VOV4.M’nông: Mhe aơ, UBND n’gor Dak Nông ƀư bôk nau kan tâm nchră “Hun hao văng sa rêh jêng n’gor Dak Nông” tĭng nau kan trực tuyến ndrel sŏng đah ăp nŭih kan khoa học, nŭih blau nau mĭn njêng hun hao Phương Đông.

Bah năp nau tâm nchră, ăp ntoh măt hŏ hăn sŏng tâm du nau ngăn bah du đê̆ ntŭk tâm Công viên địa chất lam ntur neh UNESCO Dak Nông, nau kan văng sa bah n’gor, ndơn dŏng ăp nau ƀư mpeh nau rgum ân hun hao văng sa rêh jêng bah n’gor. Tâm mpông trong mpeh ba dâng Tây Nguyên nthoi đah nkuăl Đông Nam Bộ, n’gor Dak Nông geh tơm bô-xít đah rnoh âk bôk năp tâm lam ntur neh, lah nkuăl dâk bôk tâm lam dak mpeh nau dơi hun hao ăp ntil ŭnh nar ndâk mhe kơt điện mặt nar, điện sial. Geh rlau 380 rbăn ha neh, ngăn lah neh chăng Ba-zan jêng, dak âk, mih, nar tâm di ueh, tâm di ma ăp tơm tăm jong năm, tơm sa play, hun hao nau mât rong têh âk. Âk ntŭk ơm ueh, ntŭk pâl ueh ndrel ngăn lah ntrong yôk ŭnh jong ngăn tâm Đông Nam Á, Đah âk rnoi mpôl ndrel rêh ndrel mât ăp nau ueh ơm kăl e.

Ăp nŭih nchră nau kan ân lah, Dak Nông geh âk nau dơi ueh êng mpeh neh ntu, moh nar, lah nkuăl neh geh dơi gay ma hun hao jŏ jong. Trong kol tâm nau hun hao bah n’gor rnôk aơ lah trong hăn ê ueh, nau kan văng sa hôm jê̆, nau kan tuch tăm hôm kơt nau ơm, nĭih pah kan mô âk... Gay ƀư ân ueh nau ŭch leo Dak Nông hun hao, Giám sư Tiến sĩ Trình Quang Phú- Viện trưởng, Kruanh hội đồng khoa học Viên mĭn njuêng Hun hao Phương Đông mbơh kloh, êp nau pơk trong ân ueh tâm ăp rong kol, Dak Nông ân geh n’hao nau nkoch mbơh rup gui tât lam dak ndrel dak ba dih, bah ăp nau nchih, nau nkoch, văn học, phim rup...

‘Tâm ăp nkô̆ nau aơ ri gâp knŭng ŭch ăp đồng chí ân geh uănh tât nau mbơh nkoch, nau mbơh nkoch bah nơm mô geh âk. Mra dơi lah, nơm ê lor ân tât ta aơ ri ân geh ân ma oh nô jrâu kan pơk lĕ ăp ntŭk trong mạng, uănh geh moh nau mbơh, yơn lah jêh rnôk uănh ri mô geh, geh đê̆ ir”.

Tiến sĩ Trần Du Lịch, nŭih ƀư nau kan văng sa, Groi kruanh rmôt kan ntoh măt Quốc hội nkuăl ƀon têh Hồ Chí Minh ân lah, đah ăp nau dơi geh êng nê, Dak Nông dơi geh nau hun hao dăng lah geh nau dơi rgum ăp tơm tuh kơl:

‘Ân geh ntoh nau mpŏng ŭch hun hao bah Dak Nông bah ăp nau nsôih rgum leo ăp tơm ntuh kơl tâm ndrel bah dih dak njêng du nau ntuh kơl mhe tâm ăp nau kan. Ăp đồng chí ân geh jă dơi du đê̆ ntŭk kan ƀư tơm tâm moh nau kan, moh nau dơi gay ma pơk trong ueh, yơn nơm ân geh der ăp rơh rƀŭn geh ăp nŭih tơm ntuh kơl tât ký nau nkah knŭng mbơh nkoch dơm, ma mô geh nŭih ƀư ngăn. Tal bar, lah nơm ân geh n’hao nau rgum ntuh kơl, yor PCI bah Dak Nông dêh ir, mpeh nau kan kơl an ri mhâm ƀư ăp nŭih rđau kan ân geh nkoch ăp nau ŭch hun hao Dak Nông ân ƀon lan ndrel lam ntrong kan chính trị. Nơm ân geh ƀư kloh tâm nau rgum, ăp nau ntrŭnh ntuh kơl, nau kơl an... ân geh njêng nau rnơm ân ntŭk kan ndrel ƀon lan. Ngăn lah đah ƀon lan ri nơm ân geh mbơh dơi ăp nau kan nê hun hao ê lor ân geh nau săk rnglay ma ƀon lan ta nê, nê lah gay ma ndơn nau kơl an bah ƀon lan, ngăn lah nau kan pâl n’aih”.

Nau tâm nchră mbơh rgop ăp nau bah ăp nŭih blau nau kan bôk năp bah neh dak mpeh ăp nau kan văng sa, ntĭm nti, khoa học kỹ thuật ân saơ nau nsôih bah Đảng bộ, n’gâng kan n’gor Dak Nông tâm nau joi trong leo n’gor hun hao, ƀư ân geh dơi nkô̆ nau ma nau ntrŭnh Đại hội đảng bộ n’gor Dak Nông tal XII, năm kan 2022-2025 hŏ nchrăp luh, lah nsôih ân jêng n’gor geh nau dơi ngăn tâm năm 2025 ndrel n’gor hun hao jêng tâm năm 2030 bah nkuăl Tây Nguyên./.

Nŭih rblang: H’Thi