VOV4.M'nông: Ntơm bah lôch Tết Nguyên đán tât aƀaơ, ta Dak Nông hŏ năl geh bơi 1000 nai ntĭm n'hanh kon se nti ntưp covid-19. Bol ma kơt nê̆, aƀaơ n'gâng kan ntĭm nti n'gor dja hôm tŏng ăp nău dơi gay an kon se nti trung học cơ sở, trung học phổ thông hăn nti tay ta nhih nti đŏng. Tĭng nchih rgum bah Sở giáo dục đào tạo Dak Nông, ntơm bah rnôk kon se plơ̆ nti tay lôch rơh rlu Tết tât aƀaơ, lam n'gor hŏ năl geh 132 nai ntĭm n'hanh rlău 800 kon se nti ntưp covid-19.

Tă bah rnoh ntưp lơn âk ta gưl tiểu học n'hanh mầm non, jêng Dak Nông hŏ an kon se nti gưl mầm non n'hanh tiểu học lam n'gor manh an rlu tât nhih nti an tât rnôk geh nău mbơh mhe; rgâl jêng ăp trong nti online, nti ta ƀoh rup n'hanh nai ntĭm phăt phiếu bài tập. ăp gưl nti THCS n'hanh THPT hôm leo ƀư ntĭm nti pơk sŏng dăng đŏng, n'hanh dơn geh tâm jrô nti geh ma nău ntưp hô mbra ƀư ntĭm nti pơk sŏng dăng dơm. Wa Nguyễn Văn Toàn, Giám đốc Sở Giáo dục đào tạo Dak Nông, an gĭt, Sở mbơh gĭt ăp ntŭk ntĭm nti tĭng ƀư jăp nău way njrăng n'gang nuh srê, mô uănh lhơ yơn mô phit klach ơm. Aƀaơ n'gor hôm đăp mpăn ăp nău dơi an kon se nti ntơm bah jrô 6 let lơ hăn tât ta nhih nti đŏng./.

Nuĭh rblang: Điểu Thân