Dâk ta neh mir dôl geh âk ntŭk đang, wa Hà Thị Thốt, thôn Quảng Tiến, xã Quảng Sơn, nkuăl Dak Glong, n’gor Dak Nông dŭt rvê ngăn rnôk ma rlău 3 ha tơm tiu mbra geh pĭch rluh jur let dak bât Dak Nting. Wa an gĭt lĕ pah kan ta aơ âk năm yơn mô geh nău tât. Bar năm aơ, rnôk nău kan ƀư dak bât tŏ djrah Dak Nting nƀư rĭ ntơm geh pĭch đang n’hanh năm aơ lah dŭt hô ngăn. Wa Thốt đă ăp n’gâng kan geh trong kan gay ma mât đăp mpăn nău rêh an ƀon lan tâm nkual geh nău khuch.

 “Ngih jay neh ntu bâh nơm ta aơ da dê, dôl mbra geh pich đang neh đŏng, jay lĕ geh ntŭk đang đŏng, rvê roh jay, roh neh mir. Aƀaơ mô hôm geh ngih jay gŭ. Dăn ăp n’gâng kan ntŭk kan kơl an ngih jay uănh pă neh ntu tuch tăm ta mir mhâm ƀư, gay ma ƀon lan bah ir mĭn rvê”.

Wa Nguyễn Văn Nghĩa, Giám đốc rnâng kan mât uănh nău ntuh kơl rdâk njêng n’gor Dak Nông an gĭt, dak bât Dak Nting geh  têh hvi klâp ma 1,2 rkeh mét khối geh UBND n’gor Dak Nông an dŏng ta năm 2018, lĕ rnoh ntuh kơl bơi tât 137 rmen prăk. Aƀaơ nău kan lĕ ƀư lôch rdâk njêng lôch, nuĭh tơm ntuh kơl dôl geh ƀư ăp ntil săm ƀŭt geh tât gay ma uănh năl pă nău kan. Yơn lah, mih têh jŏ nar, lơ 1/8, dak bât tŏ djrah Dak Nting geh ăp nău rluh neh, đang, pĭch dŭt âk ta dak bât n’hanh dăch meng nĕ. Đah ăp rnăk ƀon lan văr dak bât tŏ djrah, ngih jay lĕ geh ntŭk đang neh jay. Gay ma mât đăp mpăn, mpôl kan têh lĕ ntrơn 34 rnăk ƀon lan. Mpeh đah rnâng kan lĕ geh nău nchrăp leo kan ndâk nsơm nău tât pĭch rlâm neh, ngăn lah nău rluh neh ta pĭch nor yôk bah đah ma n’hanh đah kiău dak bât. Yơn lah, aƀaơ, ta ntŭk hôm nha geh mih têh, rnoh dak ta dak bât dôl têh jêng nău ndơ̆ máy mok lăp pah kan lah geh âk nău jêr.

 “Bâh ntơm geh nău tât lah lĕ geh trong kan doh roih du đê̆ ntŭk bât dak gay ma njur dak bah ir ler yơn ma lôch uănh n’hêl na nê̆ rĭ geh saơ aƀaơ dak hôm nha dŭt têh, dŭt mô đăp mpăn an săk soan kon nuĭh, jêng mô hŏ nănh ƀư. Hôm trong kan lĕ nchră, aƀaơ ŭanh nđôi ăp rnoh ntrơn du bâh lĕ rmôt bêng ler n’hanh ntŭk bât, rnôk mât đăp mpăn rĭ an geh mbơh ƀư dâl”.

