Mbơh tơih ta rơh rƀŭn nchră an saơ, 6 khay ba năp, nău ngăch hun hao wăng sa bâh Dak Nông geh 5,23%, đê̆ lơn âk đah nău nchrăp ngluh mbơh lah 7,5%. Nău geh tơm prăk kanŭng geh 1.550 rmen prăk, hŭch tât 20,5% đah khay aơ năm e.

Nău pă prăk ntuh kơl nsum bâh n’gor mbrơi, nău ngăch mbơh tơih ăp bôk nău kan nkô̆ mpŏng ngih dak geh mâp âk nău jêr mpeh trong kan, nău kơl kan. Tâm rnôk nĕ, nău nchrăp kan, nău dŏng neh mbrơi, nău nchrăp ƀư boxit geh tât nău hun hao wăng sa rêh jêng ta ntŭk. Ntoh ngơi ta rơh rƀŭn nchră, wa Lưu Văn Trung, kruanh HĐND n’gor Dak Nông đă ăp đại biểu HĐND n’gor tâm nchră, ƀư kloh ăp nkô̆ nău, ngăn lah nkô̆ nău tơm bâh ăp nău kŏ khan, nău mô dơi tâm nău kan pă prăk ntuh kơl nsum. Bâh nĕ ndơ̆ mbơh trong kan ndâk nsơm, ntrôl an hun hao wăng sa, rêh jêng.