Ƀư tĭng nău ntop kơl njrăng n’gang srê tĭng Nghị quyết mrô 16 năm 2021 bah Chính phủ, jêh âk rơh trok an, tât aƀaơ n’gor Dak Nông hôm e “rnon” rmôt cán bộ nuĭh kan dak si dĭng lĕ rnoh prăk 32 rmen. Mbơh mpeh nău aơ, wa Huỳnh Thanh Huynh, Groi Giám đốc N’gâng kan dak si n’gor Dak Nông, an gĭt:

“Nău kan dak si lĕ tâm rgop đah nău kan prăk kaih tâm nchră an UBND n’gor gay geh trong dôh rklaih, ei aƀaơ lĕ dơi UBND n’gor ntop tay nchrăp tơm prăk năm 2023, tâm nĕ ntop tay prăk trok an nău kơl an oh nô tâm ăp năm 2020, 2021 n’hanh 2022 lah rlău 32 rmen prăk”.

Ta rƀŭn nchră giao ban báo chí mhe aơ, wa Tôn Thị Ngọc Hạnh, Groi Kruanh UBND n’gor Dak Nông, mbơh, geh âk nkô̆ nău ƀư n’gor mbrơi trok an ntop kơl an ăp cán bộ nuĭh kan dak si hăn n’jrăng n’gang srê Covid-19. Du gâl yor n’gor hôm e jêr jŏt, jêr tâm pă prăk, du gâl yor ƀư tĭng rhăt jăp tĭng di nău ntrŭnh pháp luật. Aƀaơ âk wăk kol aơ lĕ dơi dôh rklaih:

“Mpôl hên tâm ăp nar mhe rlău na nao ntĭm rđău dŭt ndăn đah n’gâng kan dak si, n’gâng kan prăk kaih gay mkra lĕ rngôch nău kơl an nău kan dak si, yơn lah an tŏng ăp tĭng trong ƀư, mô an geh nău wĭ, jêng geh mbrơi ngăn. Aƀaơ nău aơ lĕ nchrăp trok, mhe rlău mpôl hên lĕ joi ăp tơm prăk, an kâp tơm prăk 2022 rmeh tâm pă, mhe rlău mpôl hên an n’hŭch âk nău ƀư êng gay rgum mkra nău kơl an nău kan dak si. An lah n’gor dŭt uănh tât, yơn yor mô tŏng yor n’gor ach o, prăk mô geh jêng jêr jŏt”.

Pơh bah năp (nar 3/6), rơh rƀŭn tal 20 bah Ban ntĭm rđău Ngih dak njrăng n’gang srê Covid-19 lĕ rƀŭn trực tuyến đah ăp nkuăl. Rơh rƀŭn aơ lĕ tâm nchră, uănh lah n’hanh hăn tât mbơh lĕ srê Covid-19 ta Việt nam. Mhe aơ Thủ tướng Chính phủ Phạm Minh Chính ntĭm rđău N’gâng kan dak si nchrăp sam ƀŭt rhăch nău rgâl Covid-19 bah nău ji tâm ntưp rmôt A an rmôt B (jêng lah rmôt dŭt klach dơi ntưp rêng âk, ntoh âk, rnoh khĭt âk an rmôt ji tâm ntưp klach ntưp rêng ngăch, ƀư khĭt nuĭh) n’hanh hăn tât mbơh lĕ srê ta Việt nam.

Ndrel đah nău mbơh lĕ srê Covid-19, bah meng rơh rƀŭn tal 5, Quốc hội khóa 15, ăp đại biểu lĕ đă ƀư kloh nău ngăn, trok đah ăp drăp ndơ lah măy mŏk, ndoh ndơ đah drăp ndơ dơi kơl, dêr nău prăp ntêm, geh trong mkra dêr mpŭng lir đah drăp ndơ khlay dơi rgŏ jă. Đại biểu Trần Văn Lâm, mpôl Bắc Giang, Ủy viên Ủy ban Tài Chính tơm prăk bah Ngih dak an lah ta aơ geh nkô̆ nău ăp drăp ndơ mô tŏng, sam ƀŭt gay ndơ̆ an mât uănh, dŏng kơt drăp ndơ nsum:

“Tâm năm srê bu kơl măy mŏk djôt tât dơm, mô geh nuĭh mĭn lah rgâl jêng drăp ndơ nsum ? an geh sam ƀŭt, rnoh khlay tâm di kỹ thuật m’hâm ƀư. Nău aơ tâm nău kơl prăk kaih lĕ an, djăt nchih n’hanh ndơ̆ an dŏng đah rnoh khlay mô an nchih, knŭng rnôk drăp ndơ an djôt tăch, sŏk rwăt ri mư an uănh lah. tâm rnôk kâp ri djăt nchih drăp ndơ ta bảng, jêh nĕ dŏng an săk rnglăy”.

Ăp đại biểu quốc hội an lah nău khlay an Việt Nam rgâl Covid-19 bah nău ji tâm ntưp rmôt A an rmôt B. Jêng lah bah rmôt klach ngăn an rmôt ji tâm ntưp n’hanh uănh nău ji chuyên khoa êng, mkra n’hanh trok an ƀư tĭng kơt ăp nău ji chuyên khoa êng. Uănh năl du trong lĕ rngôch, đại biểu Tạ Văn Hạ, mpôl Quảng Nam an lah hôm e ntrŭt đă n’hanh rlăp đah ntil mhe:

“Mpeh đah khoa học rmôt dak si lam ntŭr neh lĕ mbơh hôm. 2 tay tĭng nău ngăn Việt Nam pah kan nău rêh wăng sa, rêh jêng aƀaơ lĕ lăp nâm ơm hôm. Rnoh klach bah srê ntil mhe aơ n’gơch lơn, ngăch lơn. Tĭng tâm nău geh nĕ gay he an mbơh lĕ srê, yơn hôm e đă an mât tay ntil kaman mhe”.

Jêh 3 năm njrăng n’gang srê an saơ ăp nău nsrôih bah ăp rơh kơn kon nuĭh, ndrel ty njrăng n’gang srê yơn lĕ srê geh âk nău n’hoach. Aơ lah nău lor bah năp an ndăn nchrăp n’ăp ndoh ndơ, sam ƀŭt pháp luật, trong ntĭm khlay gay rdâng uĕh lơn ăp srê êng dơi geh ntoh tay.