Nuh srê Covid-19 hŏ geh ntrôl rŭch n’hanh dôl dơi Ban rđău đă gưl neh dak mpeh njrăng n’gang nuh srê mĭn uănh n’glêh an rgâl jêng rmôt nău ji ngăn, yơn tât aƀaơ, ta n’gor Dak Nông mô hŏ lôch jêh trok prăk kơl đah cán bộ dak si râng njrăng n’gang nuh srê.

Tĭng ƀư trong kơl njrăng n’gang nuh srê tĭng Nghị quyết mbrô 16 năm 2021 bah Chính phủ, lôch âk rơh trok tâm, tât rnôk dja n’gor Dak Nông hôm “rnon” rmôt cán bộ nuĭh kan dak si lĕ rngôch rlău 32 rmen prăk. Ta tâm nchră giao ban báo chí mhe aơ, wa Tôn Thị Ngọc Hạnh, Groi kruanh UBND n’gor Dak Nông, mbơh nău lư, geh âk nkô̆ ƀư jêng mbrơi trok prăk kơl an cán bộ nuĭh kan dak si râng njrăng n’gang nuh srê Covid-19 bah n’gor. Du gâl yor n’gor hôm jêr jŏt, jêr tâm pă prăk, du gâl tă bah tĭng ƀư lhăt tĭng di nău way pháp luật.