VOV4.M'nông: Rgum rdâk njêng, nkra têh uĕh tay rse điện tâm ƀon lan lah nău kan an ntuh kơl lor  gay rhŏ dŏng an hun hao wăng sa- rêh jêng kon nuĭh ta n'gor Dak Nông. Aƀaơ n'gor dôl ƀư lôch jêh trong nchrăp kan pă an điện neh dak, đah lĕ rngôch tơm prăk ntuh kơl rlău 710 rmen prăk, têk điện an bơi 15.000 rnăk ƀon lan.

Wa Nguyễn Ngọc Ánh, Giám đốc Công ty Điện lực Dak Nông, an gĭt, gay ăp trong rse an ƀư đăp mpăn di rnoh ngăch, Công ty hŏ lor nchrăp ƀư na nê̆, ăp điện lực rgum nuĭh kan, ndeh rklư, ndơ ntrŭp dŏng ngăch an ƀư. Nkre, đah nău kan mpoh ang nău nsing nơm an ƀon lan, đơn vị tĭng ƀư jăp nău kan mât dŏng trong rse điện, đăp mpăn pă an điện jŏ jong rhŏ dŏng an nău kan hun hao wăng sa- rêh jêng kon nuĭh n'hanh rgop n'hao săk geh nău rêh bah  nuĭh ƀon lan./.

Nuĭh rblang: Điểu Thân