Mih dak lip bah dŭt khay 7 tât n’gul khay 8 ta n’gor Dak Nông lĕ ƀư hê khĭt n’hanh khuch mpeh drăp ndơ rlău 1.000 rmen prăk. Aơ lah ăp rnoh kơp mhe dơi UBND n’gor Dak Nông mbơh tât Ban ntĭm rđău ngih dak mpeh njrăng n’gang khuch khat. Bah nar 28/7 tât nar 18/8, ta n’gor Dak Nông geh mih têh jŏ jong ta âk ntŭk jêng tât ƀư dak băm tĭng ntŭk ta âk nkual ƀon lan gŭ n’hanh rluh rlâm, pĭch rhung neh ta du đêt nkual. Mih dak lip lĕ ƀư 2 hê khĭt yor geh dak klôn rdu, ƀư băm 275 mlâm jay, rlău 700ha tơm tăm n’hanh nklăp 230 ha ntŭk mât tui ka.

Ndrel đah nĕ, âk ndơ ƀư ntung trong n’hanh dak bât geh khuch yor pĭch rlâm, rluh neh. Dĭng lĕ khuch kơp êng hao tât 1.046 rmen prăk. Tâm rơh mih dak lip aơ, UBND n’gor Dak Nông lĕ 2 rơh mbơh nu nău ndal mpeh khuch khat. Nău mkra khuch khat mih dak lip, trôk nar bah n’gor Dak Nông dôl mâp âk jêr jŏt. Aƀaơ prăk nkrem njrăng n’gang trôk nar bah n’gor knŭng hôm 2,9 rmen prăk. Tâm rnôk tơm prăk nchrăp ntêm bah n’gor năm 2023 knŭng hôm rlău 74 rmen prăk. Yor nê, UBND n’gor Dak Nông đă Ban ntĭm rđău ngih dak mpeh njrăng n’gang trôk nar rgum lĕ, dăn đă Thủ tướng Chính phủ ntop kơl prăk bah tơm prăk Trung ương an n’gor đah rnoh prăk 661 rmen prăk.