Tât uănh nđôi nău kan dak bât tŏ djrah Dak Nting, groi kruanh n’gâng kan tuch tăm mât rong n’hanh hun hao ƀon lan Nguyễn Hoàng Điệp, Groi kruanh rnâng kan ntĭm leo ngih dak mpeh njrăng, rdâng nău tât bâh mih sial uănh năl, nău rluh neh ta dak bât tŏ djrah aơ lah dŭt jêr njrăng. Đah nău mih sial kơt aƀaơ, mbra geh rlău 1 rkeh mét khối neh mbra geh pĭch rlâm jur ta ntŭk kan dak bât tŏ djra, mbra geh pling dak bât. Bâh nău uănh năl bôk năp, groi kruanh n’gâng kan Nguyễn Hoàng Điệp an lah, geh trong kan gay ma rklaih nău tât bâh dak bât tŏ djrah aơ. Yơn lah, tâm rnôk mông nar ntêm an nuĭh tơm ntuh kơl hôm đê̆ nar gay ma nkra dak bât aơ, ê lor mbra geh tay du rơh mih dŭt têh tay ta ntŭk tâm dŭt khay 8.

 “Ŭch geh mât tay nău kan aơ rĭ an geh trong kan n’hanh an geh ƀư ngăch. Ngoăy lah njrăng nău pĭch rlâm neh, bar lah nsoăt dak. Nchroh tâm 15 nar tay geh mih yơn mô têh, 15 nar tay mbra dơi ƀư. Yơn dŭt khay 8 rĭ mbra geh du rơh 10-15 nar păng geh kơt mhe nơh rĭ mih dŭt têh ngăn. Lah geh tay du rơh mih kơt nĕ rĭ mbra mât đăp mpăn lĕ rnoh aơ mbra pĭch rlâm jur dâl”.

 Bâh uănh nđôi nău ngăn mih dak buk tâm ban kơt uănh nđôi tay du đê̆ ntŭk pĭch rluh neh n’hanh dak bât tŏ djrah dôl geh pĭch rlâm, rluh ta Dak Nông, Groi kruanh n’gâng kan tuch tăm mât rong n’hanh hun hao ƀon lan Nguyễn Hoàng Hiệp, groi kruanh rnâng kan ntĭm leo ngih dak mpeh njrăng, rdâng nău tât mih sial uănh năl nău mih sial ta Dak Nông dôl geh nău tât dŭt hô, jêr njrăng. Ăp dak bât lĕ khuch yor mih sial kơt dak bât tŏ djrah, trong hăn, mbra dơi geh nklơi du đê̆ mpeh nău mbơh tơih ntuh kơl mhe mbra dơi ngăch njrăng gay ma geh ndơ̆ an lăp dŏng. N’gor Dak Nông an geh dŏng nău way nsum đah ăp nău tât, ăp nău kan ndơ dŏng ntung trong, dak bât tŏ djrah lĕ khuch lah an geh joi nkô̆ nău na nê̆ mơ geh ƀư njrăng sâm. Đah ăp nău kan dak bât tŏ djrah tơm tăm lĕ khuch rlâm, đang, rluh, n’gor Dak Nông an geh kơp tât trong kan lah mbra pling mbra khuch mhâm tât ntŭk ba dâng. Bâh nĕ, ơm geh trong kan  mât đăp mpăn mpeh drăp ndơ, nău rêh an nuĭh ƀon lan, an geh kơp tât nău kan pling dak bât gay ma tâm rdâng dâl ta rơh aơ.

“Nău kan lor bôk năp tâm ăp nău tât kơt aơ lah mât đăp mpăn săk soan, drăp ndơ an ƀon lan lor. Gâp dăn đă n’gor an geh uănh kơp tay lah geh pling dak bât, nău nĕ he mô geh ŭch geh n’hanh gâp knơm mô geh nău tât nĕ. Tâm rnôk lah pling dak bât, 2 rkeh mét khối dak jurr ba dâng, rĭ an geh kơp lĕ rngôch trong hoch bâh dak tât ba dâng. N’hanh tâm nău nĕ, rĭ he an geh ntrơn lor ƀon lan ntŭk gŭ an đăp mpăn, mbơh an ƀon lan, tât ăp rnăk an geh gĭt na nê̆”.