Tâm yan mih dak lip năm aơ, ăp gưl ăp nău kan ta n’gor Dak Nông lĕ nchrăp lor ƀư tĭng ăp trong mkra gay njrăng n’gang n’hŭch trôk nar lơh. Tĭng nău mbơh bah Ban ntĭm rđău njrăng n’gang trôk nar n’hanh joi kơl nău rmanh n’gor Dak Nông ăp khay bôk năm aơ, ta n’gor aơ lĕ geh âk rơh mih rwănh blông ƀư plôk chor ngih jay n’hanh phah tơm tăm bah nuĭh ƀon lan, kơp êng khuch khat rlău 3,2 rmen prăk.

Hôm tâm yan mih năm e, ta n’gor lĕ geh 5 rơh mih têh nkre sial rwănh blôk dăng, ƀư khuch khat tât ngih wâl, drăp ndơ, tơm tăm n’hanh gung trong, âk ntŭk pĭch rlâm tĭng ntŭk... khuch khat nklăp 148 rmen prăk. Nchroh mbơh yan mih năm aơ, trôk nar mô uĕh na nao, jêr njrăng, UBND n’gor Dak Nông lĕ ntĭm rđău ăp ntŭk kan, ƀon lan kơp uănh tay, uănh joi, ntop tay ăp trong njrăng n’gang mih dak lip tâm di đah nu nău n’hêl na nê̆.