VOV4.M'nông- Lvang năm 2006-2021, Dak Nông lah n’gor n’huch ach o dŭt ngăch ta Tây Nguyên. N’gor lĕ dôl ngluh mbơh âk trong kan gay ma n’huch tay ach o ngăch n’hanh nâp nâl.

Tĭng rnoh kơp bâh Tổng cục Thống kê, lvang năm 2006-2021 Dak Nông lah n’gor dâk bôk năp ta tây Nguyên n’hanh lah ngoăy tâm 10 n’gor n’huch ach o dŭt ngăch ta lam dak đah nău hŭch geh 18,3% rnoh rnăk ach o. Dŏng Nghị định 07 năm 2021 ntrŭnh nău mbơh rnoh ach o âk ding lvang năm 2021-2025  (tĭng nău ntrŭnh mhe), n’gor Dak Nông aƀaơ geh rlău 18.200 rnăk ach o, geh tât 11,2% rnoh rnăk ta ntŭk.

Rgâl tơm tăm ƀư an ƀon lan ta Dak Nông bah ach o

Tâm nĕ, geh 2/3 rnoh rnăk ach o lah nuĭh rnoi đê̆. N’gor ủy Dak Nông lĕ ntrŭnh Nghị quyết, UBND n’gor ntrŭnh nău nchrăp pah kan geh nău mpŏng n’huch dŭt đê̆ lah 3% rnăk ach o/năm, âk rlău đah nău mpŏng kan bâh bôk nău kan ngih dak ngluh mbơh. Nkô̆ mpŏng ŭch bâh Dak Nông hôm nha âk rlău đah nkual rnoi đĕ rnôk ma geh ngluh bmơh nău mpŏng hŭch bâh 5% let lơ. N’gor nsrôih tât năm 2025 lĕ ƀư lôch mô hôm geh rnăk ach o tĭng nău ntrŭnh mbơh mhe.

Nuĭh rblang: Thị Đoắt