VOV4.M’nông –  Nar 13/4, Hội chữ thập đỏ n’gor Dak Lak wơt dơn bôk nău kan pă dak puh rao kaman an 400 ngih sam ƀŭt tiểu học n’hanh mầm non ta n’gor Dak Lak. Ta nar wơt dơn, ntoh măt nuĭh ntop kơl lĕ jao an 10 rbăn ndơ rsŭng mbung, 13 rbăn lít dak puh rao kaman n’hanh 15 măy trih dak đah dĭng lĕ khlay rlău 4 rmen prăk.

An 15 măy trih dak an ntoh măt 15 nkuăl, nkual ƀon têh, n'gor Dak Lak.

Rnoh ndơ aơ mbra dơi pă an 400 ngih sam ƀŭt tiểu học n’hanh mầm non ta n’gor Dak Lak. Tĭng wa Trần Thị Phương Thu, Groi kruanh mât uănh Hội chữ thập đỏ n’gor Dak Lak, ndrel đah rnoh ndoh ndơ lĕ wơt dơn, Hội chữ thập đỏ n’gor tâm rgop đah ntŭk kan ntop kơl uănh gay săch ăp ngih sam ƀŭt ta nkual jru ngai geh nău ŭch dŏng măy trih dak gay ntop kơl tay tâm nar tât.

Nŭih blang: Y Sưng Phê Ja