Lơ 7/8, Rmôt hăn kan bah Rnâng kan rđau kan neh dak mpeh nau njrăng, rdâng nau khuch yor N’gâng kan tuch tăm ndrel hun hao ƀon lan Nguyễn Hoàng Hiệp, Groi Rnâng kan leo bôk hăn mêt uănh nau tât mih dak lip, rluh neh tâm n’gor Dak Nông. Rmôt kan đă n’gor Dak Nông ơm mbơh nau kan ndal mpeh trôk nar lơh gay ma rklaih, năn ƀư du đê̆ nau kan du trong ndal ngăn. Mih dak lip tâm âk nar rlau aơ tâm Dak Nông hŏ ƀư 2 nŭih khĭt, bơi tât 200 ngih gŭ ndrel rlau 650 ha tơm tăm geh dak lip, âk ntŭk ntu gung trong, trong hoch dak geh djơh, nchrăp rnoh khuch rlau 250 rmen.

Bah nau hăn uănh ngăn mih dak lip kŏ kơt lah uănh ntŭk rluh neh ndrel ntŭk trong n’hoch dak geh khuch, rluh tâm Dak Nông, rmôt kan năl lah, mih dak lip ta Dak Nông dôl khuch hô, jêr rdâng. N’gor ân ơm mbơh nau kan ndal mpeh nau khuch gay geh nau rklaih lah geh nau tât ndal đah ăp ntŭk djơh yor dak lip, trong hăn. Ân geh kơp njrăng tât nau pling dak bât, gay ma geh nau mbơh ân năn./.