Mih têh tâm âk nar rlau aơ tâm n’gor Dak Nông ƀư du hê nŭih khĭt, ma rhiăng ngih geh lip ndrel âk nkuăl geh rluh neh, nkri tât nau rêh kon nŭih, drăp ndơ ƀon lan. Wa Lê Quang Dần, Groi Giám đốc N’gâng kan tuch tăm ndrel hun hao ƀon lan n’gor Dak Nông, mbơh, tât rnôk aơ, moh têh jŏ jong bah n’gor ƀư du hê nŭih khĭt, 159 ngih dak lip, bơi tât 360 ha tơm tăm ăp ntil geh dak lip ndrel 150 ha ntu ka bah ƀon lan geh ler kơh, ngăn lah trong hăn, trong hoch dak.

Tât rnôk aơ, tâm n’gor Dak Nông geh 79 rnăk ntrơn tât ntŭk gŭ êng đăp mpăn jêh rnôk nkuăl nơm gŭ geh dak lip, rluh neh. Ngăn lah nau rluh neh tâm xã nkuăl n’har bri Quảng Trực, nkuăl Tuy Đức dôl tât jêr. Ta aơ, n’gâng kan ndrel rmôt kan nkuăl Tuy Đức hŏ ntrơn 56 rnăk ƀon lan bah 2 ƀon Du Krăk ndrel Bu Prăng tât gŭ nde tâm ngih săm ƀŭt. N’gor Dak Nông hŏ rđau ăp ntŭk kan n’gâng kan lăp joi nkô̆ gay ma rklaih./.