Tĭng UBND nkual ƀon têh Gia Nghĩa, n’gor Dak Nông rơh mih dak lip aơ lĕ ƀư dak băm đêt ngăn 64 rnăk, rgum ta ăp ntŭk: Nghĩa Tân, Quảng Thành, Nghĩa Trung. Ndrel đah nĕ, âk drăp ndơ, tuh mbo geh khuch đŏng. Tâm nĕ, geh rlău 40 rnăk dak băm hô ta rnoh rlău 50cm. Nô Trần Văn Hoàng, ta tổ dân phố 2, phường Nghĩa Trung, Nkual ƀon têh Gia Nghĩa, an gĭt, dak băm ƀư nô mô dơi sĭt jay n’hanh mô gĭt khuch khat m’hâm ƀư.

          “Rnôk jay kiău ma dak lĕ hao êp tât ri oh nô lĕ ntop kơl ndrel gay trơn ndơ ka lơ prêh da dê lah jay kônh Năm. Tât 8h măng ri dak hao băm tât jay kônh Năm, rnôk nĕ jay gâp băm rlău kô̆ mâk hôm, hôm jay kônh Năm băm nklăp 40cm, ri oh nô nkơng ndoh ndơ jay kônh Năm n’hanh ndơ njuăl ta nĕ nkơng prêh tay”.

Wa Thạch Cảnh Tịnh, Groi Kruanh UBND Nkual ƀon têh Gia Nghĩa, an gĭt, lor rnôk geh dak băm, Nkual ƀon têh lĕ ntĭm rđău ăp xă, phường, ăp rmôt kan nchrăp kâp n’hanh tâm rgop ntop kơl trơn nuĭh ƀon lan n’hanh drăp ndơ tât ntŭk đăp mpăn.

“Lĕ rngôch rnăk ƀon lan ta nkual bah dâng ri mpôl hên lĕ mbơh n’hanh ntop kơl trơn drăp ndơ ta ka lơ prêh, yơn lah dak sĭt têh, dŭt têh nkôp đah ăp năm jêng geh du đêt ndơ bah kônh wa ta bah dâng geh khuch. Aƀaơ mpôl hên dôl hăn uănh nđôi lĕ rngôch ăp nkual geh, lơn lah njok dak diăng Dak Nông: ta thôn Nâm Rạ (xă Đăk Nia), phường Quảng Thanh, ta tu dak n’glău Thượng, lah ăp ntŭk khuch ndal”.

Ta n’gor Dak Nông, dak băm dôl geh ta ăp xă Dak Rmăng, Quảng Hà (nkuăl Dak Glong) nkhah âk ntŭk trong hăn. Bah năp nu naư mih dak lip jêr jjŏt, kruanh UBND n’gor Dak Nông lĕ hăn uănh nđôi du đêt ntŭk dak băm ta nkual ƀon têh Gia Nghĩa. Ta ntŭk, wa Lê Trọng Yên, Groi Kruah UBND n’gor Dak Nông đă ăp ntŭk tĭng ƀon lan, nchrăp ƀư ăp trong njrăng n’gang trôk nar tĭng trong 4 ta ntŭk, đăp mpăn lĕ rngôch nău rêh n’hanh drăp ndơ an nuĭh ƀon lan:

“Lơn lah tâm nău pơk n’hoch n’glău n’gâr, tâm rgop đah nuĭh tơm ntuh kơl ăp công ty dak thủy điện n’hanh ăp n’glău bât an đăp mpăn. N’hanh mpôl hên uănh lah đŏng, rhoăt nău ơm bah ăp nău pĭch rlâm năm 2018 ta Dak Sin (Dak Nông) n’hanh ta n’gor băl kơt Lâm Đồng, gay ndâk njêng trong ƀư tâm di nău ngăn, m’hâm ƀư đăp mpăn âk ngăn đah nuĭh ƀon lan, đah kon nuĭh, n’ăp drăp ndơ bah nuĭh ƀon lan. Tâm pă kâp uănh, mbơh ngăch, ntĭm rđău ngăch, n’hanh nchrăp trong kan njrăng n’gang, nkoch trêng rgŏ jă nuĭh ƀon lan dŭt râng n’hanh nchrăp njrăng n’gang trôk nar, ăp ntŭk phĭt klach, ăp ntŭk geh pĭch rlâm, lơn lah nkual bah dâng”.

Ta Dak Lak, âk nar bah năp mih têh jŏ jong lĕ ƀư dak băm hang rbăn ha tơm tăm ta ăp nkuăl Krông Ana, Krông Bông, Lắk n’hanh Ea Súp. Ăp rmôt kan dơi kan dôl đah nuĭh ƀon lan dŭt n’hâm njrăng dak băm an tơm tăm, nkre kăch rek ăp rnoh neh ba dŭm ơm gay n’hŭch khuch khat.

Ta ăp xă Buôn Tría, Buôn Triết, Đăk Liêng (nkuăl Lắk) n’hanh ăp xă Quảng Điền, Dur Kmăl (nkuăl Krông Na) ta nkual dak me Krông Na, dak lip lĕ ƀư băm bơi 2.000 ha ba. Wa Phi Văn Mỹ, xă Quảng Điền, nkuăl Krông Ana, geh rlău 1 ha ba ta nkual aơ, an gĭt:

“Mih bôk yan dŭt băm. Du đêt rnoh neh lah ba dôl luh ri khuch lĕ, du đêt rnoh neh dŭm geh 20-30% ƀon lan dŏng soan pah kan gay rek”.

Mpeh nu nău mih dak lip ta ntŭk, wa Nguyễn Minh Đông-Groi Kruanh UBND nkuălk Krông Na, mbơh:

“Rnoh dak me aƀaơ hao têh, mbra li, trong rbông du đêt gưl rđŭng. Yor nĕ aƀaơ UBND nkuăl dôl nsrôih ntĭm rđău ăp ntŭk đah trong ƀư 4 ta ntŭk mkra ngăch, âk ntŭk dơi geh nglăp tay măy bơm ƀư njrăng dak băm ri ntĭm rđău ăp ntŭk ntop kơl tay njrăng dak băm an kônh wa”.

Tĭng kơp uănh ngăch bah Ban ntĭm rđău njrăng n’gang trôk nar n’hanh joi kơl nuĭh rmanh n’gor Dak Lak, ta n’gor lĕ geh du mlâm jay rlâm, 128 jay geh dak băm, rlău 5.000 ha tơm tăm geh dak băm; du đêt ndơ ƀư ntung trong, dak bât geh khuch djơh. Wa Mai Trọng Dũng, Groi giám đốc N’gâng kan tuch tăm mât rong n’hanh hun hao thôn ƀon Dak Lak nkoch mpeh trong njrăng n’gang trôk nar, ntop kơl nuĭh ƀon lan.

“Tĭng tâm trong ƀư njrăng n’gang trôk nar bah n’gor, ăp ntŭk lĕ ndâk njêng trong ƀư tĭng ntŭk, n’hanh nchrăp ntop kơl kônh wa geh dak băm. Tâm nĕ, ăp nkual dak băm tâm rbông nking ri dơi nchră bơm dak luh dak me gay n’hŭch khuch khat dak băm; ăp nkual rđŭng ba lĕ êp rek ri nkah ntĭnh, ntop kơl kônh wa nchrăp rek ơm đah trong ƀư “Lĭt ta jay rlău dŭm ta lŏ” gay n’hŭch yor trôk nar lơh”./.