak Lak lĕ geh kơp dơn hữu cơ USDA bah châu Âu n’hanh kơp dơn hữu cơ JAS bah Nhật Bản. Yơn lah, tĭng wa Phạm Hữu Thời nkra njêng lŏ mir công nghệ mhe ta Dak Lak têh hôm e jêt chrai, mô tŏng ăp nuĭh ntuh kơl gay dơi ntop kơl ndơ̆ ăp ndơ khoa học công nghệ mhe kơt dŏng an tuch tăm lŏ mir. Yor nê gay dơi geh nău ŭch hun hao lŏ mir kơt dŏng công nghệ mhe n’hanh n’hao trong khlay ndơ, n’gor uănh mĭn tât wăch rgum ntuh kơl nta nơih lơn tay an doanh nghiệp.

“Gay dơi geh tâm di hữu cơ bah nău bôk năp tât ndơ n’glĕ dŭt tât đah ty nuĭh dŏng lah nău đă doanh nghiệp an ƀư tĭng tâm ban ndơ nĕ. Yơn lah gay dơi nău nĕ n’hanh săk rnglăy nkra njêng nĕ an geh nău kơl uănh mĭn dŭt âk bah n’gor gay kơl soan an doanh nghiệp dơi geh nơih tâm rnôk nkra njêng”.

Tĭng wa Nguyễn Đình Trung, Ủy viên Trung ương Đảng, Bí thư n’gor ủy Dak Lak, nchrŏng trong hun hao nău kan lŏ mir bah n’gor, bah meng dăp rgâl tay nău kan lŏ mir tĭng trong mât uĕh nău geh bah ăp ntŭk, hăn ndrel nău ŭch ntŭk tăch rwăt, tâm di đah rgâl trôk nar, rgum lăp lam ntŭr neh. Ban thường vụ n’gor ủy đă nău kan lŏ mir rgâl mhe tay n’hanh n’hao săk rnglăy ăp trong ƀư tuch tăm; uănh khlay hun hao tâm rgop tĭng trong khlay, nkra njêng geh kơp dơn, kơt dŏng công nghệ mhe, lŏ mir kloh uĕh, lŏ mir hữu cơ an tuch tăm. N’gor mbra nta an ntrŭt nsôr wăch rgum doanh nghiệp ntuh kơl an tuch tăm lŏ mir. Wa Nguyễn Đình Trung mĭn lah:

Bí thư N’gor ủy Dak Lak Nguyễn Đình Trung djăt nău rgop dăn đă bah doanh nghiệp ntuh kơl an nău kan lŏ mir công nghệ mhe.

“N’gor dôl ntơm nău kan dăp rgum rgâl dŏng neh kơt dăp rgum ăp nkual tuch tăm nkre đăp mpăn uĕh nâp, groi nđôi n’hanh ntrŭnh ntuh kơl. Tal 2 lah tâm rgop đah ăp nuĭh. Aơ lah nău kan bah n’gor, n’gor dâk ƀư tâm rgop. Tal 3, nău ndâk ƀư ntung trong, dak bât n’hanh ăp ngih wâl rhŏ an ăp nău nchrăp ƀư lŏ mir công nghệ mhe”.

Gay geh trong rgâl mhe tâm hun hao lŏ mir công nghệ mhe, lvang 2016-2020, n’gor Dak Lak dôl rgum kuăl jă wăch rgum ntuh kơl an ăp nău nchrăp ƀư khlay: Nkual lŏ mir kơt dŏng công nghệ mhe xă Ea Kpam (nkuăl Cư M’gar); nkual lŏ mir kơt dŏng công nghệ mhe xă Ea Tu (nkual ƀon têh Buôn Ma Thuột); nkual lŏ mir kơt dŏng công nghệ mhe xă Hòa Xuân (TP. Buôn Ma Thuột); ndâk ƀư ngih măy nkret njêng ndơ lŏ mir ta nkual công nghiệp Hòa Phú, Tân An (nkual ƀon têh Buôn Ma Thuột); nkual công nghiệp Phú Xuân (nkuăl Cư M’gar); nkual lŏ mir kơt dŏng công nghệ mhe Krông Búk (nkuăl Krông Búk).

          Nuĭh rblang: Y Sưng Phê Ja