VOV4.M’nông: Tĭng Sở Văn hoá, Thể thao ndrel pâl n’aih n’gor Dak Lak tâm rnôk rlu lễ 30/4 ndrel 1/5 năm aơ, n’gor hŏ vơt bơi tât 56 rbăn tơ̆ năch tât uănh pâl, rlu n’aih, nau geh hao bơi tât 17 rmen, hao rlau 80% rđil rơh aơ năm e. Nau dăng dŏng jrâu bĭch geh rlau 90%. Ăp ntŭk ƀư nau kan ngêt sa, pâl n’aih ndrel gŭ âm kŏ ƀư tĭng rnoh mbơh lor ndrel tăch tâm di rnoh ytă geh lir, mô geh nau ƀư mpet rnoh tăch ân năch. Wa Nguyễn Thuỵ Phương Hiếu, Groi Giám đốc Sở Văn hoá-Thể Thao ndrel Pâl n’aih Dak Lak lah rjăp:

Nau pâl n’aih Dak Lak hŏ uănh năl dơi nau dăng bah nơm mpeh nau pâl n’aih. Ndrel n’gor dôl ndâk nau ƀư nau kan ueh nŭih Dak Lak ân ƀư nau kan nŭih ƀon lan tâm dơh tâm dăch ndrel mât săk ntơ lư bah nơm. N’gor mra nsôih rđau ăp rmôt kan ndrel N’gâng kan pâl n’aih mhâm ƀư ndâk nau dơi pâl n’aih mhe, ƀư mhe ăp ntil ndơ pâl n’aih dôl geh. Kŏ kơt lah n’hao nau ntĭm nti ân nŭih pah kan, ntrŭt dăng nau kan ƀư nau mbơh nkoch tâm nthoi đah ăp n’gor gay mhâm ƀư rgum năch pâl n’aih tât đah Dak Lak”./.

Nŭih rblang: H’Thi