Thôn Trăng Nó Kon Blo, xã Đăk Kôi, nkuăl Kon Rẫy, n’gor Kon Tum geh 120 rnăk rnoi Xơ đăng. Gay kơl an nŭih ƀon lan rgâl nau mĭn, nau kan, nsôih pah kan ndrel geh prăk rgâl nau rêh, Chi bộ thôn Trăng Nó Kon Blo đă 21 đảng viên ân leo trong. Ntơm ăp nau kan hun hao văng sa rêh jêng ân geh nau dơi kơt: dŏng ntil ba mhe, mât chăm ân tâm di, ntrơn tơm bum blang gay tăm cao su, cà phê...nŭih ƀon lan tâm thôn, ngăn lah 35 rnăk ach o kơt tĭng. Yuh Y Xanh, Kruanh rmôt kan bu ur xã Đăk Kôi, đảng viên rƀŭn tâm thôn Trăng Nó Kon Blo mbơh, rnơm geh đảng viên ntĭm, ăp rnăk ach o ngăn kơt lah A Dĩa, A Thế, A Long... rnôk aơ hŏ janh ntuh kơl hun hao ân rnăk vâl:

‘Ăp đảng viên vay tât ăp rnăk nkoch mbơh ân rnăk nơm kơl tâm nau hun hao văng sa kŏ kơt lah ăp nau ntrŭnh bah Đảng, pháp luật bah Ngih dak. Mbơh kônh wa rgâl nau mĭn nau kan tâm nau ntrơn rgâl tơm tăm mpa rong ndrel ma nau bonh đă rgâl nau mĭn nau kan bah kônh wa rnoi mpôl đê̆, ƀư ân kônh wa rnoi mpôl đê̆ rklaih ach o nâp nâl”.

 Đăk Koi lah xã nkuăl jru bah nkuăl Kon Rẫy đah rnoh bơi tât 3.400nŭih, tâm nê rnoi mpôl đê̆ Xơ đăng geh tât 94%. Wa Trương Hồng Doanh, Bí thư Đảng uỷ xã Đăk Kôi mbơh, tât lôch năm 2022 xã hôm 285 rnăk ach o geh rlau 34% rnăk. Bah năp nau nê, Đảng uỷ xã ƀư ntrŭt dăng nau rgŏ jă “ƀư ân nau mĭn, nau kan bah kônh wa rnoi mpôl đê̆ geh rgâl, geh nau dơi hun hao rklaih ach o”. Năl nau kan bah ăp đảng viên, Đảng uỷ xã Đăk Kôi pă mbơh nau kan ân 15 chi bộ ndrel ngăn tât 187 đảng viên bah xã, tâm nê uănh khlay tât nau kan leo trong bah ăp đảng viên rnoi mpôl đê̆:

‘Đảng bộ xã rnôk aơ kơp tât rnoh đảng lah nŭih rnoi mpôl đê̆ ri âk ngăn, đah 156 đảng viên geh tât 83,42%. Đah nau kan lah đảng viên ri ăp đồng chí đảng viên ta aơ mro ƀư ueh nau leo trong lor bah đảng viên. Ntrŭnh ƀư nau rgŏ jă ƀư rgâl nau mĭn, nau kan, ƀư ân kônh wa rnoi mpôl đê̆ hao rklaih ach o nâp nâl tâm ăp năm rlau aơ bah ăp đảng viên ăp chi bộ ƀon lan, ma ngăn lah đảng viên rnoi mpôl đê̆ ƀư nau nkoch mbơh bonh đă kônh wa kơt tĭng ueh ngăn”.

Rêng nau rgŏ jă “Ƀư an nau mĭn, nau kan bah kônh wa rnoi mpôl đê̆, ƀư ân kônh wa rnoi mpôl đê̆ rklaih ach o nâp nâl” yor n’gor uỷ Kon Tum rđau, nkuăl Kon Rẫy hŏ ƀư ueh nau rgŏ jă ndrel geh nău ƀư ntrŭnh ngăn. Tâm 43 thôn rnoi mpôl đê̆ đảng viên rgum bonh đă, ntĭm nti ăp rnăk rnoi mpôl đê̆ ach o ndrel êp ach o dŏng ueh nau kan bah rnăk vâl, tơm prăk manh gay hun hao văng sa, nau dŏng prăk ân geh tâm di gay ma rgum ntuh kơl ân nau kan tuch tăm, nkoch mbơh mpeh ntil tăm, mpa rong ân tâm di, bonh đă ăp rnăk mât chăm tơm tăm, râng ƀư ăp ntŭk tâm boh nau kan, tâm boh tăm tơm dak si, hun hao tuch tăm kloh...Wa Nguyễn Văn Thuỷ, Groi Kruanh UBND nkuăl Kon Rẫy, lah rjăp, nau rgŏ jă hŏ leo tât nau săk geh văng sa hun hao bah nkuăl:

 ‘Nŭih ƀon lan hŏ geh âk nau rgâl nau mĭn, nau kan tâm nau ƀư tĭng nau kan tuch tăm kŏ kơt lah mât rong ƀư ân nau rêh nŭih ƀon lan tâm nkuăl ngai nar lơn ma geh nau rgâl mhe, ngăn lah kônh wa rnoi mpôl đê̆. Bah nau ƀư nau kan tuch tăm, jêh ri tâm rgop nsum ƀư ăp nau kan bah neh dak ân kônh wa rnoi mpôl đê̆ hŏ njêng ăp nau ntrơn rgâl kloh ndrel săk tam tâm nau ngăn nê lah nau rêh ndrel nau kan bah nŭih rnoi mpôl đê̆ geh âk nau rgâl ngăn”.

Tĭng wa Nguyễn Quang Thạch, Bí thư nkual uỷ Kon Rẫy, jêh rlau 2 năm ƀư nau bonh đă, nau rgŏ jă “ƀư ân nau mĭn, nau kan bah kônh wa rnoi mpôl đê̆, ƀư ân rnoi mpôl đê̆ rklaih luh ach o nâp nâl” hŏ ăp nhoat ƀư ueh ngăn tât nau mĭn, nau kan bah ƀon lan, leo nsĭt nau văng sa ngăn. Geh rlau 30% rnăk rnoi mpôl đê̆ư ach o, êp ach o bah nkuăk rgâl nau mĭn, jut jăng nau rluk mâl, mô kâp rnơm tâm nau kơl an bah ngih dak nsôih rklaih ach o nâp nala, rlau 39% rnoh rnăk blau ƀư nau kan mhe tâm nau kan tuch tăm, săch kon ntil tăm, mpa rong geh rnoh văng sa prêh, tâm di; bơi tât 17% rnoh rnăk geh nau rêh drăp ndơ, nuih n’hâm geh rgâl, geh rnoh văng sa âk tâ nau dơi geh bah kônh wa rnoi mpôl đê̆ tâm nkuăl.

Ƀư tĭng ăp nau tă geh dơi gay nau rgŏ jă “ƀư ân rgâl nau mĭn, nau kan bah kônh wa rnoi mpôl đê̆. Ƀư ân kônh wa rnoi mpôl đê̆ rklaih ach o nâp nâl” hăn ngăn tâm nau jru, săk tam, ngăn, nkuăl uỷ Kon Rẫy năl ngoai tâm âk nau kan khlay lah lŏ n’hao nau dơi, nau kan bah ăp gưl kan ƀư nau kan tâm chi bộ, đảng viên nơm ƀư tĭng rnăk, rmôt rnăk ndrel nŭih geh bu rnơm ntoh lư tâm nau kan ƀon lan”./.